ក្រសួងអប់រំ យុវជន និងកីឡា ដាក់ចេញវិធានការពង្រឹងបទបញ្ជាផ្ទៃក្នុងតាមគ្រឹះស្ថានសាធារណៈ ដើម្បីលើកកម្ពស់ចរិយាសម្បទារបស់សិស្សានុសិស្ស ស្របពេលមានការបារម្ភអំពីការធ្លាក់ចុះសីលធម៌របស់សិស្សានុសិស្សមួយចំនួននៅតាមសាលារៀន។
តាមរយៈសេចក្តីណែនាំចុះថ្ងៃទី១៦ ខែមីនា ឆ្នាំ២០២៦ ក្រសួងអប់រំបានកំណត់ឱ្យគ្រឹះស្ថានសិក្សាចំណេះទូទៅសាធារណៈពង្រឹងការអនុវត្តបទបញ្ជាផ្ទៃក្នុង ដោយទាមទារឱ្យមានការបង្កើតគណៈកម្មការគ្រប់គ្រងសាលារៀន ទំនាក់ទំនងជាមួយមាតាបិតា ឬអាណាព្យាបាលសិស្សឱ្យបានទៀតទាត់ បង្កើតក្រុមប្រឹក្សាកុមារ និងក្រុមប្រឹក្សាយុវជន និងបង្កើតក្រុមប្រឹក្សាវិន័យ ដើម្បីផ្តល់ការលើកទឹកចិត្តឬដាក់ទណ្ឌកម្មខាងវិន័យដល់អ្នកសិក្សា ដែលអនុវត្តល្មើសបទបញ្ជាផ្ទៃក្នុង ឬប្រាសចាកពីសីលធម៌។
សេចក្តីណែនាំដដែលនេះក៏តម្រូវឱ្យរាយការណ៍ពីសកម្មភាពមិនប្រក្រតី ឬបទល្មើស ដែលបានកើតឡើងក្នុងគ្រឹះស្ថានសិក្សាជូនការិយាល័យអប់រំ យុវជន និងកីឡា នៃរដ្ឋបាលក្រុង ស្រុក ខណ្ឌ និងមន្ទីរអប់រំយុវជន និងកីឡារាជធានី ខេត្ត ចាត់វិធានការរដ្ឋបាល និងអាចដាក់ទណ្ឌកម្មឈានដល់ការលុបឈ្មោះចេញពីសាលារៀន និងអនុវត្តវិធានការតាមផ្លូវច្បាប់ចំពោះករណីក្មេងទំនើង។
សេចក្តីណែនាំនេះ ធ្វើឡើង ស្របពេលមានការចែករំលែកតាមបណ្តាញសង្គមជាបន្តបន្ទាប់អំពីករណីហិង្សាក្នុងចំណោមសិស្សានុសិស្ស ដែលក្នុងនោះមានចែករំលែកវីដេអូមួយកាលពីពាក់កណ្តាលខែមីនា ដែលបង្ហាញរូបភាពយុវតី ៣នាក់ បានប្រើហិង្សាលើសិស្សស្រីម្នាក់ទៀតដែលជាមិត្តរួមថ្នាក់។ កាលពីខែកុម្ភៈ ឆ្នាំ២០២៦ ក៏មានការចែករំលែកវីដេអូហិង្សាមួយករណីនៅសាលារៀនមួយក្នុងខេត្តព្រះសីហនុ ដែលក្នុងនោះ យុវសិស្សម្នាក់បានយកដំបងវាយក្បាលសិស្សប្រុសម្នាក់ទៀតបណ្តាលឱ្យរបួសក្បាលធ្ងន់ធ្ងរ។
លោកគ្រូបង្រៀនម្នាក់នៅសាលាបឋមសិក្សាមួយនៅស្រុកម៉ាឡៃ ខេត្តបន្ទាយមានជ័យ បានប្រាប់ Press Start Cambodia នៅថ្ងៃទី១៩ ខែមីនាថា សាលារបស់លោកកំពុងអនុវត្តតាមសេចក្តីណែនាំរបស់ក្រសួងអប់រំ ដូចជាការបង្កើតគណៈគ្រប់គ្រងថ្នាក់រៀនឱ្យមានប្រសិទ្ធភាព ដែលផ្សាភ្ជាប់រវាងសាលានិងអាណាព្យាបាលរបស់សិស្ស។ លោកបន្តថា ចំពោះការបង្កើតនេះដែរ គឺមានចាប់ពីថ្នាក់មត្តេយ្យដល់ថ្នាក់ទី ៦ ដើម្បីឱ្យការអប់រំក៏ដូចជាការបណ្តុះបណ្តាលមានប្រសិទ្ធិភាពនិងឆ្លើយតបទៅនឹងទស្សនៈវិស័យរបស់ក្រសួងអប់រំ។
លោកគ្រូបានមានប្រសាសន៍ថា៖ “យើងរៀបចំរួចរាល់ហើយ។ បច្ចុប្បន្ននេះ យើងកំពុងរៀបចំហេដ្ឋារចនាសម្ព័ន្ធបិទផ្សាយជាសាធារណៈ ដើម្បីឱ្យដឹងអំពីសមាសភាពក្នុងគណៈកម្មការគ្រប់គ្រងសាលារៀន ក៏ដូចជាតួនាទីរបស់ពួកគាត់ ”។
គ្រូបង្រៀនរូបនេះក៏បានសម្តែងការព្រួយបារម្ភផងដែរជុំវិញការធ្លាក់ចុះ នៃសិលធម៌ និងការកើនឡើងនូវក្មេងទំនើងនាពេលបច្ចុប្បន្ន បើធៀបនឹងពេលលោកនៅជាសិស្សអនុវិទ្យាល័យ ដោយលោកកត់សម្គាល់លើមូលហេតុ ២យ៉ាង គឺទី១ ការវិវឌ្ឍ នៃបច្ចេកវិទ្យា និងទី២ កត្តាអប់រំ។
លោកមានប្រសាសន៍ថា៖ “ក្មេងទំនើងមានការកើនឡើងគួរឱ្យចាប់អារម្មណ៍ ដោយសាកត្តា ទី១ គឺបញ្ហាសង្គមមានការវិវឌ្ឍទៅមុខកាន់តែលឿន បច្ចេកវិទ្យាដើរលឿនជាងសីលធម៌។ ទី២គឺ ការអប់រំនៅមានកម្រិត ដោយសាលារៀនមួយចំនួនកាត់បន្ថយវិន័យ និងការដាក់ទណ្ឌកម្មទៅលើសិស្ស” ។
លោកក៏បានអំពាវនាវទៅកាន់អាណាព្យាបាលសិស្សឱ្យចូលរួមសហការជាមួយសាលារៀនក៏ដូចជាអ្នកគ្រូ លោកគ្រូ នៅពេល ដែលមានបញ្ហាកើតឡើងជៀសវាងការទម្លាក់កំហុសឱ្យគ្នាទៅវិញទៅមក។
លោក សាន ម៉េងលី គ្រូបង្រៀននៅសាលាបឋមសិក្សាឈើទើនៅខេត្តកំពង់ចាម បានមានប្រសាសន៍ថា ខាងសាលារបស់លោកក៏កំពុងតែធ្វើតាមសេចក្តីណែនាំរបស់ក្រសួងអប់រំផងដែរ ហើយថា បញ្ហាក្មេងទំនើងនេះ គឺជាក្តីបារម្ភដ៏ធំរបស់គណៈគ្រប់គ្រងសាលា។
លោក ម៉េងលី បន្តថា កម្រិតសិស្សដែលពិបាកគ្រប់គ្រងខ្លាំងនោះ គឺកម្រិតអនុវិទ្យាល័យ ថ្នាក់ទី ៧ ៨ និងទី៩ ដែលលោកគ្រូអ្នកគ្រូតែងតែត្អូញត្អែរ អំឡុងពេលប្រជុំ អំពីផលពិបាក នៃការគ្រប់គ្រង។
លោកមានប្រសាសន៍ថា៖«លោកគ្រូអ្នកគ្រូខ្លះគាត់សម្រក់ទឹកភ្នែកដោយគាត់ថា ពិបាកក្នុងការអប់រំសិស្ស តែគាត់មិនបោះបង់ទេ គឺគាត់នៅតែមកបង្រៀនបំពេញកាតព្វកិច្ចរបស់គាត់ធម្មតា»។
គ្រូបង្រៀននៅខេត្តកំពង់ចាមរូបនេះក៏ទទូចឱ្យអាណាព្យាបាលសិស្សចូលរួមជួយពង្រឹងចរិយាសម្បត្តិ ឥរិយាបទរបស់សិស្ស ដោយមិនគួរចាំតែបន្ទោសគ្រូបង្រៀននោះទេ។
លោក ហោ សុខុម អាយុ៤៣ឆ្នាំ មុខរបរលក់បន្លែនៅផ្សារបឹងកេងកង ជាអាណាព្យាបាលមួយរូបបាននិយាយថា លោកមានការបារម្ភចំពោះកូនរៀនថ្នាក់ទី១១ ដែលកំពុងរស់នៅជាមួយជីដូន នៅស្រុកកំណើតខាងល្វាអែម ដោយខ្លាចសេពគប់មិត្តភក្តិមិនល្អ។
លោកនិយាយថា ៖ “បារម្ភដែរ បារម្ភពីកូនរៀននៅស្រុក។ ចឹងយើងអត់បាននៅជាមួយកូនទេ យើងឃើញ ចេះទូន្មានប្រាប់វា (កូន) ចេះតែតេសួររហូតខ្លាចវាដើទៅចំមិត្តភ័ក្តិហ្នឹង បារម្ភកូនដើរខុសផ្លូវ“ ។
អ្នកប្រកបរបររត់កង់បីនៅរាជធានីភ្នំពេញ លោក បៀវ ប៊ុនសេន វ័យ៤១ឆ្នាំ មានកូនប្រុសស្រី៣នាក់ក្នុងបន្ទុក ដែលកំពុងរស់នៅជាមួយគ្រួសារក្នុងខេត្តស្វាយរៀង ដែលជាស្រុកកំណើត បាននិយាយថា លោកត្រេកអរ និងសប្បាយចិត្ត នៅពេលដឹងថា ក្រសួងអប់រំបានចេញវិធានការណែនាំឱ្យតាមគ្រឹះស្ថានសិក្សាសាធារណៈពង្រឹងបទបញ្ជាផ្ទៃក្នុង និងសណ្ដាប់ធ្នាប់នៅតាមសាលារៀន ព្រោះមានកូនៗកំពុងរៀននៅសាលារៀនរដ្ឋ។ លោកបន្តថា កូនប្រុសបងអាយុ១២ឆ្នាំរៀននៅថ្នាក់ទី ៧ ហើយកូនស្រីអាយុ១០ឆ្នាំ រៀនថ្នាក់ទី៤ និងកូនប្រុសពៅអាយុ៨ឆ្នាំ រៀនថ្នាក់ទី២។
លោកនិយាយថា៖« មានថ្ងៃមួយគេបានប្រាប់ខ្ញុំថា កូនខ្ញុំត្រូវបានគេព័ទ្ធវាយ ខ្ញុំភ័យដែរព្រោះកូនខ្ញុំមិនដែលចេះទៅរករឿងគេទេ។ កូនខ្ញុំរៀនឆ្លាតជាប់លេខ ១ តាំងពីថ្នាក់ទីមួយដល់ទីប្រាំ ធ្វើឱ្យលោកគ្រូ អ្នកគ្រូស្រឡាញ់។ ចឹងហើយគេច្រណែនចេះតែព័ទ្ធវាយ ចឹងខ្ញុំបារម្ភដែរ”។
ដោយឡែក លោកបណ្ឌិត ឈត ប៊ុនថង អ្នកជំនាញទស្សនវិជ្ជា និងកិច្ចការសង្គមនៃរាជបណ្ឌិត្យសភាកម្ពុជា សន្និដ្ឋានជារួមថា បញ្ហាសិលធម៌និងករណីហិង្សានៅសាលា កើតឡើងបណ្តាលមកពីភាពចន្លោះប្រហោងមួយនៃការគ្រប់គ្រងក្នុងសាលា មកពីអាណាព្យាបាល បូករួមការសេពគប់ខុស និងបញ្ហាក្នុងមូលដ្ឋានមួយចំនួន ដែលធ្វើឱ្យក្មេងៗទាំងនោះ ងាយជួបជុំគ្នាធ្វើរឿងមិនសមគួរផ្សេងៗ។
លោកបណ្ឌិតមានប្រសាសន៍ថា៖« ការព្រួយបារម្ភរបស់សង្គម គឺថា តើធនធានមនុស្សប្រភេទបែបណា បើសិនក្មេងជំនាន់ក្រោយធ្លាក់ចុះនូវសីលធម៌ផ្សេងៗនៅក្នុងសាលារៀនទៅហើយនោះ»។
ទោះបីជាយ៉ាងណា លោកបណ្ឌិត ឈត ប៊ុនថង យល់ថា សេចក្តីណែនាំនេះ បង្ហាញថា ក្រសួងអប់រំយុវជន និងកីឡាកំពុងតាមដានករណីអំពើហិង្សាយ៉ាងយកចិត្តទុកដាក់និងឆ្លើយតបតាមស្ថានការណ៍ទាន់ពេលវេលា។
លោកបន្ថែមថា«ក្រសួងអប់រំ យុវជន និងកីឡាចេញសេចក្តីណែនាំឱ្យមានការយកចិត្តទុកដាក់អំពីបញ្ហាដែលកើតឡើងថ្មីៗ ជាពិសេសបានចង្អុលបង្ហាញឱ្យរៀបចំក្រុមការងារ ដើម្បីទប់ស្កាត់ករណីហិង្សាឬក៏ការធ្លាក់ចុះនូវការគោរពសីលធម៌នៅតាមសាលាបង្ហាញថា ក្រសួងអប់រំ យុវជន និងកីឡារួមចំណែកតាមដានទាំងរបាយការណ៍ និងតាមបណ្តាញសង្គមក្តី និងចាត់វិធានការភ្លាមៗឆ្លើយតបទៅតាមស្ថានការណ៍ ដែលកំពុងកើតឡើង»។
Press Start Cambodia មិនអាចសុំការអត្ថាធិប្បាយពីលោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡាបានទេ ដោយសារទូរស័ព្ទចូលពុំមានអ្នកទទួល៕
អត្ថបទដោយ៖ រ៉ា ជឺយ៉ាង និង ផុន លីហ្សា