កម្ពុជាតវ៉ាជាផ្លូវការជាថ្មីចំពោះសកម្មភពខុសច្បាប់របស់កងកម្លាំងប្រដាប់អាវុធថៃ នៅក្នុងតំបន់ដែលកាន់កាប់ដោយខុសច្បាប់នៅតំបន់ព្រំដែនក្នុងខេត្តបាត់ដំបង និងឧត្តរមានជ័យចាប់តាំងពីខែធ្នូ ឆ្នាំ២០២៥។
នៅក្នុងសេចក្តីប្រកាសព័ត៌មានចុះថ្ងៃទី១០ ខែមេសា ឆ្នាំ២០២៦នេះ ក្រសួងការបរទេសកម្ពុជាបានអះអាងថា នៅថ្ងៃទី៦ ខែមេសា ឆ្នាំ២០២៦ កងកម្លាំងប្រដាប់អាវុធថៃបានដំឡើងដងទង់ជាតិថៃលើខ្នងទំនប់ខាងកើតនៃអូរទីពីរនៅក្រុងសំរោង ខេត្តឧត្តរមានជ័យ សាងសង់របងព្រំដែនជាឯកតោភាគីក្នុងតំបន់ចន្លោះបង្គោលព្រំដែនលេខ ៥២ និង៥៤ ដែលចាប់ផ្តើមកាលពីថ្ងៃទី២ ខែមេសា ឆ្នាំ២០២៦ និងការចុះពិនិត្យទីតាំងដោយគ្មានការអនុញ្ញាត កាលពីថ្ងៃទី៧ ខែមេសា ឆ្នាំ២០២៦។
សេចក្តីប្រកាសព័ត៌មានបន្តថា សកម្មភាពទាំងនេះជាការរំលោភលើអធិបតេយ្យ របស់កម្ពុជា ក៏ដូចជាលើចំណុច I (វិធានការកាត់បន្ថយភាពតានតឹង) នៃសេចក្តីប្រកាសរួម នៃកិច្ចប្រជុំពិសេសលើកទី៣ របស់គណៈកម្មការព្រំដែន (GBC) ផ្ទុយទៅនឹងអាណត្តិរបស់គណៈកម្មការចម្រុះខណ្ឌសីមាព្រំដែនគោក (JBC) និងប៉ះពាល់លើការដាំបង្គោលព្រំដែនបណ្តោះអាសន្នដែលបានធ្វើដោយក្រុមវាស់វែងចម្រុះកាលពីថ្ងៃទី៦ ខែធ្នូ ឆ្នាំ២០២៥។
សេចក្តីប្រកាសព័ត៌មានបន្តថា “រដ្ឋាភិបាលកម្ពុជា មិនទទួលស្គាល់និងមិនទទួលយកនូវខ្សែព្រំដែនឬការទាមទារទឹកដីណាមួយដែលអះអាងជាឯកតោភាគីដោយប្រទេសថៃជាដាច់ខាត”។
កម្ពុជាអំពាវនាវឱ្យថៃបញ្ឈប់សកម្មភាពទាំងនេះជាបន្ទាន់ ដើម្បីកាត់បន្ថយភាពតានតឹង និងរក្សាសន្តិភាពតាមព្រំដែន។ ជាមួយគ្នានេះ កម្ពុជាបន្តប្តេជ្ញាដោះស្រាយជម្លោះព្រំដែនដោយសន្តិវិធី ស្របតាមច្បាប់អន្តរជាតិ និងកិច្ចព្រមព្រៀងទ្វេភាគីដែលមានស្រាប់ ហើយកម្ពុជានៅតែរក្សាជំហររបស់ខ្លួនដដែលថា ខ្សែព្រំដែនមិនត្រូវបានផ្លាស់ប្តូរដោយការប្រើកម្លាំងឡើយ៕