ពលរដ្ឋភៀសសឹក ២៦២នាក់បន្ថែមទៀត បានវិលត្រឡប់ទៅលំនៅឋានវិញ ធ្វើឱ្យចំនួនសរុបកើនដល់ជាង ៦ សែន ១ម៉ឺននាក់ ឬជាង៩៤ភាគរយ ក្នុងចំណោមពលរដ្ឋភៀសសឹកសរុបជាង ៦សែន ៤ម៉ឺននាក់ ខណៈពលរដ្ឋចំនួន ៣៦.៧២៣នាក់ទៀត (ស្រ្តី១៩.០៤៥នាក់ និង កុមារ ១២.២៧៤នាក់) ពុំទាន់អាចវិលទៅលំនៅឋានវិញ គិតត្រឹមម៉ោង ៦ព្រឹក ថ្ងៃទី១៤ ដល់ម៉ោង ៦ព្រឹក ថ្ងៃទី១៥ ខែមីនា ឆ្នាំ២០២៦។ នេះបើតាមសេចក្តីប្រកាសព័ត៌មានរបស់ក្រសួងមហាផ្ទៃចុះថ្ងៃទី១៥ ខែមីនា ឆ្នាំ២០២៦។
សេចក្តីប្រកាសព័ត៌មានបានបន្ថែមថា សាលារៀនសរុប១៣ និងមន្ទីរពេទ្យ/មណ្ឌលសុខភាពសរុប ៦កន្លែង បន្តផ្អាកដំណើរការនៅក្នុងខេត្តឧត្តរមានជ័យ និងខេត្តបន្ទាយមានជ័យ។ ខណៈខេត្តព្រះវិហារមានសាលារៀន៧កន្លែង និងមន្ទីរពេទ្យ/មណ្ឌលសុខភាព ២ នៅបន្តផ្អាក។ គិតចាប់ពីថ្ងៃទី៧ ខែធ្នូ ឆ្នាំ២០២៥ ការខូចខាតទ្រព្យ សម្បត្តិសាធារណៈ និងឯកជន ដោយសារជម្លោះកម្ពុជាថៃពុំទាន់មានរបាយការណ៍ថ្មីបន្ថែមលើករណីដែលក្រសួងបានកត់ត្រាទុកនៅឡើយទេ។
ក្រសួងមហាផ្ទៃ ប្រកាសគាំទ្រអំពីគោលជំហរដោះស្រាយបញ្ហាព្រំដែន ដ៏ច្បាស់លាស់របស់រាជរដ្ឋាភិបាល ដោយគោរព និងអនុវត្តយ៉ាង ម៉ឺងម៉ាត់តាមស្មារតី នៃសេចក្តីប្រកាសរួម ចុះថ្ងៃទី២៧ ខែធ្នូ ឆ្នាំ២០២៥ និងកិច្ចព្រមព្រៀងផ្សេងទៀត ដែលមានស្រាប់ ដើម្បីអនុញ្ញាតឱ្យគណៈកម្មការចម្រុះខណ្ឌសីមាព្រំដែនគោក (JBC) បានធ្វើការងារឱ្យឆាប់បំផុត ដោយមិនរង់ចាំរហូត ដល់ក្រោយពិធីបុណ្យចូលឆ្នាំថ្មីឡើយ។
សេចក្តីប្រកាសព័ត៌មានដដែលបន្តថា កម្ពុជាបានដាក់សំណើជាផ្លូវការ ទៅកាន់ភាគីថៃ ចំនួន៥លើក ដើម្បីចាត់បញ្ជូនក្រុមការងារចម្រុះចុះវាស់វែងព្រំដែនលើដីជាក់ស្តែង ខណៈភាគីថៃ បានពន្យារពេលម្តងហើយម្តងទៀត៕