ក្រុមហ៊ុនម៉ូរីសុនកាក់ ជាក្រុមហ៊ុនជម្រះបញ្ជីធនាគារ ផេនដា ខមមើសល ប៊ែង ម.ក ប្រកាសទូទាត់សំណងដល់អ្នកដាក់ប្រាក់បញ្ញើទៅតាមដំណាក់កាលចាប់ពីដើមខែមេសានេះទៅ ក្រោយពីបានពិភាក្សាជាមួយធនាគារជាតិ នៃកម្ពុជា។
នៅថ្ងៃទី២៧ ខែមីនា ឆ្នាំ២០២៦ ក្រុមហ៊ុនម៉ូរីសុនកាក់ ចេញសេចក្តីជូនដំណឹងមួយប្រកាសផ្តល់សំណងជូនអតិថិជនរបស់ធនាគារ ផេនដា ហើយការទូទាត់សំណងនេះ នឹងត្រូវធ្វើឡើងច្រើនវគ្គ ដោយហេតុថា ការជម្រះបញ្ជីនៅមិនទាន់បានចប់សព្វគ្រប់នៅឡើយ ខណៈអ្នកជម្រះបញ្ជីបានបំប្លែងទ្រព្យសកម្មរបស់ធនាគារទៅជាសាច់ប្រាក់បានខ្លះ ដែលអាចទូទាត់សងអតិថិជនមួយចំណែកសិន។
សេចក្តីជូនដំណឹងដដែលបញ្ជាក់ថា វគ្គទី១នេះ អ្នកដាក់ប្រាក់បញ្ញើ ដែលបានដាក់ពាក្យស្នើសុំផ្តល់សំណងត្រូវមកទទួលសំណង ចាប់ពីថ្ងៃទី០២ ខែមេសា ឆ្នាំ២០២៦ នៅការិយាល័យដែលមានទីតាំងនៅខណ្ឌទួលគោក។
សេចក្តីជូនដំណឹងនេះបន្ថែមទៀតថា ការផ្តល់សំណង នឹងត្រូវធ្វើឡើងតាមរយៈការផ្ទេរតាមធនាគារចំពោះអ្នកដាក់ប្រាក់បញ្ញើ ដែលបានផ្តល់ព័ត៌មានគណនីធនាគារ និងតាមរយៈការផ្តល់សំណងដោយផ្ទាល់នៅអាស័យដ្ឋានខាងលើចំពោះអ្នកដែលពុំបានផ្តល់ព័ត៌មានធនាគារក្នុងពាក្យស្នើសុំទារសំណង។
តាមរយៈសេចក្តីជូនដំណឹងនេះ ក្រុមហ៊ុនម៉ូរីសុនកាក់ បញ្ជាក់ថា ការទូទាត់សំណងដល់អ្នកដាក់ប្រាក់បញ្ជើនឹងត្រូវបន្តអនុវត្ត ពេលដែលទ្រព្យសកម្មរបស់ធនាគារត្រូវបានបំប្លែងជាសាច់ប្រាក់ជាបន្តបន្ទាប់។
ក្រុមហ៊ុនម៉ូសីសុនកាក់ក៏បានក្រើនរំឭកសាធារណៈជនឱ្យមានការប្រុងប្រយ័ត្នខ្ពស់ចំពោះការឆបោករបស់ជនឆ្លៀតឱកាសមួយចំនួន ដែលអះអាង ឬធានាសម្របសម្រួលជួយផ្តល់សំណងផ្សេងៗដល់អតិថិជនរបស់ធនាគារ ដោយតម្រូវឱ្យបង់កម្រៃសេវាផ្សេងៗ ឬទទួលយកសំណងក្នុងទំហំទឹកប្រាក់ណាមួយ ហើយថា មានតែក្រុមហ៊ុនម៉ូរីសុនកាក់ប៉ុណ្ណោះ ដែលជាអ្នកជម្រះបញ្ជីស្របច្បាប់សម្រាប់អនុវត្តនីតិវិធីជម្រះបញ្ជីធនាគារផេនដា និងមានសិទ្ធិចាត់ចែងទ្រព្យសម្បត្តិ និងបំណុលនានារបស់ធនាគារស្របច្បាប់ និងបទបញ្ញត្តិនានាជាធរមាន៕