ជនសង្ស័យក្នុងករណីគ្រោះថ្នាក់ចរាចរណ៍ ដែលបានបណ្តាលឱ្យមនុស្ស ៦នាក់ស្លាប់ នៅស្រុកមោងឫស្សី ខេត្តបាត់ដំបង កាលពីថ្ងៃសុក្រសប្តាហ៍មុននោះ បានសារភាពកំហុសនៅថ្ងៃពុធនេះថា ខ្លួនជាអ្នកបើករថយន្តបង្កគ្រោះថ្នាក់បណ្តាលឱ្យមានមនុស្សស្លាប់ និងរបួស។
យោងតាមសេចក្តីប្រកាសព័ត៌មាន ចុះថ្ងៃទី០១ ខែមេសា ឆ្នាំ២០២៦នេះ ស្នងការដ្ឋាននគរបាលខេត្តបាត់ដំបងអះអាងថា ជនសង្ស័យឈ្មោះ ស៊ីវ ជ័យសិដ្ឋ ភេទប្រុសបានសារភាពថា ខ្លួនគឺជាមនុស្សតែម្នាក់គត់ ដែលបានបើករថយន្តបង្កគ្រោះថ្នាក់បណ្តាលឱ្យមានអ្នកស្លាប់និងរបួស បន្ទាប់ពីត្រូវបាននាំខ្លួនមកសាកសួរនៅស្នងការដ្ឋាននគរបាលខេត្តបាត់ដំបង។
បើតាមសេចក្តីប្រកាសព័ត៌មានដាច់ដោយឡែកមួយទៀតរបស់ស្នងការដ្ឋាននគរបាលខេត្តបាត់ដំបងចុះថ្ងៃទី៣១ ខែមីនា ឆ្នាំ២០២៦ បានឱ្យដឹងថា ហេតុការណ៍គ្រោះថ្នាក់ចរាចរណ៍នេះ កើតឡើងនៅយប់ថ្ងៃទី២៧ ខែមីនា នៅឃុំកកោះ ស្រុកមោងឫស្សី ខេត្តបាត់ដំបង រវាងរថយន្តម៉ាកមេកស៊ើដេសពណ៌ខ្មៅពាក់ផ្លាកលេខកម្ពុជា C.S.6168 ជាមួយនឹងម៉ូតូចំនួន២គ្រឿង បណ្តាលឱ្យស្លាប់ ៥នាក់ ក្នុងនោះប្រុស២នាក់ ស្ត្រីចំនួន៣នាក់ ដែលស្ត្រីម្នាក់ក្នុងចំណោមនោះ មានគភ៌៣ខែផងដែរ និងបណ្តាលឱ្យរងរបួសធ្ងន់១នាក់ ភេទប្រុស។
ហេតុការណ៍នេះ កើតឡើងខណៈពេលជនរងគ្រោះជិះម៉ូតូវិលត្រឡប់មកពីមើលការប្រគុំតន្រ្តីមួយកន្លែងស្ថិតនៅទីរួមស្រុកមោងឫស្សីនារាត្រីនោះ។
សេចក្តីប្រកាសព័ត៌មានដដែលបញ្ជាក់ទៀតថា ជនសង្ស័យជាអ្នកបើករថយន្តបង្កគ្រោះថ្នាក់នេះ បានគេចខ្លួនពីកន្លែងកើតហេតុ ដោយបន្សល់ទុករថយន្តបង្កនៅទីនោះ ហើយសមត្ថកិច្ចបានស្រាវជ្រាវរកឃើញអត្តសញ្ញាណម្ចាស់រថយន្តមានឈ្មោះ ស៊ីវ ជ័យសិដ្ឋ ភេទប្រុស កើតថ្ងៃទី០២ ខែធ្នូ ឆ្នាំ២០០៦ ជាអ្នករស់នៅខណ្ឌមានជ័យ រាជធានីភ្នំពេញ។
ស្នងការនគរបាលខេត្តបាត់ដំបងបានឱ្យដឹងទៀតថា លោក ស៊ីវ សុជាតិ ជាឪពុករបស់ឈ្មោះ ស៊ីវ ជ័យសិដ្ឋ បញ្ជាក់ថា រថយន្តបង្កម៉ាកមេកស៊ើដេស ដែលមានផ្លាកលេខខាងលើ គឺជាកម្មសិទ្ធរបស់កូនប្រុសលោកមែន ហើយថា កូនរបស់លោកបានបើករថយន្តខាងលើចេញពីភ្នំពេញ មកផ្លូវបាត់ដំបង ហើយថ្ងៃដដែលនោះ លោកបានទទួលទូរស័ព្ទពីប្រពន្ធរបស់លោកប្រាប់ថា កូនប្រុសរបស់លោកជួបគ្រោះថ្នាក់ចរាចរណ៍នៅខេត្តបាត់ដំបង។
ទាក់ទិនករណីនេះ លោកនាយករដ្ឋមន្ត្រី ហ៊ុន ម៉ាណែត នៅព្រឹកថ្ងៃអង្គារ បានថ្លែងសារចូលរួមរំលែកទុក្ខក្រុមគ្រួសារសពទាំង៦នាក់ និងបានចេញបញ្ជារឱ្យរដ្ឋមន្រ្តីក្រសួងយុត្តិធម៌ និងអគ្គស្នងការនគរបាលជាតិស្រាវជ្រាវឱ្យហ្មត់ចត់រកជនបង្កមកទទួលខុសត្រូវចំពោះមុខច្បាប់ ដើម្បីផ្តល់យុត្តិធម៌ដល់ជនរងគ្រោះ៕