រដ្ឋាភិបាលកម្ពុជាសម្រេចបង្កើតតំបន់សេដ្ឋកិច្ចពិសេសថ្មីមួយនិងរដ្ឋបាលតំបន់សេដ្ឋកិច្ចពិសេសមួយនៅខេត្តកំពង់ស្ពឺនិងព្រះសីហនុ ដើម្បីគាំទ្រដល់គម្រោងវិនិយោគនិងអភិវឌ្ឍន៍។
យោងតាមអនុក្រឹតចុះថ្ងៃទី១១ ខែមីនា ឆ្នាំ២០២៦ បានឱ្យដឹងថា តំបន់សេដ្ឋកិច្ចពិសេសថ្មី ដែលមានឈ្មោះ “តំបន់សេដ្ឋកិច្ចពិសេស កាណាឌីយ៉ា ផ្លូវជាតិលេខ៥១” មានទំហំប្រមាណ៥១៨ ហិកតា ស្ថិតនៅឃុំសំបួរ ស្រុកសំរោងទងនិងនៅឃុំភ្នំតូច ស្រុកសាមគ្គីមុនីជ័យ ខេត្តកំពង់ស្ពឺ។
អនុក្រឹត្យដដែលនេះក៏បានបញ្ជាក់ថា រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងរដ្ឋមន្ត្រីគ្រប់ក្រសួង និងប្រធានគ្រប់ស្ថាប័ន ដែលពាក់ព័ន្ធ អភិបាល នៃគណៈអភិបាលខេត្តកំពង់ស្ពឺ ត្រូវទទួលបន្ទុកអនុវត្តអនុក្រឹត្យនេះ តាមភារកិច្ចរៀងៗខ្លួន។
នៅក្នុងអនុក្រឹត្យដាច់ដោយឡែកមួយទៀតចុះកាលបរិច្ឆេទដូចគ្នាបានឱ្យដឹងថា រដ្ឋាភិបាលកម្ពុជាសម្រេចបង្កើតរដ្ឋបាលតំបន់សេដ្ឋកិច្ចពិសេស ហ្រ្គេន បូកគោ ស្ថិតនៅភូមិព្រែកទាល់ និងភូមិព្រែកសង្កែ ឃុំទឹកថ្លា ស្រុកព្រៃនប់ ខេត្តព្រះសីហនុ។
អនុក្រឹត្យដដែលបន្តថា តំណាងក្រុមប្រឹក្សាអភិវឌ្ឍន៍កម្ពុជា/គណៈកម្មាធិការវិនិយោគកម្ពុជាជាប្រធាន តំណាងក្រសួងពាណិជ្ជកម្ម តំណាងក្រសួងការងារ និងបណ្តុះបណ្តាលវិជ្ជាជីវៈ តំណាងអគ្គនាយកដ្ឋានគយ និងរដ្ឋាករកម្ពុជា និងតំណាងសាលាខេត្តព្រះសីហនុ ជាសមាជិក។
រដ្ឋបាលតំបន់សេដ្ឋកិច្ចពិសេសនេះ មានភារកិច្ចសំខាន់ៗដូចជា ត្រួតពិនិត្យតាមមុខជំនាញ ត្រួតពិនិត្យការអនុវត្តការងាររបស់អ្នកអភិវឌ្ឍន៍តំបន់ និងអ្នកវិនិយោគក្នុងតំបន់លើរាល់សកម្មភាពនៅក្នុងតំបន់ ដោយផ្អែកតាមគោលការណ៍ដែលបានកំណត់ ពិនិត្យលើសំណើសុំចុះបញ្ជីវិនិយោគ ពិនិត្យផ្តល់ជូនការលើកទឹកចិត្ត ការចេញលិខិតអនុញ្ញាត អាជ្ញាបណ្ណ វិញ្ញាបនបត្របញ្ជាក់ដើមកំណើតទំនិញ ដែលបានស្នើឡើងដោយអ្នកវិនិយោគក្នុងតំបន់។
អនុក្រឹត្យនេះ បញ្ជាក់ទៀតថា រដ្ឋបាលតំបន់សេដ្ឋកិច្ចពិសេសនេះក៏នឹងត្រួតពិនិត្យការងារសកម្មភាពតាមមុខជំនាញនៅក្នុងតំបន់ សហការជាមួយអ្នកអភិវឌ្ឍន៍តំបន់ ដោះស្រាយការងារដែលស្ថិតក្នុងសមត្ថកិច្ចរបស់ខ្លួន សម្រួលរាល់បែបបទពាក់ព័ន្ធ ធ្វើរបាយការណ៍ការងារប្រចាំខែ ប្រចាំត្រីមាស ឆមាស និងឆ្នាំ និងធ្វើកិច្ចការផ្សេងៗទៀត ក្នុងការសម្របសម្រួលដោះស្រាយរាល់សំណើរបស់អ្នកវិនិយោគក្នុងតំបន់ ពាក់ព័ន្ធនឹងបណ្តាក្រសួង ស្ថាប័ននានារបស់រាជរដ្ឋាភិបាល។
អនុក្រឹត្យនេះបញ្ជាក់ផងដែរថា គ្រប់តំណាងក្រសួង ស្ថាប័ន ដែលបំពេញភារកិច្ចនៅក្នុងរដ្ឋបាលតំបន់សេដ្ឋកិច្ចពិសេស ហ្គ្រេន បូកគោ ត្រូវដំណើរការការងារទៅតាមនីតិវិធី នៃច្បាប់ និងបទប្បត្តិទាំងឡាយ នៃព្រះរាជាណាចក្រកម្ពុជា៕