រដ្ឋមន្រ្តីក្រសួងមហាផ្ទៃ ណែនាំឱ្យសមត្ថកិច្ចសហការជាមួយវិស័យធនាគារ ដើម្បីទប់ស្កាត់ការឆបោកតាមទូរសព្ទ និងមធ្យោបាយទំនាក់ទំនងសង្គម ដែលជនល្មើសតម្រូវឱ្យមានការផ្ទេរប្រាក់តាមប្រព័ន្ធធនាគារ និងគ្រឹះស្ថានមីក្រូហិរញ្ញវត្ថុ ខណៈក្នុងរយៈពេលពីរខែចុងក្រោយ មានពាក្យបណ្ដឹង២០០ករណី និងទឹកប្រាក់ជាង៨០ម៉ឺនដុល្លារ បានបាត់ចេញពីគណនីធនាគាររបស់ជនរងគ្រោះ។
ថ្លែងក្នុងពិធីបិទសិក្ខាសាលាពិគ្រោះយោបល់ថ្នាក់ជាតិ លើសេចក្តីព្រាងផែនការយុទ្ធសាស្ត្រជាតិស្តីពីអត្តសញ្ញាណកម្ម ដំណាក់កាលទី២ (២០២៦-២០៣៥) នៅរាជធានីភ្នំពេញ កាលពីរសៀលថ្ងៃទី២៤ ខែវិច្ឆិកា រដ្ឋមន្រ្តីក្រសួងមហាផ្ទៃ លោក ស សុខា មានប្រសាសន៍ថា ការឆបោកតាមប្រព័ន្ធបច្ចេកវិទ្យាដែលឧក្រិដ្ឋបានបន្លំខ្លួនជាមន្រ្តីធនាគារ ឬអ្នកផ្ដល់សេវានានា ដើម្បីឱ្យពលរដ្ឋធ្វើការទូទាត់ប្រាក់តាមប្រព័ន្ធធនាគារ គឺតម្រូវឱ្យសមត្ថកិច្ចត្រូវមានកិច្ចសហការជាមួយវិស័យធនាគារ និងមីក្រូហិរញ្ញវត្ថុ ដើម្បីរួមគ្នាបង្ការទប់ស្កាត់ និងបង្ក្រាបបទល្មើសឆបោកតាមមធ្យោបាយទំនាក់ទំនងទូរសព្ទ និងបណ្ដាញទំនាក់ទំនងសង្គម។
លោកបន្ថែមថា កិច្ចសហការនេះ ធ្វើឡើងដើម្បីឱ្យសមត្ថកិច្ចអាចចាត់វិធានការបានទាន់ពេលវេលា បើទោះបីជាបទល្មើសនោះ កើតឡើងចំថ្ងៃសម្រាក ដែលធនាគារមិនធ្វើការក៏ដោយ។
លោកនិយាយថា៖ «យើងមិន access (មានភាពចូល) ក្នុងវិស័យឯកជនទេ ប៉ុន្តែយើងត្រូវប្រើដៃឯកជន ដើម្បីដោះស្រាយសម្រាប់ការងារនេះ។ នេះសម្រាប់អ្នកដាក់ពាក្យបណ្ដឹង ចុះអ្នកអត់ដាក់ពាក្យបណ្ដឹង។ មកដល់ម៉ោងនេះ ត្រឹមតែ២ខែយើងអស់ជាង៨០ម៉ឺន (ដុល្លារ) ហើយ ចឹងបើយើងព្រលែងទៅទៀត អនាគតអាចធំជាងនេះ ហើយអំពើឆបោកនេះពីមុនយើងឃើញថាតែងតែកើតឡើងលើជនបរទេស ឬនៅក្រៅប្រទេស ប៉ុន្តែអីឡូវនេះ ឈានដល់ខ្មែរបោកខ្មែរ»។
បើតាមលោក ស សុខា រូបភាពនៃការបន្លំបោកប្រាស់ទាំងនោះ មានដូចជា ការបន្លំខ្លួនធ្វើជាមន្ត្រីធនាគារ ឬស្ថាប័នមីក្រូហិរញ្ញវត្ថុ ដោយជនខិលខូចបានទំនាក់ទំនងទូរសព្ទទៅជនរងគ្រោះដោយបន្លំថា ទាក់ទងដើម្បីផ្ដល់រង្វាន់សំណាង ប៉ុន្តែបានតម្រូវឱ្យជនរងគ្រោះបង់ប្រាក់ជាមុន ករណីខ្លះទៀត ជនខិលខូច បានបន្លំបោកប្រាស់តាមរយៈការទិញលក់ទំនិញបញ្ចុះតម្លៃ ដោយតម្រូវឱ្យអតិថិជនជាជនរងគ្រោះ ផ្ញើប្រាក់ទៅខ្លួនជាមុន ប៉ុន្តែទីបំផុតបានទទួលប្រាក់ហើយក៏បិទផ្ដាច់ទំនាក់ទំនង ខណៈករណីខ្លះ ជនល្មើសបានបន្លំលួចចូលគណនីធនាគាររបស់ជនរងគ្រោះដើម្បីធ្វើសកម្មភាពដក ឬបង្វែរបញ្ជូនសាច់ប្រាក់ជាដើម។
ប្រជាពលរដ្ឋរស់នៅខេត្តកំពង់ឆ្នាំង លោក ស្ងួន ញឿន ឱ្យដឹងនៅថ្ងៃទី២៥ ខែវិច្ឆិកានេះថា លោកបានចាញ់បោកការឆបោកលក់ផលិតផលថោកៗតាមអនឡាញចំនួន៣លើក ក្នុងរយៈពេលប៉ុន្មានឆ្នាំចុងក្រោយនេះ ហើយបានផ្ទេរប្រាក់តាមរយៈប្រព័ន្ធវីងអស់ទឹកប្រាក់សរុបជាង៥០០ដុល្លារ។
ទន្ទឹងនឹងនេះ លោកថា នៅពេលថ្មីៗនេះ ក៏មានអ្នកទាក់ទងមកលោកតាមប្រព័ន្ធអនឡាញថា លោកបានឈ្នះរង្វាន់នេះរង្វាន់នោះ ហើយជនល្មើសបានតម្រូវឱ្យលោកបង់ប្រាក់មុនមួយចំនួនផងដែរជាថ្នូរនឹងការឈ្នះរង្វាន់នោះ។ លោកបន្ថែមថា ការចាញ់បោកទាំងបីលើកនេះ លោកគ្រាន់តែដាក់ពាក្យបណ្ដឹងផ្ទាល់មាត់ និងតាមទូរសព្ទទៅអាជ្ញាធរប៉ុណ្ណោះ។
លោកនិយាយថា៖ «ខ្ញុំសូមឱ្យរាជរដ្ឋាភិបាល ឬអាជ្ញាធរមន្រ្តីពាក់ព័ន្ធទាំងអស់ ទី១ បង្ហាញទីតាំងដាក់ពាក្យបណ្ដឹងតាមអនឡាញឱ្យច្បាស់លាស់។ សូមឱ្យមន្រ្តីសមត្ថកិច្ចដែលធ្វើការពាក់ព័ន្ធការឆបោកតាមអនឡាញហ្នឹង មេត្តាចាត់វិធានការជនល្មើសដែលបោកពលរដ្ឋតាមអនឡាញ ឱ្យបានឆាប់រហ័សដើម្បីកុំឱ្យពលរដ្ឋចាញ់បោកកាន់តែខ្លាំងឡើង»។
អ្នកនាំពាក្យសមាគមមីក្រូហិរញ្ញវត្ថុ លោក កាំង តុងងី មានប្រសាសន៍ថា មីក្រូហរិញ្ញវត្ថុបានត្រៀមខ្លួនជាស្រេច ក្នុងការសហការជាមួយអាជ្ញាធរ ដើម្បីទប់ស្កាត់បទល្មើសឆបោក។ លោកបន្ថែមថា សមាគមក៏បានអប់រំនិងក្រើនរំលឹកដល់អតិថិជនឱ្យមានការប្រុងប្រយ័ត្នផងដែរ។
លោកបានអះអាងថា ការឆបោកតាមរយៈការផ្ទេរប្រាក់តាមប្រព័ន្ធធនាគារនេះ លោកជឿថា អាចកើតឡើងច្រើនក្នុងវិស័យធនាគារ ដោយសារវិស័យមីក្រូហិរញ្ញវត្ថុមានតែ៤ស្ថាប័នប៉ុណ្ណោះក្នុងចំណោមជាង៨០ស្ថាប័ន ដែលមានគណនេយ្យទទួលប្រាក់ ខណៈគណនេយ្យប្រមាណ ២០លាន មានតែជាង២លានប៉ុណ្ណោះ ជាគណនេយ្យរបស់មីក្រូហរិញ្ញវត្ថុ។
លោកនិយាយថា៖ «សម្រាប់វិស័យមីក្រូហិរញ្ញវត្ថុកម្ពុជា យើងចូលរួមជាប្រចាំទៅលើកិច្ចការងារទាំងអស់ ដើម្បីធានាបានថា នៅពេលដែលមានបទឧក្រិដ្ឋកើតឡើង គឺយើងអាចចូលរួមទប់ស្កាត់ទាន់ពេលវេលា»។
ចំណែកអ្នកនាំពាក្យសមាគមធនាគារ លោក សុខ ចាន់ ថ្លែងយ៉ាងខ្លីថា លោកកំពុងធ្វើការសហការជាមួយសហការី ដើម្បីផ្ទៀងផ្ទាត់ព័ត៌មាននេះ។
កាលពីដើមឆ្នាំ២០២៤ អគ្គស្នងការនគរបាលជាតិ លោក ស ថេត បានគូសបញ្ជាក់ថា ប្រជាពលរដ្ឋដែលរងគ្រោះដោយសារបទល្មើសបច្ចេកវិទ្យាច្រើនជាងគេ មានអ្នករស់នៅខេត្តមណ្ឌលគិរី រតនគិរី សៀមរាប និងរាជធានីភ្នំពេញ។ បន្ថែមពីលើនេះ លោកបានអំពាវនាវដល់ពលរដ្ឋធ្វើការដាក់ពាក្យប្ដឹងឲ្យបានលឿន ក្នុងករណីរងការឆបោកពីឧក្រិដ្ឋជន តាមរយៈការដាក់ពាក្យបណ្ដឹងអនឡាញ(Hotline Scam)សម្រាប់ប្រឆាំងបទល្មើសបច្ចេកវិទ្យានេះ។
អគ្គស្នងការនគរបាលជាតិ លោក ស ថេត ថ្លែងថា៖ «ក្នុងយុគសម័យទំនើបនេះ ប្រជាពលរដ្ឋជាច្រើនបានធ្លាក់ក្នុងអន្ទាក់របស់ក្រុមឧក្រិដ្ឋជនតាមប្រព័ន្ធបច្ចេកវិទ្យា។ ដូច្នេះ អគ្គស្នងការដ្ឋាននគរបាលជាតិ បានបង្កើតក្រុមការងារនេះ(Hotline Scam)ឡើង ដោយបន្ថែមលើយន្ដការដែលមានស្រាប់ ដើម្បីជួយដល់ប្រជាពលរដ្ឋ»។
ចំណែក មន្រ្តីនគរបាលប្រឆាំងបទល្មើសបច្ចេកវិទ្យា បានឱ្យដឹងកាលពីអំឡុងខែវិច្ឆិកា ឆ្នាំ២០២៣ថា បទល្មើសបច្ចេកវិទ្យាមាន២ប្រភេទដែលបានកើតឡើងនៅកម្ពុជា ក្នុងនោះមាន បទល្មើសកម្រិតទាប (cyber enable crime) និងបទល្មើសកម្រិតខ្ពស់(High Tech crime)។
ប្រភពដដែលបញ្ជាក់ថា ជាទូទៅនៅប្រទេសកម្ពុជាត្រូវបានរកឃើញភាគច្រើន គឺបទល្មើសកម្រិតទាប ដូចជា ការឆបោកតាមទូរសព្ទដៃ (ខលមកថាឈ្នះរង្វាន់ជាដើម) ការគំរាមបង្ហោះរូបអាក្រាត ការលួចអត្តសញ្ញារបស់អ្នកប្រើប្រាស់ ការលក់រូបភាពអាសអាភាសកុមារលើអនឡាញ និងបទល្មើសដែលកំពុងកើតឡើងច្រើនជាងគេនោះគឺ លួងលោមស្នេហា (Roman scam)។
សមត្ថកិច្ចបញ្ជាក់ថា ចំពោះបទល្មើសកម្រិតខ្ពស់ ឧក្រិដ្ឋជនមានគ្នាច្រើននាក់មានអង្គការចាត់តាំង និងរចនាសម្ព័ន្ធច្បាស់លាស់ ព្រមទាំងប្រើប្រាស់ប្រព័ន្ធកុំព្យូទ័រមានបច្ចេកវិទ្យាខ្ពស់។
បទល្មើសបច្ចេកវិទ្យាកម្រិតខ្ពស់នេះ ឧក្រិដ្ឋជនបានប្រើប្រាស់ជាទម្រង់ច្រើនរួមមាន ការបន្លំខ្លួនជាភ្នាក់ងារធនាគារ និងការបង្កើតព័ត៌មានមិនពិតដែលគួរឱ្យចាប់អារម្មណ៍ រួចបញ្ចុះបញ្ចូលពលរដ្ឋឱ្យចុចតំណភ្ជាប់ក្លែងក្លាយ ហើយលួចយកព័ត៌មាន ឬឈានទៅដល់ការគ្រប់គ្រងគណនីធនាគារ៕