ក្រសួងធនធានទឹកនិងឧតុនិយមក្រើនរំលឹកពលរដ្ឋឱ្យប្រុងប្រយ័ត្នចំពោះស្ថានភាពភ្លៀងធ្លាក់ជាមួយផ្គររន្ទះ និងខ្យល់កន្ត្រាក់នៅតំបន់វាលទំនាប ខ្ពង់រាបនិងតំបន់មាត់សមុទ្រ ដោយសារឥទ្ធិលព្យុះស៊ីឡាគូ។
សេចក្តីជូនដំណឹងចុះថ្ងៃទី១០ ខែមេសា ឆ្នាំ២០២៦ ក្រសួងធនធានទឹក និងឧតុនិយមបានជូនដំណឹងដល់សាធារណជនអំពីសម្ពាធទាបដែលកើតនៅមហាសមុទ្រប៉ាស៊ីហ្វិកខាងលិច និងបានវិវត្តទៅជាព្យុះទី៤ ឈ្មោះ ស៊ីនឡាគូ ដែលមានឥទ្ធិពលលើរបបខ្យល់មូសុងឦសាន ដែលបក់លើសមុទ្រចិនខាងត្បូង អាងទន្លេមេគង្គ សមុទ្រកម្ពុជា និងលើព្រះរាជាណាចក្រកម្ពុជា ប៉ុន្តែព្យុះស៊ីនឡាគូនេះ ពុំមានឥទ្ធិពលមកលើព្រះរាជាណាចក្រកម្ពុជាដោយផ្ទាល់ទេ។
ក្រសួងធនធានទឹកបានព្យាករថា ចាប់ពីថ្ងៃទី១៤ ដល់ថ្ងៃទី២៥ ខែមេសា ឆ្នាំ២០២៦នេះ អាចមានភ្លៀងធ្លាក់លាយផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដី២០ភាគរយនៅតំបន់វាលទំនាប និងតំបន់មាត់សមុទ្រដូចជា ខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ចាម ព្រៃវែង ត្បូងឃ្មុំ កណ្តាល តាកែវ ស្វាយរៀង និងរាជធានីភ្នំពេញ កោះកុង ព្រះសីហនុ កំពត កែប និងជួរភ្នំបូកគោ ។ ក្រសួងធនធានទឹកបន្ថែមថា រលកសមុទ្របោកបក់ខ្លាំង ដែលមានកម្ពស់មធ្យមអប្បបរមា ០,៥០ម៉ែត្រនិងកម្ពស់មធ្យមអតិបរមា ១,៧៥ម៉ែត្រ។
ក្រសួងធនធានទឹកបញ្ជាក់ទៀតថា តំបន់ខ្ពស់រាបដូចជាខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី ជួរភ្នំដងរែក និងតំបន់ជួរភ្នំក្រវាញអាចមានភ្លៀងធ្លាក់លាយផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដី១៥ភាគរយ។
ស្របពេលជាមួយគ្នា ក្រសួងធនធានទឹកក៏បានប្រាប់ឱ្យសាធារណជនប្រុងប្រយ័ត្នខ្ពស់ ជាពិសេសការធ្វើដំណើរតាមផ្លូវគោកនិងផ្លូវទឹក ក៏ដូចជាប្រុងប្រយ័ត្នខ្ពស់ចំពោះបាតុភូតភ្លៀងផ្គររន្ទះ និងខ្យល់កន្ត្រាក់ ដែលអាចកើតមានច្រើននៅពេលមានភ្លៀងកក់ខែ អំឡុងរដូវចូលឆ្នាំថ្មីប្រពៃណីជាតិខ្មែរ៕