ក្រុមហ៊ុន ម៉ូរីសុនកាក់ ដែលត្រូវបានតែងតាំងដោយធនាគារជាតិ នៃកម្ពុជា ជាអ្នកជម្រះបញ្ជីធនាគារព្រីនស៍ បានជូនដំណឹងឲ្យអ្នកដាក់ប្រាក់បញ្ញើរបស់ធនាគារ ព្រីនស៍ ទាំងអស់ទៅទទួលសំណងចាប់ពីថ្ងៃទី២៣ ខែមីនា ឆ្នាំ២០២៦នេះ តទៅ បន្ទាប់ពីអនុវត្តនីតិវិធីបំប្លែងទ្រព្យសកម្មរបស់ធនាគារព្រីនស៍។
យោងតាមសេចក្តីជូនដំណឹងចុះថ្ងៃទី១៩ ខែមីនា ឆ្នាំ២០២៦ របស់ក្រុមហ៊ុន ម៉ូរីសុនកាក់ អឹមខេអេ អឌីត-អឹខោនធីង ឯ.ក បានបញ្ជាក់ថា ការផ្តល់សំណងនឹងត្រូវធ្វើឡើងតាមមធ្យោបាយពីរ គឺទី១ ការផ្ទេរតាមគណនីធនាគារ សម្រាប់អ្នកដាក់ប្រាក់បញ្ញើ ដែលបានផ្តល់ព័ត៌មានគណនីធនាគារ និងទី២ ការផ្តល់សំណងដោយផ្ទាល់នៅការិយាល័យធនាគារ ព្រីនស៍ សម្រាប់អ្នកដាក់ប្រាក់បញ្ញើ ដែលពុំបានផ្តល់ព័ត៌មាន គណនីធនាគារក្នុងពាក្យស្នើសុំទាមទារសំណង។
កាលពីថ្ងៃទី១៨ ខែមីនា ឆ្នាំ២០២៦ លោក ជា សិរី ទេសាភិបាលធនាគារជាតិ នៃកម្ពុជា បានសុំការយោគយល់ពីអតិថិជនរបស់ធនាគារព្រីនស៍ និងធនាគារពាណិជ្ជផេនដា ខណៈពេល ដែលធនាគារជាតិ នៃកម្ពុជាកំពុងធ្វើការងារជាមួយក្រុមហ៊ុនជម្រះបញ្ជី ដើម្បីពន្លឿននិតិវិធី ដើម្បីបំប្លែងជាសាច់ប្រាក់សងជូនអតិថិជនវិញ។
សូមបញ្ជាក់ថា ធនាគារជាតិនៃកម្ពុជា បានសម្រេចផ្អាកមិនឱ្យធនាគារព្រីនស៍ផ្តល់សេវាធនាគារថ្មី រួមទាំងទទួលដាក់ប្រាក់បញ្ញើ និងផ្តល់ឥណទាន និងដាក់ស្ថិតនៅក្រោមការជម្រះបញ្ជី កាលពីថ្ងៃទី៨ ខែមករា ឆ្នាំ២០២៦ បន្ទាប់ពីលោក ចេន ហ្ស៊ី ម្ចាស់សម្ព័ន្ធក្រុមហ៊ុនព្រីនស៍គ្រុប និងបក្សពួក២នាក់ទៀត ត្រូវបានចាប់ខ្លួន តាមសំណើរបស់អាជ្ញាធរនៃប្រទេសចិន បន្ទាប់ពីអាមេរិក និងអង់គ្លេសរឹបអូសទ្រព្យសម្បត្តិ និងចោទប្រកាន់ថា ជាមេខ្លោងដ៏ធំក្នុងឧក្រិដ្ឋកម្មឆបោកអនឡាញនៅកម្ពុជា។
ស្រដៀងគ្នានេះដែរ កាលពីថ្ងៃទី ២០ ខែកុម្ភៈ ឆ្នាំ២០២៦ ធនាគារជាតិក៏បានសម្រេចដកហូតអាជ្ញាបណ្ណធនាគារផេនដា និងដាក់ឱ្យស្ថិតក្រោមការជម្រះបញ្ជីដោយក្រុមហ៊ុនម៉ូរីសុនកាក់នេះដូចគ្នា ដោយផ្នែកថា ស្ថានភាពហិរញ្ញវត្ថុនៃធនាគារនេះ បានធ្លាក់ចុះជាបន្ដបន្ទាប់ ដែលឈានទៅរកការមិនអាចឆ្លើយតបនឹងការបម្រើសេវាធនាគារបានទៀត៕