ជំនួបរវាងកីឡាករជើងខ្លាំងគុនខ្មែរ បឺត សង្ឃឹម និង សុខ ធី ដែលគ្រោងធ្វើនៅពាក់កណ្ដាលខែតុលាខាងមុខនេះ ត្រូវបានរំសាយ ដោយសារបញ្ហាសង្គ្រាមព្រំដែនកម្ពុជា-ថៃ។
លោក សេន ប៊ុនថេន ជាប្រធានក្លឹបប៉ែនកាក់គុនខ្មែរនិងជាគ្រូបង្វឹកកីឡាករ បឺត សង្ឃឹម បាននិយាយថា ស្ថានីយ៍ទូរទស្សន៍បាយ័នគ្រោងរៀបចំជំនួបផ្លូវការរវាង បឺត សង្ឃឹម និង សុខ ធីនៅខែតុលាមែន ដែលជាជំនួបដណ្តើមខ្សែក្រវាត់ មុនពេលផ្ទុះសង្រ្គាមព្រំដែនកម្ពុជា-ថៃ។
លោកគ្រូបន្តថា មកដល់ម៉ោងនេះ ជំនួបរបស់អ្នកទាំងពីរត្រូវបានរំសាយជាបណ្ដោះអាសន្ន ដោយសារបញ្ហាសង្គ្រាមរវាងកម្ពុជាថៃ។ ទោះបីជាយ៉ាងណា លោកថា ជំនួបរវាងអ្នកទាំងពីរ គឺមិនអាចជៀសផុតនោះឡើយ ហើយអាចនឹងជួបគ្នាជាផ្លូវការនៅថ្ងៃណាមួយ ជាមួយនឹងលក្ខខណ្ឌប្រកួតហ្គង់ធំ៥ទឹក។
លោក សេន ប៊ុនថេន និយាយថា “សម្រាប់ខ្ញុំ បើប៉ះគ្នាគិតថា ល្អមើល”។ លោកបន្តថា “បើគិតថា កូនសិស្ស [ខ្ញុំ] ចាញ់ ក៏[ខ្ញុំ] មិនដាក់ឱ្យប្រកួតដែរ”។
កីឡាករទាំងពីរ ត្រូវមជ្ឈដ្ឋានអ្នកគាំទ្រគុនខ្មែរចាត់ទុកជាប្រភេទកីឡាករក្បាច់ ហើយប្រសិនបើការប្រកួតរបស់កីឡាករទាំងពីរកើតឡើងមែន អាចចាត់ទុកថា ជាការប្រកួតដ៏អស្ចារ្យមួយនៅក្នុងពិភពប្រដាល់គុនខ្មែរ។
សុខ ធី ដែលមានរហ័ស្សនាមមនុស្សឈើ បានលើកឡើងថា លោកមិនទាន់ដឹងដំណឹងផ្លូវការណាមួយអំពីការប្រកួតរបស់លោក និង បឺត សង្ឃឹម ទេ តែមានគេទាក់ទងមកអ្នកគ្រប់គ្រងក្លឹបរបស់លោក ហើយថា មានការណាត់ឱ្យកីឡាករ បឺត សង្ឃឹម និងលោក ប្រកួតក្នុងប្រភេទទម្ងន់ ៥៩.៥ គីឡូក្រាម។ ទោះបីជាយ៉ាងណា សុខ ធី អះអាងថា បើមានការរៀបចំជាផ្លូវការណាមួយនោះ លោកអាចប្រកួតក្នុងប្រភេទទម្ងប់៦០គីឡូក្រាម តែបើប្រភេទគីឡូក្រោមនេះ លោកមិនអាចសម្រកបានទេ។ លោកបន្ថែមថា លោកបានត្រៀមខ្លួន និងហ្វឹកហាត់ប្រចាំថ្ងៃជាធម្មតា ឱ្យតែប្រាប់កាលបរិច្ឆេទនៃការប្រកួតឱ្យបានត្រឹមត្រូវ លោកមិនមានក្ដីកង្វល់អ្វីនោះឡើយ។
មនុស្សឈើ សុខ ធី និយាយថា៖ «ក្បាច់ស្រដៀងគ្នា តែខ្ញុំគិតថា អ្វីដែលខ្ញុំលើគាត់បន្តិច គឺរឿងបទពិសធន៍។ គាត់ល្អ! វាយបានទាំងពីរទម្រង់ វាយឆ្វេងក៏បាន វាយស្ដាំក៏បាន តែនៅមានចន្លោះខ្វះខាត»។
អ្នកលេងចិត្តសាស្ត្រ បឺត សង្ឃឹម បានលើកឡើងថា ការផ្គូរផ្គងនេះ បានដឹងឮទាំងសងខាង ហើយខាងស្ថានីយ៍ត្រៀមរៀបចំឱ្យប្រកួតជាផ្លូវការនៅពាក់កណ្ដាលខែតុលា ប៉ុន្តែថា បច្ចុប្បន្ន ជំនួបនេះត្រូវបានរំសាយវិញហើយ។ សង្ឃឹម បន្តថា បើមានការរៀបចំម្ដងទៀត ខ្លួននិងកីឡាករ សុខ ធី នឹងប្រកួតក្នុងប្រភេទទម្ងន់៦០គីឡូក្រាមក្នុងលក្ខណៈគុនខ្មែរហ្កង់ធំ៥ទឹក។
កីឡាករ បឺត សង្ឃឹម និយាយថា៖ « បើសុ្រកយើងសុខសប្បាយវិញ បើបានជួបគ្នាមែន ជំនួបនេះមិនអាចកំណត់បានថាចប់ទឹក ឬក៏សន្លប់នោះទេ ដូចបងប្អូនដឹងស្រាប់ហើយ កីឡាគិតថាចប់ទឹក បែរជាមិនចប់ទឹក កីឡាគិតថា មិនចប់ទឹក បែរជាចប់ទឹក»។
ពាក់ព័ន្ធនឹងបច្ចេកទេសនិងសមត្ថភាព បឺត សង្ឃឹម ទទួលស្គាល់ថា សុខ ធី ជាកីឡាករល្អគ្រប់គ្រឿង រឹង ធន់និងធ្ងន់ ប៉ុន្តែ សង្ឃឹម អះអាងថា បើនិយាយអំពីចន្លោះខ្វះខាតកីឡាករណាក៏មានដែរ គ្រាន់តែថា កំឡុងពេលប្រកួតនរណាជាអ្នករកឃើញចន្លោះខ្វះខាតមុន។
បើយោងតាម លោកគ្រូ សេន ប៊ុនថេន ថា ស្ថានីយ៍ទូរទស្សន៍បាយ័នអាចនឹងរៀបចំជំនួបរវាងកីឡាករទាំងពីរឡើងវិញ ក្រោយពីស្ថានភាពប្រទេសជាតិប្រសើរឡើង ដោយសារលោកគ្រូបានជាប់មាត់ជាប់សម្ដីជាមួយស្ថានីយ៍រួចហើយដែរ។
កម្ពុជានិងថៃបានទទួលយកបទឈប់បាញ់កាលពីថ្ងៃទី២៨ ខែកក្កដា នៅប្រទេសម៉ាឡេស៊ី បន្ទាប់ពីការប្រយុទ្ធគ្នាយ៉ាងខ្លាំងក្លា ដែលបានចាប់ផ្តើមកាលពីថ្ងៃទី២៤ ខែកក្កដា បន្ទាប់ពីមានភាពតានតឹងជុំវិញតំបន់ព្រំដែនមានជម្លោះ។ ពលរដ្ឋជាង ៣០.០០០០នាក់ បានភៀសខ្លួនពីផ្ទះសម្បែងនិងមានមនុស្សជាង៤០នាក់បានបាត់បង់ជីវិតដោយសារការវាយប្រយុទ្ធគ្នានេះ៕
អត្ថបទដោយ ឈឺន ឈន់