សាលាឧទ្ធរណ៍ភ្នំពេញគ្រោងប្រកាសសាលដីកាលើបណ្តឹងឧទ្ធរណ៍របស់លោក កឹម សុខា អតីតប្រធានគណបក្សប្រឆាំងពីបទ “សន្និដ្ឋិភាពជាមួយបរទេស” នៅព្រឹកថ្ងៃព្រហស្បតិ៍សប្តាហ៍ក្រោយ បន្ទាប់ពីបានបញ្ចប់ការធ្វើសេចក្តីសន្និដ្ឋានផ្ទាល់មាត់កាលពីដើមខែមេសា។
យោងតាមដីកាកោះ ចុះថ្ងៃទី២០ ខែមេសា ឆ្នាំ២០២៦ លោក អ៊ឹម សុផាន ជាអគ្គព្រះរាជអាជ្ញារង នៃអយ្យការអមសាលាឧទ្ធរណ៍ភ្នំពេញ បានកោះហៅលោក កឹម សុខា ឱ្យចូលរួមការប្រកាសសាលដីកា ម៉ោង៨៖៣០នាទីព្រឹក ថ្ងៃព្រហស្បតិ៍ សប្តាហ៍ក្រោយ។
សាលាឧទ្ធរណ៍បានបញ្ចប់សវនាការលើសេចក្តីសន្និដ្ឋានផ្ទាល់មាត់រយៈពេល២ថ្ងៃ កាលពីថ្ងៃទី៨និងទី៩ ខែមេសា ឆ្នាំ២០២៦។
លោក កឹម សុខា អតីតប្រធានគណបក្សសង្គ្រោះជាតិដែលត្រូវបានរំលាយចោលកាលពីឆ្នាំ២០១៧ ត្រូវបានតុលាការចោទប្រកាន់ពីបទ “សន្និដ្ឋិភាពជាមួយបរទេស” តាមមាត្រា ៤៤៣ នៃក្រមព្រហ្មទណ្ឌ ហើយកាលពីខែមីនា ឆ្នាំ២០២៣ សាលាដំបូងរាជធានីភ្នំពេញ បានផ្តន្ទាទោសលោកឱ្យជាប់ពន្ធនាគារ២៧ឆ្នាំ និងដកជាស្ថាពរនូវសិទ្ធិបោះឆ្នោត សិទ្ធិឈរឈ្មោះឱ្យគេបោះឆ្នោត៕