ក្រុមហ៊ុនទឹកដោះគោ KOFI Co., Ltd រងការពិន័យអន្តរការណ៍ បន្ទាប់ពីរកឃើញបន្លំប្រើបាកូដកម្ពុជាបិទលើបាកូដថៃនៃសំបកវេចខ្ចប់ផលិតផលទឹកដោះគោរបស់ខ្លួន នេះបើយោងតាមមន្ត្រីជាន់ខ្ពស់ក្រសួងពាណិជ្ជកម្ម។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានអះអាងកាលពីចុងសប្តាហ៍មុនថា ក្រសួងពាណិជ្ជកម្មពិន័យអន្តរការណ៍កម្រិតធ្ងន់ធ្ងរបំផុត និងហាមឃាត់ការចរាចរណ៍ទឹកដោះគោម៉ាក Kofi នៅលើទីផ្សារ និងតម្រូវឱ្យក្រុមហ៊ុនធ្វើកិច្ចសន្យាឈប់ប្រព្រឹត្តកំហុសបន្តទៀត។ ទោះបីជាយ៉ាងណា លោកមិនបានបញ្ជាក់ពីទំហំទឹកប្រាក់ដែលត្រូវពិន័យលើក្រុមហ៊ុន KOFI Co., Ltd ទេ។
លោកមានប្រសាសន៍ថា៖ « លោកជំទាវ [ រដ្ឋមន្ត្រី ] បានបញ្ជាយ៉ាងម៉ឺងមាត់ទៅមន្រ្តី ក.ប.ប យើងឱ្យពិន័យអន្តរការណ៍ធ្ងន់ធ្ងរ ហើយធ្វើកិច្ចសន្យាកុំឱ្យមានក្រុមហ៊ុនប្រព្រឹត្តល្មើសបន្តទៀតជាលើកទី២ ឬបើសិនជាមានត្រូវអនុវត្តទៅតាមនិតីវិធីច្បាប់ »។
លោក សុវិជាតិ មានប្រសាសន៍ថា ការធ្វើបែបនេះ គឺប៉ះពាល់ដល់ទឹកចិត្តអ្នកប្រើប្រាស់ និងខុសឆ្គងជាមួយច្បាប់ស្តីពីកិច្ចការពារអ្នកប្រើប្រាស់ កិច្ចការប្រកួតប្រជែង និងការបង្ក្រាបការក្លែងបន្លំ ហើយករណីនេះ ក្រុមហ៊ុនមិនបង្ហាញពីសុចរិតភាពពេញលេញក្នុងការផ្ដល់ព័ត៌មានដល់អ្នកប្រើប្រាស់។
លោកបន្ថែមបន្តថា ក្រុមហ៊ុនក៏បានចេញលិខិតសុំអភ័យទោសចំពោះអ្នកប្រើប្រាស់ទំាងអស់ អំពីកំហុសឆ្គងរបស់ខ្លួន ហើយថា ការត្រួតពិនិត្យប្រភពដើមនៃទំនិញរកឃើញថា ទឹកដោះគោនេះមានប្រភពដើមមកពីប្រទេសម៉ាឡេស៊ី ដែលត្រូវបានទិញបន្តពីប្រភពនៅប្រទេសថៃ ជាអ្នកលក់ចែកចាយធំ ដូចនេះហើយបានជាមានបាកូដប្រទេសថៃ។
លោកបន្តថា៖«ក្រុមហ៊ុនមានការព្រួយបារម្មណ៍ ពីព្រោះទំនិញរបស់គាត់ទើបត្រឡប់មកដល់ ក៏មានបាតុភាពពីរឿងសង្រ្គាមនឹងទៅ ហើយគាត់ខ្លាចគេពហិការទំនិញថៃដោយផ្អែកលើបាកូដ គាត់ក៏បានរៀបចំជាបាកូដរបស់ខ្មែរ ដើម្បីយកទៅបិទ នេះជាកំហុសរបស់គាត់ ដែលក្រុមហ៊ុនបានសារពភាពកំហុសនេះ »។
កាលពីថ្ងៃទី១៧ ខែសីហា ឆ្នាំ២០២៥ ក្រសួងពាណិជ្ជកម្មបានប្រកាសថា មន្រ្តីនៃអគ្គនាយកដ្ឋាន ក.ប.ប. បានចុះទៅត្រួតពិនិត្យដល់ទីតាំងដាក់បង្ហាញលក់របស់ក្រុមហ៊ុន KOFI Co., Ltd ដែលស្ថិតនៅខណ្ឌចំការមន រាជធានីភ្នំពេញ ពិតជាឃើញមានការបន្លំបិតបាកូដកម្ពុជាមែន និងបានបន្តចុះទៅត្រួតពិនិត្យនៅទីតាំងឃ្លាំងស្តុកទុកផលិតផល នៅសង្កាត់បឹងត្របែក និងបានរកឃើញផលិតផលទឹកដោះគោម៉ាក Kofi សរុបទាំងអស់ចំនួន ២០៥កេស ក្នុងនោះបិតបាកូដកម្ពុជារួចមានចំនួន ១៤៤កេស និងមិនទាន់បិតមានចំនួន ៦១កេស និងបានពិនិត្យឯកសារពាក់ព័ន្ធ នៃការនាំចូលផលិតផលរបស់ក្រុមហ៊ុន។
ក្រោយរកឃើញការក្លែងបន្លំនេះ ក្រសួងពាណិជ្ជកម្មបានចាត់វិធានការបន្ទាន់ ដោយទុកពេលឱ្យក្រុមហ៊ុន២ថ្ងៃ ដើម្បីប្រមូលយកទំនិញដែលចែកចាយមកវិញ និងតម្រូវឱ្យបកស្ទីកឃ័របាកូដកម្ពុជាចេញទាំងអស់ ខណៈក្រសួងសន្យានឹងចាត់វិធានការបន្តស្របតាមនីតិវិធីដែលមានចែងក្នុងច្បាប់ និងបទប្បញ្ញត្តិជាធរមាន។
លោក គឹម មាសសុខសីហា អគ្គនាយកនៃអគ្គនាយកដ្ឋាន ក.ប.ប នៃក្រសួងពាណិជ្ជកម្ម បដិសេធមិនផ្ដល់ព័ត៌មានលម្អិតលើករណីនេះ ដោយបញ្ជាក់ថា លើសពីសមត្ថកិច្ចរបស់លោកដែលជាអ្នកបច្ចេកទេស និងបង្វែរសំណួរទៅលោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មវិញ។
លោកបន្តថា៖« ដោយសារបញ្ហាបាកូដនេះ ជារឿងធំផុតអ្នកបច្ចេកទេសដូចពួកខ្ញុំ សូមប្អូនជួយទាក់ទងសួរឯកឧត្តម ប៉ែន សុវិជាតិ អ្នកនាំពាក្យផ្លូវការរបស់ក្រសួងពាណិជ្ជកម្ម »។
លោក ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជា (CID) បង្ហាញការគាំទ្រចំពោះចំណាត់ការរបស់ក្រសួង ហើយថា ការក្លែងបាកូដនេះ មិនមែនជារឿងត្រឹមត្រូវទេ ក្រុមហ៊ុនគួរតែបង្ហាញភាពស្មោះត្រង់ ប្រសិនបើទំនិញរបស់ខ្លួននាំចូលមុនមានការផ្ទុះអាវុធកើតឡើងហើយការធ្វើពហិការបស់ប្រជាពលដ្ឋខ្មែរចំពោះផលិតផលឬសេវាកម្មរបស់ថៃជាសិទ្ធិនិងការសម្រេចចិត្តរបស់បុគ្គលម្នាក់ៗ ដូចនេះ ទុកឱ្យពួកគាត់ប្រើប្រាស់មនសិកាសម្រេចចិត្តខ្លួនគាត់។
លោកបន្តថា៖« ក្រុមហ៊ុនដែលលក់ផលិតផលថៃមិនត្រូវបិទបាំងអីទេ ប្រាប់ថា នេះជាផលិតផលដែលបាននាំចូលតាំងពីមុនសង្រ្គាម តាំងពីមុនមានការផ្ទុះអាវុធ។ …. និយាយប្រាប់តាមត្រង់ទៅ អ្នកណាត្រូវការទិញយកទៅប្រើបន្ត លក់បង្ហើយក៏លក់ទៅ បើសិនជាលក់មិនចេញទេ ក៏យកទៅច្នៃធ្វើអ្វីផ្សេងវិញទៅ ធ្វើមិចបើស្ថានភាពវាបែបនឹង »។
កម្ពុជា និងថៃបានទទួលយកបទឈប់បាញ់កាលពីថ្ងៃទី២៨ ខែកក្កដា នៅប្រទេសម៉ាឡេស៊ី បន្ទាប់ពីការប្រយុទ្ធគ្នាខ្លាំងក្លា ដែលបានចាប់ផ្តើមកាលពីថ្ងៃទី២៤ ខែកក្កដា បន្ទាប់ពីមានភាពតានតឹងជុំវិញតំបន់ព្រំដែនមានជម្លោះ។ ពលរដ្ឋជាង ៣០.០០០០នាក់ បានភៀសខ្លួនពីផ្ទះសម្បែង និងមានមនុស្សជាង៤០នាក់បានបាត់បង់ជីវិតដោយសារការវាយប្រយុទ្ធគ្នានេះ។
ជម្លោះប្រដាប់អាវុធនេះ បានធ្វើឱ្យមានការបំផុសនូវស្មារតីជាតិនិយនៅក្នុងចំណោមពលរដ្ឋកម្ពុជា ដោយអំពាវនាវឱ្យធ្វើពិហិការផលិតផលថៃកាន់តែខ្លាំងឡើង។ ជាមួយគ្នានេះដែរ ក្រុមហ៊ុន KOFI Co., Ltd រងនូវការរិះគន់នៅលើបណ្ដាញសង្គមជាច្រើន បន្ទាប់ពីត្រូវបានរកឃើញក្លែងបន្លំបាកូដកម្ពុជាលើបាកូដថៃ ក្នុងសំបកវេចខ្ចប់ទឹកដោះម៉ាក Kofi។
នៅថ្ងៃទី១៧ ខែសីហា ឆ្នាំ២០២៥ ក្រុមហ៊ុន KOFI Co., Ltd បានបង្ហោះសារ ដោយសុំអភ័យទោសជាសាធារណៈចំពោះកំហុសឆ្គងរបស់ខ្លួន និងសុំអភ័យទោសចំពោះអតិថជនជាសាធារណៈ ដែលធ្វើឲ្យប៉ះពាលអារម្មណ៍អ្នកគាំទ្រ ដោយទទួលស្គាល់កំហុសនិងទទួលខុសត្រូវពេញទំហឹង តាមចំណាត់ការរបស់អគ្គនាយកដ្ឋាន ក.ប.ប នៃក្រសួងពាណិជ្ជកម្ម និងបានបង្ហាញការសោកស្ដាយ ក្នុងនាមជាក្រុមហ៊ុនដែលផ្គត់ផ្គង់ផលិតផលប្រភេទនេះ។
គេហទំព័រ Press Start Cambodia មិនអាចទាក់ទងសុំការអត្ថាធិបប្បាយបន្ថែមពីអ្នកគ្រប់គ្រងក្រុមហ៊ុន KOFI Co., Ltd បានទេ ដោយអ្នកទទួលទូរស័ព្ទរបស់ក្រុមហ៊ុនម្នាក់បានអះអាងថា មិនទាន់អាចអត្ថធិប្បាយបាននៅឡើយ ប៉ុន្តែក្រុមហ៊ុនកំពុងអនុវត្តទៅតាមចំណាត់ការបន្ទាន់របស់អគ្គនាយកដ្ឋាន ក.ប.ប នៃក្រសួងពាណិជ្ជកម្មហើយ។
ប្រភពបន្តថា៖«ចាំខាងខ្ញុំទំនាក់នងទៅវិញ សុំពេលជជែកជាមួយអ្នកពាក់ព័ន្ធសិន..យើងបានអនុវត្តវិធានការតាមការណែនាំរួចហើយ » ។
អ្នកស្រី ស៊ិញ ហ៊ុយ ជាអ្នកប្រើទឹកដោះគោ Kofi បាននិយាយថា អ្នកស្រីមានការភ្ញាក់ផ្អើលនៅពេលក្រុមហ៊ុនធ្វើបែបនេះ ហើយការធ្វើបែបនេះ គឺជាការបោកប្រាស់ទំនុកចិត្តរបស់អតិជនខ្មែរទំាងស្រុងតែម្ដង។
អ្នកស្រីបញ្ជាក់ថា៖« នៅពេលមានបញ្ហានឹងកើតឡើង វាមានអារម្មណ៍ថា ខ្លួនឯងត្រូវបានគេបោកប្រាស់..យល់អារម្មណ៍នឹងអត់? គេបោកប្រាស់យើង បានន័យថា គេយកបាកូដរបស់ខ្មែរទៅបិទនៅលើបាកូដស៊ីនពីប្រទេសថៃនឹងមក ចឹងវាស្មើនឹងការបោកប្រាស់ទំនុកចិត្តហើយ» ៕
អត្ថបទដោយ យ៉ឹង នីម