ជនស៊ីវិលកម្ពុជា ៤នាក់ស្លាប់ ៩នាក់រងរបួស និងរាប់ពាន់នាក់ផ្សេងទៀតត្រូវបានជម្លៀសទៅតំបន់សុវត្ថិភាព បន្ទាប់ពីមានការផ្ទុះអាវុធជាថ្មីនៅតាមបណ្តោយព្រំដែនកម្ពុជា-ថៃ។
យោងតាមសារនៅលើទំព័រហ្វេសប៊ុករបស់លោក នេត្រ ភក្ត្រា រដ្ឋមន្ត្រីក្រសួងព័ត៌មាននៅរសៀលថ្ងៃច័ន្ទនេះដែលយោងតាមតួលេខបឋមពីខេត្តឧត្តរមានជ័យនិងព្រះវិហារបានឲ្យដឹងថា មានពលរដ្ឋ៤នាក់បានស្លាប់ ៩នាក់រងរបួសនិងច្រើនម៉ឺននាក់ទៀតបានជម្លៀសទៅកន្លែងសុវត្ថិភាព បន្ទាប់ពីកងទ័ពថៃបានបើកការវាយប្រហារប្រដាប់អាវុធមកលើកងកម្លាំងនិងជនស៊ីវិលកម្ពុជា។
ការផ្ទុះអាវុធនៅតាមបណ្តោយព្រំដែនកម្ពុជា-ថៃ បានចាប់ផ្តើមជាថ្មីនៅម៉ោងប្រមាណ ១៤:១៥នាទីកាលពីរសៀលថ្ងៃទី៧ ខែធ្នូ ឆ្នាំ២០២៥ បន្ទាប់ពីតាមចោទថា កងទ័ពថៃបានបើកការវាយប្រហារមកលើកងទ័ពកម្ពុជានិងជនស៊ីវិលនៅខេត្តព្រះវិហារនិងឧត្តរមានជ័យ ហើយបានបន្តដល់ភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នៅរសៀលថ្ងៃច័ន្ទនេះ។ នេះបើតាមការលើកឡើងរបស់លោកស្រី ម៉ាលី សុជាតា អ្នកនាំពាក្យក្រសួងការពារជាតិនៅក្នុងសេចក្តីប្រកាសព័ត៌មានមួយនៅថ្ងៃចន្ទនេះ។
ជុំវិញករណីផ្ទុះអាវុធជាថ្មីនៅតំបន់ព្រំដែននេះ ក្រសួងការពារជាតិកម្ពុជា និងស្ថាប័នពាក់ព័ន្ធនានា ក៏បានប្រកាសថ្កោលទោសយ៉ាងដាច់អហង្កានិងចាត់ទុកជាការឈ្លានពានយ៉ាងកម្រោលពីភាគីថៃមកលើអធិបតេយ្យ និងបូរណភាពទឹកដីរបស់កម្ពុជា ។ ប៉ុន្តែយោធាថៃបានបដិសេធ ហើយថា ការវាយប្រហារនេះ គឺជាការឆ្លើយតបចំពោះការវាយប្រហាររបស់កងទ័ពកម្ពុជាទៅលើកងទ័ពថៃកាលពីថ្ងៃអាទិត្យ។
ទោះបីជាយ៉ាងណា អតីតនាយករដ្ឋមន្ត្រី លោក ហ៊ុន សែន ដែលបច្ចុប្បន្នជាប្រធានព្រឹទ្ធសភា បានបង្ហោះសារនៅលើទំព័រហ្វេសប៊ុករបស់លោកនៅព្រឹកថ្ងៃច័ន្ទនេះ ដោយចាត់ទុកសកម្មភាពរបស់យោធាថៃថា មានចេតនាទាញកម្ពុជាឲ្យចូលក្នុងភ្លើងសង្គ្រាម ដើម្បីបំផ្លាញចោលបទឈប់បាញ់និងសេចក្តីថ្លែងការណ៍សន្តិភាពកម្ពុជា-ថៃ ដោយលោកបានអំពាវនាវឲ្យកងកម្លាំងជួរមុខរក្សាការអត់ធ្មត់។
លោកបានសរសេរថា “កម្លាំងជួរមុខទាំងអស់ត្រូវមានការអត់ធ្មត់ ព្រោះពួកឈ្លានពានកំពុងប្រើអាវុធគ្រប់ប្រភេទបាញ់មកលើយើងតាំងពីថ្ងៃម្សិល យប់ម៉ិញនិងព្រឹកនេះក្នុងគោលបំណងទាញយើងឲ្យតបត ដើម្បីបំផ្លាញចោលបទឈប់បាញ់និងសេចក្តីថ្លែងការណ៍សន្តិភាពកម្ពុជា-ថៃ។ […] បន្ទាត់ក្រហមដែលត្រូវតបតបានកំណត់រួចហើយ សូមមេបញ្ជាការគ្រប់ជាន់ថ្នាក់អប់រំបងប្អូននាយទាហានពលទាហានយល់ដឹងគ្រប់ៗគ្នា»។
លោកនាយករដ្ឋមន្ត្រី លោក ហ៊ុន ម៉ាណែត ក៏បានសរសេរសារនៅលើទំព័រហ្វេសប៊ុករបស់លោកនៅរសៀលថ្ងៃនេះផងដែរ ដោយអំពាវនាវឱ្យមានការរួមសាមគ្គីគ្នាក្នុងពេលវេលាដ៏លំបាកនេះ ដោយអះអាងថា លោកផ្ដោតសំខាន់ទៅលើការការពារប្រជាជន និងការការពារបូរណភាពទឹកដីក្នុងដែនអធិបតេយ្យរបស់កម្ពុជា។
លោកនាយករដ្ឋមន្ត្រីបានអំពាវនាវថា “សូមគ្រប់ក្រសួងស្ថាប័ន អជ្ញាធរគ្រប់លំដាក់ថ្នាក់ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋខ្មែរទាំងអស់ រួមសាមគ្គីគ្នា ដើម្បីបុព្វហេតុជាតិ មាតុភូមិក្នុងដំណាក់កាលដ៏លំបាកនេះ»។
លោក គឹម ចាន់បញ្ញា អភិបាលរងខេត្តព្រះវិហារ បានបញ្ជាក់នៅរសៀលថ្ងៃច័ន្ទនេះថា ការបើកការវាយប្រហារពីខាងភាគីថៃមកលើកម្ពុជា បានបណ្តាលឲ្យប្រជាពលរដ្ឋមួយរូបបាត់បង់ជីវិតនិងពីរនាក់ទៀតរងរបួសនៅក្នុងភូមិសាស្ត្រខេត្តព្រះវិហារ។
លោកបន្តថា គិតមកត្រឹមពេលនេះប្រជាពលរដ្ឋជាង១៤០០ គ្រួសារ សរុបប្រមាណជាង ៥០០០ នាក់ត្រូវបានជម្លៀសទៅកាន់តំបន់សុវត្ថិភាពហើយ ខណៈការផ្ទុះអាវុធនៅបន្តកើតមាននៅឡើយនៅភូមិសាស្ត្រខេត្តព្រះវិហារ ។
លោកបានថ្លែងថា “ ឥឡូវនេះ ប្រជាជនយើងកំពុងតែជម្លៀសជាបន្តបន្ទាប់តាមបាតុភាពជាក់ស្ដែង។ ស្ថានភាពនៅជួរមុខឯណោះនៅតែតានតឹងអញ្ចឹង តែខ្ញុំក្តោបអត់បានទេថា នៅចំណុចណាខ្លះទាល់តែទៅខាងការពារជាតិបានគេដឹងច្បាស់»។
ចំណែកលោក ពៅ បឿន មេភូមិព្រៃចាន់ ខេត្តបន្ទាយមានជ័យបានថ្លែងប្រាប់ Press Start Cambodia នៅរសៀលថ្ងៃច័ន្ទនេះថា ប្រជាពលរដ្ឋភូមិព្រៃចាន់ប្រមាណ ២៧៩ គ្រួសារត្រូវបានជម្លៀសចេញពីភូមិឋានរបស់ពួកគាត់ ទៅកាន់កន្លែងសុវត្ថិភាពនៅក្នុងវត្តចាន់ស៊ីសាមគ្គីរតនារាម ស្ថិតក្នុងភូមិកូបកើត ឃុំកូប ស្រុកអូរជ្រៅ ខេត្តបន្ទាយមានជ័យ។
លោកថា ប្រជាពលរដ្ឋភូមិព្រៃចាន់មានសុវត្ថិភាពទាំងអស់ មិនមានរបួសឬស្លាប់នោះទេ ខណៈស្ថានភាពហាក់ដូចជាមានការស្ងប់ស្ងាត់ ប៉ុន្តែលោកថា នៅភូមិជោគជ័យ គឺនៅតែបន្តមានភាពតានតឹងនៅឡើយ បើគិតមកត្រឹមរសៀលនេះ។
លោក ពៅ បឿន បានមានប្រសាសន៍ថា “នៅខាងនេះ អត់មានអ្នករបួសទេ។ ប្រជាពលរដ្ឋទាំងអស់បានភៀសខ្លួនទៅទីទួលសុវត្ថិភាពអស់ហើយតាំងពីព្រឹកមកម្ល៉េះ។ ភូមិជោគជ័យនៅតែបន្ត ប៉ុន្តែខាងព្រៃចាន់យើងនេះស្ងាត់ហើយ”។
លោក ប៉ា ចាន់រឿន ជាប្រធានវិទ្យាស្ថានកម្ពុជា ដើម្បីប្រជាធិបតេយ្យបានកត់សម្គាល់ថា នេះគឺជារឿងអកុសល ដែលថៃបន្តរំលោភបំពានលើកម្ពុជា ដោយប្រើប្រាស់កម្លាំងយោធាច្រើន ជាមួយនឹងគ្រឿងសព្វាវុធទំនើប ដែលនេះ បង្ហាញអំពីកង្វះឆន្ទះនិងការគោរពចំពោះកិច្ចព្រមព្រៀងដែលថៃបានចុះហត្ថលេខាកន្លងមក។
លោកបានបន្តថា ការប្រើប្រាស់អាវុធធុនធ្ងន់ដូចជាយន្តហោះចម្បាំង F16 ក្នុងការវាយប្រហារមកលើកកម្ពុជាដែលបណ្ដាលឲ្យប្រជាពលរដ្ឋបាត់បង់ជីវិតនិងរងរបួស ព្រមទាំងទ្រព្យសម្បត្តិត្រូវបានបំផ្លិចបំផ្លាញបែបនេះ ត្រូវបានមើលឃើញថា ជារឿងគួរឱ្យសង្វេគនិងអយុត្តិធម៌បំផុតសម្រាប់ប្រជាពលរដ្ឋកម្ពុជា។
លោក ប៉ា ចាន់រឿន មានប្រសាសន៍ថា៖ «សម្រាប់ថៃនេះ គឺជាគំរូអាក្រក់ក្នុងនាមជាសមាជិកអាស៊ានមួយរូប ដែលមិនគោរពតាមកិច្ចព្រមព្រៀងនិងច្បាប់អន្តរជាតិ ផ្ទុយទៅវិញជ្រើសយកច្បាប់ព្រៃក្នុងការវាយប្រហារនិងទន្ទ្រានមកលើប្រទេសកម្ពុជា»។
គួររំលឹកផងដែរថា កន្លងមក កម្ពុជា និងថៃ បានចុះហត្ថលេខាទៅលើកិច្ចព្រមព្រៀងចំនួនពីររួចមកហើយ ក្នុងនោះមានកិច្ចព្រមព្រៀងបទឈប់បាញ់ ដែលបានចូលជាធរមាននៅថ្ងៃទី២៨ ខែកក្កដា ឆ្នាំ២០២៥ និងកិច្ចព្រមព្រៀងសន្តិភាពដែលទើបតែចុះហត្ថលេខា កាលពីថ្ងៃទី២៦ ខែតុលា ឆ្នាំ២០២៥ នៅទីក្រុងកូឡាឡាំពួរ ប្រទេសម៉ាឡេស៊ី ដែលមាននាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម និងប្រធានាធិបតីសហរដ្ឋអាមេរិក លោក ដូណាល់ ត្រាំ ធ្វើជាសាក្សី៕