ដំណើរការប្រឡងសញ្ញាបត្រមធ្យមសិក្សាទុតិយភូមិបានបញ្ចប់ត្រឹមម៉ោង ១៦:៣០នាទី នៅរសៀលថ្ងៃសុក្រ ខណៈមានបេក្ខជនអវត្តមាន៥៩រូបបន្ថែមទៀត ដែលធ្វើឱ្យចំនួនបេក្ខជនអវត្តមានសរុបរយៈពេលពីរថ្ងៃនេះ កើនដល់១៨៧២នាក់ ចំណោមបេក្ខជនចុះឈ្មោះប្រឡងបាក់ឌុបសរុបចំនួន ១៤ ៦៧២០នាក់ នៅឆ្នាំនេះ។
ដំណើការប្រឡងសញ្ញាបត្រមធ្យមសិក្សាទុតិយភូមិរយៈពេលពីរថ្ងៃនេះ បានប្រព្រឹត្តទៅដោយរលូន មានភាពស្ងប់ស្ងាត់និងរបៀបរៀបរយល្អ ហើយថា បេក្ខជនគោរពបទប្បញ្ញត្តិនៃការប្រឡង ប្រឹងប្រែងធ្វើកិច្ចការតាមសមត្ថភាព ខណៈក្រសួងរកឃើញបេក្ខជនដែលបានប្រព្រឹត្តកំហុសឆ្លង ២ករណី និងគណៈមេប្រយោគនិងគណៈកម្មការនានាមានកំហុសឆ្គង ៥ករណី នេះបើយោងតាមសេចក្ដីប្រកាសព័ត៌មានចុះថ្ងៃទី២៩ ខែសីហា ឆ្នាំ២០២៥ របស់ក្រសួងអប់រំ យុវជន និងកីឡា។
សេចក្តីប្រកាសព័ត៌មានសរសេរថា “ជារួម ដំណើរការសំណេរ នៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨ សីហា ២០២៥ បានប្រព្រឹត្តទៅដោយគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាននិងស្របតាមគោលការណ៍ ‘អ្នកចេះ គឺជាប់’”។
ក្រសួងបញ្ជាក់បន្ថែមទៀតថា ក្នុងរយៈពេលពីរថ្ងៃនេះ បេក្ខជនអវត្តមានសរុបកើនដល់ ១៨៧២នាក់ (ស្រី ៧៥១នាក់) ស្មើនឹង១,២៧ភាគរយ នៃបេក្ខជនមកប្រឡងសរុប ក្នុងនោះបេក្ខជនស្វ័យរិនអវត្តមាន ១៥២២នាក់ (ស្រី ៥៨៦នាក់) និងបេក្ខជនចំណេះទូទៅអវត្តមាន ៣៥០នាក់ (ស្រី១៦៥នាក់)។ បេក្ខជនមានបញ្ហាសុខភាព២៦១ករណី ក្នុងនោះ ដាក់ប្រឡងដាច់ដោយឡែក៨៦ករណី។ បេក្ខជនមានជំងឺគ្រុនឈាម១៣ករណី និងគ្រោះថ្នាក់ចរាចរណ៍៦ករណី និងគណៈមេប្រយោគមានបញ្ហាសុខភាព៥៩ករណី ខណៈបេក្ខជនបោះបង់ការប្រឡងដោយសារបញ្ហាសុខភាព ៣ករណី។
លោកស្រី ឃួន វិច្ឆិកា អ្នកនាំពាក្យនៃក្រសួងអប់រំ យុវជន និងកីឡា មានប្រសាសន៍ថា ចំពោះករណីដែលជាកំហុសខុសឆ្គងនេះ នឹងត្រូវយកមកពិនិត្យដោយក្រសួងអប់រំ យុវជន និងកីឡា ដៃគូពាក់ព័ន្ធក្នុងដំណើរការប្រឡងនេះ ជាពិសេស គឺអង្គភាពប្រឆាំងអំពើពុករលួយនឹងមានការរៀបចំជាក្រុមប្រឹក្សាវិន័យដែលពិនិត្យសម្រេចទៅលើករណីទាំងអស់នេះ។
លោកស្រីមានប្រសាសន៍ថា «ក្នុងរយៈពេលជាង ១០ឆ្នាំចុងក្រោយនេះ ដំណើរការប្រឡងសញ្ញាបត្រមធ្យមសិក្សាទុតិយភូមិតែងតែប្រព្រឹត្តទៅតាមច្បាប់ យុត្តិធម៌ តម្លាភាព និងលទ្ធផលទទួលយកបាន”។
ការប្រឡងសញ្ញាបត្រមធ្យមសិក្សាទុតិយភូមិឆ្នាំនេះ ធ្វើឡើងនៅថ្ងៃទី២៨ និង២៩ ខែសីហា ដោយមានបេក្ខជនចុះឈ្មោះប្រឡងបាក់ឌុប សរុបចំនួន ១៤៦ ៧២០នាក់ ដែលថ្នាក់វិទ្យាសាស្រ្តមានចំនួន ៤០ ៦៧៨នាក់(ស្មើនឹង ២៧.៧២%) និងថ្នាក់វិទ្យាសាស្រ្តសង្គមចំនួន ១០៦ ០៤២ នាក់(ស្មើនឹង ៧២.២៨%)។
កាលពីថ្ងៃទី២២ ខែសីហា ឆ្នាំ២០២៥ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជននិងកីឡាបានអះអាងថា នៅឆ្នាំសិក្សាថ្មីនេះ ក្រសួងនឹងញែកសិស្សទៅតាមគន្លងថ្នាក់វិទ្យាសាស្ត្រ វិទ្យាសាស្ត្រសង្គម និងគន្លងវិជ្ជាជីវៈ ពីកម្រិតថ្នាក់ទី១០ ដល់ថ្នាក់ទី១២ ដើម្បីកាត់បង្កើនចំនួនសិស្សថ្នាក់វិទ្យាសាស្ត្រ៕
អត្ថបទដោយ ឃុត ពិសី