កម្ពុជាចុះបញ្ជីគម្រោងវិនិយោគសរុបចំនួន ៤២ ក្នុងទំហំទុនសរុបប្រមាណ១៦៦ លានដុល្លារអាម៉េរិក នៅក្នុងខែកុម្ភៈ និងអាចបង្កើតការងារជាង២៤ពាន់កន្លែង។
យោងតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា ចេញនៅថ្ងៃទី១១ ខែមីនា ឆ្នាំ ២០២៦ បានឱ្យដឹងថា ក្នុងចំណោមគម្រោងវិនិយោគទាំង៤២នេះ មានគម្រោងចំនួន ១៨ ត្រូវបានចុះបញ្ជីដោយក្រុមប្រឹក្សាអភិវឌ្ឍន៍កម្ពុជា (ក.អ.ក.) រួមមាន ក្រៅតំបន់សេដ្ឋកិច្ចពិសេសចំនួន ៩គម្រោង និងក្នុងតំបន់សេដ្ឋកិច្ចពិសេសចំនួន ៩គម្រោង រីឯគម្រោងចំនួន ២៤ ត្រូវបានចុះបញ្ជីដោយអនុគណៈកម្មាធិការវិនិយោគរាជធានីខេត្ត (អ.គ.វ.រ.ខ.) ។
សេចក្ដីប្រកាសដដែលបានបញ្ជាក់ទៀតថា គម្រោងវិនិយោគ ដែលត្រូវ បានចុះបញ្ជីក្នុងខែកុម្ភៈ ឆ្នាំ២០២៦នេះ មានជាអាទិ៍ គម្រោងវិនិយោគបង្កើតរោងចក្រកាត់ដេរសម្លៀកបំពាក់ ស្បែកជើង និងកាបូប, ផលិតកេសកាតុងនិងផលិតផលពីក្រដាស, ផលិតគ្រឿងសង្ហារិមសម្រាប់ប្រើប្រាស់ក្នុងផ្ទះ, ផលិតសម្ភារបោះជំរំ, កែច្នៃសំណប៉ាហាំង, ផលិតក្តារបន្ទះ, ផលិតចំណៀរឈើ, កែច្នៃលោហធាតុ និងផលិតផលពីប្លាស្ទិក, ផលិតសារធាតុគីមី, ផលិតដើមណូអែល, ផលិតនិងផ្តុំដំឡើងក្បាលរ៉ូប៊ីណេ, ផលិតគ្រឿងបង្គំបន្ទះសូឡានិងគ្រឿងបង្គុំបរិក្ខារអគ្គិសនី។ល។
បន្ថែមពីនេះក្រុមប្រឹក្សាអភិវឌ្ឍន៍កម្ពុជាក៏បានបង្ហាញពីប្រភពវិនិយោគទុនឈានមុខក្នុងខែកុម្ភៈ ឆ្នាំ២០២៦នេះ ដែលក្នុងនោះរួមមានប្រទេសចិន ៨៥,២៨% កម្ពុជា ៦,១០% កោះ Somoa ៣,៣៥% សហរដ្ឋអាមេរិក ៣,០១% និងសិង្ហបុរី ២,២៦% ។
ទាក់ទិននឹងរបាយការណ៍វិនិយោគទុននេះដែរ គេសង្កេតឃើញថា ខេត្តកំពង់ស្ពឺមានចំនួនគម្រោងច្រើនជាងគេ ដែលក្នុងនោះមានរហូតដល់៩គម្រោងឡើងទៅ។ ចំណែកភ្នំពេញ ខេត្តកណ្កាល ខេត្តតាកែវ និងខេត្តព្រះសីហនុ មានចំនួនចន្លោះពី៥ទៅ៦គម្រោង និងចុងក្រោយគឺខេត្តកោះកុង ខេត្តកំពង់ឆ្នាំង ខេត្តស្វាយរៀងមានចំនួនចន្លោះពី១ទៅ៤គម្រោង។
គិតចាប់ពីខែមករា ដល់ខែកុម្ភៈ ឆ្នាំ២០២៦នេះ កម្ពុជាមានគម្រោងវិនិយោគសរុបចំនួន ១០៥ គម្រោង និងគិតជាទឹកប្រាក់សរុប ៩៦៦ លានដុល្លារអាមេរិក ដែលក្នុងនោះវិស័យហេដ្ឋារចនាសម្ព័ន្ធ និងផ្សេងៗមានចំនួន ៤៦៤លានដុល្លារ វិស័យកសិកម្មនិងកសិឧស្សាហកម្មមានចំនួន ៣លានដុល្លារ និងវិស័យឧស្សាហកម្មមានចំនួន ៥០០ លានដុល្លារ រុញច្រានឱ្យមានឱកាសការងាររហូតដល់ ៣៩ពាន់កន្លែង៕