ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជាបានមានព្រះរាជបន្ទូលថា ព្រះអង្គនឹងបន្តគង់ប្រថាប់ ដើម្បីព្យាបាលព្រះរោគមហារីកនៅក្រពេញប្រូស្តាតនៅមន្ទីរពេទ្យរដ្ឋធានីប៉េកាំង សាធារណរដ្ឋប្រជាមានិតចិន រយៈពេលមួយខែ ទៅពីរខែទៀត។
យោងតាមព្រះរាជសារ ចុះថ្ងៃទី១០ ខែមេសា ឆ្នាំ២០២៦ ព្រះអង្គបានមានព្រះបន្ទូលថា បច្ចុប្បន្ន ព្រះអង្គមានព្រះរោគមហារីកនៅក្រពេញប្រូស្តាត ហើយពុំទាន់អាចយាងនិវត្តន៍ទៅកាន់មាតុប្រទេសនៅពេលនេះបានទេ ដោយក្រុមគ្រូពេទ្យតម្រូវឱ្យព្រះអង្គគង់ប្រថាប់ក្នុងមន្ទីរពេទ្យ ដើម្បីព្យាបាលតាមវេជ្ជបញ្ជា និងថែរក្សាព្រះរាជសុខភាពមួយរយៈពេលពីមួយខែ ទៅពីរខែបន្តទៀត។
តាមរយៈព្រះរាជសារដដែលនេះ ព្រះអង្គនិងសម្តេចព្រះមហាក្សត្រី ព្រះវររាជមាតាជាតិខ្មែរក៏បានផ្ញើសេចក្តីនឹករលឹក និងប្រទានពរជ័យដល់បងប្អូនជនរួមជាតិទាំងអស់ឱ្យបានសេចក្តីសុខ សេចក្តីចម្រើនក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ។
ព្រះមហាក្សត្រ និងសម្តេចព្រះមហាក្សត្រីបានយាងទៅទីក្រុងប៉េកាំង ប្រទេសចិន ដើម្បីពិនិត្យព្រះរាជសុខភាពកាលពីថ្ងៃទី២៧ ខែកុម្ភៈ ឆ្នាំ២០២៦៕