ក្រសួងអប់រំគ្រោងអនុវត្តយន្តការបែកចែកគន្លងអប់រំសម្រាប់សិស្សបញ្ចប់ថ្នាក់មធ្យមសិក្សាបឋមភូមិនៅឆ្នាំក្រោយនេះ ដើម្បីកាត់បន្ថយគម្លាតរវាងសិស្សថ្នាក់វិទ្យាសាស្ត្រនិងសិស្សថ្នាក់វិទ្យាសាស្ត្រសង្គម។
ថ្លែងក្នុងសន្និសីទសារព័ត៌មានស្តីពីដំណើរការរៀបចំការប្រឡងសញ្ញាបត្រមធ្យមសិក្សាទុតិយភូមិកាលពីថ្ងៃទី២២ ខែសីហា ឆ្នាំ២០២៥ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជននិងកីឡាបានអះអាងថា នៅឆ្នាំសិក្សាថ្មីនេះ ក្រសួងអប់រំនឹងញែកសិស្សទៅតាមគន្លងថ្នាក់វិទ្យាសាស្ត្រ វិទ្យាសាស្ត្រសង្គម និងគន្លងវិជ្ជាជីវៈ ពីកម្រិតថ្នាក់ទី១០ដល់ថ្នាក់ទី១២ ហើយថា ការជ្រើសរើសជាកាតព្វកិច្ចតែម្តង។
លោកបន្ថែមថា ការញែកតាមគន្លងអប់រំទាំងបីខាងលើនេះ នឹងត្រូវអនុវត្តសាកល្បងនៅតាមសាលាមួយចំនួន ដោយពន្យល់ណែនាំឱ្យសិស្សស្គាល់និងដឹងពីសមត្ថភាពខ្លួនឯងក្នុងការជ្រើសរើសយកជំនាញ ដោយឈរលើមូលដ្ឋាន នៃពិន្ទុសញ្ញាបត្រមធ្យមសិក្សាបឋមភូមិ។
លោកមានប្រសាសន៍ថា “ចឹងសិស្សណា ដែលពូកែមុខវិជ្ជាវិទ្យាសាស្ត្រ យើងរុញឱ្យគាត់ទៅរៀនវិទ្យាសាស្ត្រ ហើយសិស្សណាដែលពូកែវិទ្យាសាស្ត្រសង្គ្រម ហើយខ្សោយវិទ្យាសាស្ត្រ ទៅរៀនថ្នាក់វិទ្យាសាស្ត្រសង្គម…ចឹងនេះ គឺជាការបន្តនូវការសម្រិតសម្រាំងបេក្ខជន ដើម្បីឱ្យអត្រាសិស្សដែលរៀនថ្នាក់វិទ្យាសាស្ត្រមានការកើនឡើង”។
លោក ហង់ជួន ណារ៉ុន បានរំឭកផងដែរថា កាលពីឆ្នាំ២០២៤កន្លងទៅនេះ សិស្ស៣០% ចាប់យកថ្នាក់វិទ្យាសាស្ត្រនិង៧០% ចាប់យកថ្នាក់វិទ្យាសាស្ត្រសង្គម ប៉ុន្តែលទ្ធផលបានបង្ហាញថា នៅក្នុងចំណោមសិស្សប្រឡងជាប់និទ្ទេស A សរុបជាង២០០០នាក់ មានសិស្សថ្នាក់វិទ្យាសាស្ត្ររហូតដល់ជាង៧០% ហើយថា ពួកគេជាសិស្សដែលមានគុណភាព ហើយអាចបន្តការសិក្សានូវជំនាញខាងផ្នែកវិទ្យាសាស្ត្របាន។
លោក បានមានប្រសាសន៍ថា៖“សិស្សថ្នាក់វិទ្យាសាស្រ្ត ថ្វីត្បិតតែ៣០% គឺសុទ្ធសឹងតែជាសិស្សពូកែដែលជាធនធានសម្រាប់កម្ពុជានៅពេលអនាគត”។
លោក រឹក រដ្ឋា ជាគ្រូបង្រៀនម្នាក់ នៃវិទ្យាល័យហ៊ុនសែនប៉េងហួតស្វាយតានាន់ ក្នុងខេត្តកំពង់ចាម បានលើកឡើងថា មានកត្តាជាច្រើនដែលនាំឱ្យសិស្សសម្រេចចិត្តជ្រើសយកថ្នាក់វិទ្យាសាស្ត្រសង្គមច្រើនជាងថ្នាក់វិទ្យាសាស្ត្រពិត គឺកត្តាទី១ ទំនោរទៅរកភាពងាយស្រួល ដោយសារសិស្សខ្លះគិតថា ថ្នាក់វិទ្យាសាស្ត្រពិតលំបាកច្រើនជាងមុខវិជ្ជាថ្នាក់វិទ្យាសាស្ត្រសង្គម ហើយទី២ ទាក់ទងនិងសមត្ថភាព និងចំណាប់អារម្មណ៍របស់សិស្សព្រោះនៅពេលសិស្សរៀនថ្នាក់វិទ្យាសាស្រ្តពិតទៅសមត្ថភាពមិនដល់ ក៏ត្រឡប់ទៅរៀនផ្នែកវិទ្យាសាស្រ្តសង្គមវិញ ហើយមួយផ្នែកទៀតក៏ដោយសារសិស្សមានបំណងប្រាថ្នារបស់ពួកគេ ចង់ធ្វើអ្វីនៅពេលអនាគត ទើបពួកគេយល់ថា គួរសិក្សាទៅលើមុខវិជ្ជាអ្វី។
លោកបន្ថែមថា ទី៣ កខ្វះខាតធនធានគ្រូបង្រៀនផ្នែកវិទ្យាសាស្រ្តពិតនៅតាមសាលាមួយចំនួន និងទី៤ ការជ្រើសរើសតាមគ្នា។
លោក រដ្ឋា មានប្រសាសន៍ថា៖ “ជាក់ស្តែងសិស្សមួយចំនួនដែលខ្ញុំបានបង្រៀន ដំបូងជ្រើសរើសយកមុខវិជ្ជា ថ្នាក់វិទ្យាសាស្ត្រពិត ប៉ុន្តែពេលដែលគាត់សិក្សាបានប្រហែល២ខែ គាត់មិនអាចរៀនទាន់គេ ទើបគាត់សម្រេចប្តូរទៅរៀនថ្នាក់វិទ្យាសាស្រ្តសង្គមវិញ ព្រោះមុខវិជ្ជាវិទ្យាសាស្រ្ត មានមុខវិជ្ជាដែលទាក់ទងនឹងមុខវិជ្ជាគិតលេខច្រើន ”។
សេង សុខហេង វ័យ១៩ឆ្នាំជាសិស្សថ្នាក់ទី១២ នៃវិទ្យាល័យប៊ុនរ៉ានីហ៊ុនសែនស្ពឺនៅខេត្តកំពង់ចាម បាននិយាយថា រូបគេជ្រើសរើសយកថ្នាក់វិទ្យាសាស្រ្តពិតដោយសារថា ចង់រៀនជំនាញពេទ្យ ហើយថ្នាក់វិទ្យាសាស្រ្តពិតត្រូវនិងជំនាញដែលខ្លួនកំពុងចង់រៀនបន្ត ម៉្យាងរូបគេក៏មិនពូកែខាងទន្ទេញមេរៀន។
សុខហេង បាននិយាយថា “មុខវិជ្ជាវិទ្យាសាស្រ្តពិតមានឱកាសទីផ្សារការងារច្រើន ហើយប្រទេសជាតិបច្ចុប្បន្នកំពុងត្រូវការអ្នកជំនាញទាក់ទងនិងផ្នែកវិទ្យាសាស្រ្តពិតនេះផងដែរ”។
សុខហេង បន្តថា នៅស្រុកចំការលើមានវិទ្យាល័យចំនួន៣ ហើយមានតែវិទ្យាល័យរបស់ខ្លួនមួយប៉ុណ្ណោះ ដែលមានសិស្សភាគច្រើនជ្រើសរើសយកថ្នាក់វិទ្យាសាស្ត្រពិត រីឯវិទ្យាល័យពីរផ្សេងទៀត ភាគច្រើនសិស្សជ្រើសរើសយកថ្នាក់សង្គម។
ស សីហា អាយុ ១៧ឆ្នាំ ជាសិស្សថ្នាក់ទី១២នៃវិទ្យាព្រែកស្លែង បាននិយាយថា រូបគេជ្រើសរើស វិទ្យាសាស្រ្តសង្គម ដោយមូលហេតុ សមត្ថភាពក្នុងការរៀនមានកម្រិត ហើយម៉្យាងរូបគេយល់ថា រៀនថ្នាក់វិទ្យាសាស្រ្តសង្គមចំណាយថវិកាតិចជាង ហើយត្រូវនឹងជំនាញការងារក្នុងក្ដីស្រមៃរបស់ខ្លួន។
សីហា បន្តថា៖ “ដោយសារគិតថា ខ្លួនឯងខ្សោយទៅលើមុខវិជ្ជាគណិតវិទ្យា ហើយមុខវិជ្ជាដ៏ទៃទៀតខ្លួននៅមានកម្រិតហើយត្រូវរៀនគួរច្រើនទៀតទើបជ្រើសរើសយកខាងសង្គម’’។
លោក សេក សុជាតិ អ្នកប្រឹក្សាយោបល់ផ្នែកផ្នត់គំនិត យល់ឃើញថា ចំពោះវិទ្យាសាស្រ្តសង្គមនិងវិទ្យាសាស្រ្តពិតសុទ្ធតែមានសារៈសំខាន់ដូចគ្នា តែអ្វីសំខាន់ជាងគេ គឺឱកាសនិងលទ្ធភាពសម្រាប់សិស្សម្នាក់ៗសម្រេចបាន ប៉ុន្តែប្រសិនជាតម្រូវការជាក់ស្តែងនៅក្នុងទីផ្សារបច្ចុប្បន្ន វិទ្យាសាស្រ្តពិត ការប្រើប្រាស់បច្ចេកវិទ្យាបានជ្រាបចូលទៅក្នុងវិទ្យាសាស្រ្តសង្គម គឺសប់ជ្រុងជ្រោយហើយ គ្រាន់តែវាមិនទូលំទូលាយនិងចែកដាច់។
យ៉ាងណាមិញ ប្រសិនបើខាងវិទ្យាសាស្រ្តសង្គមនៅតែបន្តកើនឡើងទៀត លោកយល់ថា រដ្ឋគួរមានគោលនយោបាយលើកទឹកចិត្តជំរុញឱ្យសិស្សងាកមកចាប់អារម្មណ៍ខាងវិទ្យាសាស្រ្តពិត។
លោក សុជាតិ មានប្រសាសន៍ថា៖ “រៀនធម្មតាមិនអាចកំណត់បានទេ ត្រូវមានគោលនយោបាយច្បាស់លាស់ពីរាជរដ្ជាភិបាលក្នុងការលើកទឹកចិត្តជំរុញអោយងាកមកមើលវិទ្យាសាស្រ្តពិត។ បើរដ្ជមិនមានគោលនយោបាយមួយ មិនម៉ត់ចត់ច្បាស់លាស់ទេ និន្នាការមិនទទួលបានជោគជ័យទេ”។
លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានឆ្លើយតបតាមតេឡេក្រាមថា ក្រសួងបានសិក្សាពីគន្លងអប់រំ ដោយក្នុងនោះមាន ៣គន្លង រួមមាន វិទ្យាសាស្ត្រ វិទ្យាសាស្ត្រសង្គម និងបច្ចេកទេស ដោយអនុវត្តចាប់ពីថ្នាក់ទី១០។ លោកស្រីបន្តថា ក្រសួងគ្រោងដាក់អនុវត្តនៅសាលារៀនចំនួន៤៨ សាលា ក្នុងឆ្នាំសិក្សា២០២៥-២០២៦ ខាងមុខនេះ។
គូសបញ្ជាក់ផងដែរថា ក្រសួងអប់រំយុវជន និងកីឡាបានប្រកាសថា ការប្រឡងសញ្ញាបត្រមធ្យមសិក្សាទុតិយភូមិឆ្នាំនេះ និងរៀបចំធ្វើឡើងនៅថ្ងៃទី២៨ ខែសីហា ដោយមានបេក្ខជន ដែលបានចុះឈ្មោះប្រឡងបាក់ឌុបសរុបចំនួន ១៤៦ ៧២០នាក់ ដែលថ្នាក់វិទ្យាសាស្រ្តមានចំនួន ៤០ ៦៧៨នាក់(ស្មើនឹង ២៧.៧២%) និងថ្នាក់វិទ្យាសាស្រ្តសង្គមចំនួន ១០៦ ០៤២ នាក់(ស្មើនឹង ៧២.២៨%)។ ខណៈកាលពីឆ្នាំ២០២៤ ចំនួនបេក្ខជនសរុបដែលបានចុះឈ្មោះប្រឡងបាក់ឌុបមានចំនួន ១៣៧.០៤០នាក់ ក្នុងនោះរួមមានថ្នាក់វិទ្យាសាស្ត្រ ៣៩.៣៥៨នាក់(ស្មើនឹង ២៨.៧២%) ថ្នាក់វិទ្យាសាស្ត្រសង្គម ៩៧.៦៨២នាក់(ស្មើនឹង ៧១.២៨%)។ ចំនួននេះបង្ហាញថា សិស្សដែលជ្រើសរើសថ្នាក់វិទ្យាសាស្រ្តមានចំនួនតិចនៅឡើយបើធៀបនិងថ្នាក់វិទ្យាសាស្រ្តសង្គម៕
អត្ថបទដោយ៖ ញ៉ឹប ពិសាល និង ភាព ម៉ារ៉ាឌី