កម្ពុជាប្រកាសពីការរកឃើញការបង្កកំណើតផ្កាថ្មប៉ប្រះទឹកជាលើកទី៣ នៅតំបន់ប្រជុំកោះរ៉ុង និងជាលើកដំបូងនៅកោះសង្សារ នៃខេត្តព្រះសីហនុ និងប្រជុំកោះស្តេច នៃខេត្តកោះកុង បន្ទាប់ពីការសិក្សាស្រាវជ្រាវរយៈពេលបីថ្ងៃនៅក្នុងខែមីនា។
យោងតាមសេចក្តីប្រកាសព័ត៌មានរួមចុះថ្ងៃទី១៦ ខែមីនា ឆ្នាំ២០២៦ បានឱ្យដឹងថា ការសិក្សាមួយអំពីការបង្កកំណើតរបស់ផ្កាថ្មប៉ប្រះទឹក ត្រូវបានធ្វើឡើងរយៈពេលបីថ្ងៃចាប់ពីថ្ងៃទី៧ ដល់ថ្ងៃទី៩ ខែមីនា ឆ្នាំ២០២៦ ដោយមានការគាំទ្រពីក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន អង្គការសត្វព្រៃ និងរុក្ខជាតិ អង្គការគាំពារធនធានសមុទ្រ ព្រមទាំងមូលនិធិសង្សារ។
សេចក្តីប្រកាសព័ត៌មានរួមនេះបន្តថា ការសិក្សាស្រាវជ្រាវនេះ បានផ្តល់ជាមូលដ្ឋានទិន្នន័យវិទ្យាសាស្ត្រសំខាន់ៗ ដែលជួយឱ្យអ្នកស្រាវជ្រាវយល់អំពីវដ្តបន្តពូជរបស់ផ្កាថ្ម ការរស់ឡើងវិញនៃផ្កាថ្ម និងកំណត់កត្តា ដែលរួមចំណែកដល់ការគ្រប់គ្រងផ្កាថ្មប៉ប្រះទឹកប្រកបដោយប្រសិទ្ធភាព ហើយទិន្នន័យ ដែលប្រមូលបាននេះ ក៏ជាភស្តុតាងមូលដ្ឋានជាយុទ្ធសាស្ត្រក្នុងការអភិរក្សផ្កាថ្មប៉ប្រះទឹករយៈពេលវែង សម្រាប់ប្រយោជន៍ដល់ជីវៈចម្រុះ និងសហគមន៍ឆ្នេរសមុទ្រ ដែលពឹងលើផ្កាថ្មប៉ប្រះទឹកសម្រាប់ជាអាហារ និងជីវភាពរស់នៅ។
កញ្ញា Jun Cheng ជាប្រធានគ្រប់គ្រងជាន់ខ្ពស់ នៃកម្មវិធីអភិរក្សតំបន់ឆ្នេរ និងសមុទ្រប្រចាំអង្គការសត្វព្រៃ និងរុក្ខជាតិប្រចាំកម្ពុជា ត្រូវបានដកស្រង់សំដីនៅក្នុងសេចក្តីប្រកាសព័ត៌មានរួមនេះ ដោយមានប្រសាសន៍ថា ៖ “ការរកឃើញការបង្កកំណើតរបស់ផ្កាថ្ម រយៈពេលបីឆ្នាំជាប់ៗគ្នា គឺជាសញ្ញាដ៏ល្អមួយ ដែលបង្ហាញថា ផ្កាថ្មប៉ប្រះទឹកនៅក្នុងប្រទេសកម្ពុជានៅតែមានភាពធន់គួរឱ្យកត់សម្គាល់”។
លោក អ៊ាង សុផល្លែត រដ្ឋមន្ត្រីក្រសួងបរិស្ថានត្រូវបានដកស្រង់សំដីដោយលោកអះអាងថា ការរកឃើញនេះ បានបង្ហាញពីកិច្ចខិតខំប្រឹងប្រែងអភិរក្ស និងគ្រប់គ្រងជាបន្តបន្ទាប់នៅក្នុងតំបន់ការពារសមុទ្ររបស់កម្ពុជា។
លោកមានប្រសាសន៍ថា៖ “ការសហការរវាងរាជរដ្ឋាភិបាល អង្គការដៃគូ និងសហគមន៍មូលដ្ឋាន ពិតជាមានសារៈសំខាន់ណាស់ក្នុងការការពារធនធានជីវៈចម្រុះ និងសេវាកម្មប្រព័ន្ធអេកូឡូស៊ីឱ្យមានចីរភាពសម្រាប់មនុស្សគ្រប់ជំនាន់”។
ស្រដៀងគ្នានេះដែរលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក៏ត្រូវបានដកស្រង់សំដីនៅក្នុងសេចក្តីប្រកាសព័ត៌មានរួមនេះដែរថា លទ្ធផល ៣ឆ្នាំជាប់គ្នានេះ គឺជាសក្ខីភាពបង្ហាញថា សមុទ្រកម្ពុជាកំពុងមានសុខភាពល្អ និងជាជោគជ័យក្នុងការអនុវត្តវិធានការការពារធនធានជលផលរបស់កម្ពុជា។
លោកមានប្រសាសន៍ថា “យើងមិនមែនគ្រាន់តែមានគោលនយោបាយលើក្រដាសនោះទេ តែយើងមានលទ្ធផលជាក់ស្តែងនៅក្នុងសមុទ្រ។ ទោះបីជាយ៉ាងនេះក្តី យើងមិនត្រូវស្កប់ស្កល់នឹងលទ្ធផលថ្ងៃនេះ ត្រឹមប៉ុណ្ណោះទេ។ យើងនឹងខិតខំបន្ត ដើម្បីរក្សាលទ្ធផលនេះនៅឆ្នាំក្រោយៗទៀត”។
សេចក្តីប្រកាសព័ត៌មានរួមនេះ បានកត់សម្គាល់ផងដែរថា ផ្កាថ្មប៉ប្រះទឹក ដែលមានសុខភាពល្អ គឺមានសារៈសំខាន់ណាស់ ក្នុងការធានាបាននូវនិរន្តភាព នៃធនធានជលផល និងគាំទ្រដល់ជីវភាពរស់នៅរបស់សហគមន៍តាមតំបន់ឆ្នេរសមុទ្រ ហើយក្រុមការងារនឹងយកទិន្នន័យដែលប្រមូលបានទៅសិក្សាស្រាវជ្រាវបន្ថែម ដើម្បី រួមចំណែកដល់ការពង្រឹងការគ្រប់គ្រងធនធានសមុទ្រ និងធានាថា ជីវៈចម្រុះសមុទ្រនៅក្នុងប្រទេសកម្ពុជាឱ្យបន្តកើនឡើង៕