លោកនាយករដ្ឋមន្ត្រី ហ៊ុន ម៉ាណែត បានប្រកាសថា រដ្ឋាភិបាលកំពុងរៀបចំច្បាប់ប្រឆាំងបទល្មើសឆបោកតាមប្រព័ន្ធបច្ចេកវិទ្យា ដែលនឹងកំណត់ការទទួលខុសត្រូវរបស់ម្ចាស់ទីតាំង និងអ្នកពាក់ព័ន្ធក្នុងសកម្មភាពឆបោកនេះផងដែរ។
ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០២៥ របស់អាជ្ញាធរជាតិប្រយុទ្ធប្រឆាំងគ្រឿងញៀនកាលពីថ្ងៃទី៦ ខែមីនា ឆ្នាំ២០២៦ លោកនាយករដ្ឋមន្រ្តី ហ៊ុន ម៉ាណែត មានប្រសាសន៍ថា បញ្ហាឆបោកអនឡាញនេះកើតឡើងគ្រប់កន្លែង មិនមែនជាបញ្ហារបស់កម្ពុជាតែម្នាក់ឯងនោះទេ ហើយកម្ពុជាត្រូវបានជនបរទេសប្រើប្រាស់ជាទីតាំង ដើម្បីប្រព្រឹត្តបទល្មើសឆបោកតាមអនឡាញ ដែលធ្វើឱ្យប៉ះពាល់ដល់មុខមាត់ប្រទេសកម្ពុជា។ ទោះបីជាយ៉ាងណា លោកទទួលស្គាល់ថា កម្ពុជាពិតជាមានបញ្ហានេះ ប៉ុន្តែក៏កំពុងបោសសម្អាតជាបន្តបន្ទាប់ រួមទាំងកំពុងរៀបចំច្បាប់ប្រឆាំងនឹងបទល្មើសឆបោកតាមអនឡាញនេះផងដែរ។
លោកមានប្រសាសន៍ថា៖ “មិនត្រឹមតែអនុវត្តប្រតិបត្តិការទេ ឥឡូវ យើងកំពុងតែរៀបចំច្បាប់ប្រឆាំងស្គេមអនឡាញ (scam online) ។ ច្បាប់នេះ នឹងចងកាតព្វកិច្ចមួយចំនួន។ ម្ចាស់ទីតាំងក៏ទទួលខុសត្រូវដែរ ”។
លោកបានរំឭកថា ការបង្ក្រាបបទល្មើសឆបោកតាមអនឡាននេះ មិនមែនជារឿងថ្មីទេ ហើយថា រដ្ឋាភិបាលបានខិតខំធ្វើតាំងពីចុងអាណត្តិមុនមកម៉្លេះ ហើយនឹងប្តេជ្ញាចិត្តធ្វើបន្តទៀត ដោយលោកអំពាវនាវឱ្យមានការចូលរួមពីស្ថាប័នពាក់ព័ន្ធនិងប្រជាពលរដ្ឋផងដែរ។
លោកមានប្រសាសន៍ថា “អ្វីខ្ញុំបញ្ជាក់ថ្ងៃនេះ គឺជាការប្តេជ្ញាចិត្តរបស់យើង។ នឹងអនុវត្តរហូតជាប្រចាំ ដើម្បីកុំឱ្យបញ្ហានេះ ប៉ះពាល់ទៅដល់មុខមាត់ប្រទេសរបស់យើង”។ លោកបន្តថា ៖ “មានការចូលរួមទាំងអស់ បើមិនចឹងទេ យើងអត់មាន ប្រសិទ្ធភាពនៅមានកម្រិតនិងនិរន្តរភាពមានកម្រិត”។
លោកមេធាវី សុក សំអឿន ទីប្រឹក្សាច្បាប់មេធាវីអមរិន្ទ មានប្រសាសន៍ថា ករណីឆបោកតាមអនឡាញ គឺអាចមានគ្រោះថ្នាក់ជាងការឆបោកធម្មតា ប៉ុន្តែយើងអត់មានច្បាប់ច្បាស់លាស់ហើយតុលាការក៏ចោទពីបទឆបោកធម្មតា ដែលបទល្មើសអាចមានត្រឹម ៦ខែ ទៅ ៣ឆ្នាំ ហើយថា ករណីខ្លះក៏មានការចាប់រាលដាលទូទៅពេក នៅពេលបង្ក្រាបតំបន់ណាមួយនោះ ដោយអ្នកដែលរស់នៅទីនោះ ឬស្នាក់នៅទីនោះទាំងប៉ុន្មាន គឺត្រូវក្តោបយកទាំងអស់ក៏មាន ដែលជាការមិនយុត្តិធម៌នោះទេ។
លោកមានប្រសាសន៍ថា ៖” ជាការល្អហើយ ដែលរាជរដ្ឋាភិបាលចង់ឱ្យមានច្បាប់ [ប្រឆាំង] ឆបោកតាមអនឡាញ។ ព្រោះយើងសព្វថ្ងៃមានការពិបាកក្នុងការបង្រ្កាបបទល្មើសនេះណាស់ ដោយសារយើងមិនមានច្បាប់ចែងលម្អិតពីអំពើទាំងនេះ”។
លោកបន្តថា ដូចនេះ ប្រសិនបើមានច្បាប់ចែងឱ្យច្បាស់ថា តើសកម្មភាពអ្វីខ្លះទៅដែលជាបទឆបោកតាមអនឡាញនោះ ទើបជាការផ្តល់យុត្តិធម៌និងអាចទទួលការសាទរទូទៅពីពលរដ្ឋ។
កញ្ញា យុន ផល អាយុ ២៣ឆ្នាំ ជានិស្សិតឆ្នាំទីបីផ្នែកប្រវត្តិវិទ្យា កំពុងសិក្សានៅរាជធានីភ្នំពេញប្រាប់ Press Start Cambodia ថា រឿងឆបោកតាមអនឡាញ គឺជារឿងដែលគួរឲ្យបារម្ភណាស់ ដោយសារបច្ចុប្បន្នបច្ចេកវិទ្យាទំនើប សូម្បីតែលុយកាក់ ព័ត៌មានរបស់យើងផ្ទាល់ខ្លួនក្នុងទូរស័ព្ទដៃ ក៏ត្រូវប្រុងប្រយ័ត្ននិងគួរបារម្ភដែរ ហើយការបង្កើតច្បាប់ជារឿងល្អប្រសើរ ព្រោះមានការកើនឡើង នៃករណីឆបោកតាមប្រព័ន្ធឌីជីថលច្រើន។
កញ្ញា យុន ផល និយាយថា ៖“វាជារឿងល្អដែរ គួរត្រូវបានធ្វើ ព្រោះឥឡូវគឺសម្បូរស្គេមណាស់”។
Press Start Cambodia ពុំអាចទាក់ទងសុំការពន្យល់បន្ថែមពីលោក សេង ឌីណា អ្នកនាំពាក្យក្រសួងយុត្តិធម៌បានទេ។ ខណៈលោក ជិន ម៉ាលីន រដ្ឋលេខាធិការក្រសួងយុត្តិធម៌បានបង្វែរសំណួរទៅអ្នកនាំពាក្យវិញ។
លោក ប៉ែន បូណា អ្នកនាំពាក្យរដ្ឋាភិបាល បានប្រាប់ Press Start Cambodia ថា វាពិតជាចាំបាច់ក្នុងការមានច្បាប់សម្រាប់អនុវត្តឱ្យមានប្រសិទ្ធិភាពនិងតម្លាភាព។
លោកមានប្រសាសន៍ថា ៖ “នៅក្នុងប្រទេសនីតិរដ្ឋ អ្វីៗត្រូវប្រព្រឹត្តទៅក្រោមច្បាប់ដើម្បីឱ្យការអនុវត្តមានប្រសិទ្ធភាព តម្លាភាព និងសង្គតភាព”។
គួររំឭកថា លោក ចេន ហ្ស៊ី ជាស្ថាបនិក និងជាប្រធានក្រុមហ៊ុន Prince Holding Group រួមជាមួយជនជាតិចិនពីរនាក់ទៀត គឺឈ្មោះ Xu Ji Liang និង Shao Ji Hui ត្រូវបានចាប់ខ្លួន និងធ្វើមាតុភូមិនិវត្តន៍ទៅកាន់ប្រទេសចិន ក្នុងប្រតិបត្តិការរួមគ្នាមួយកាលពីថ្ងៃទី៦ ខែមករា ឆ្នាំ២០២៦ ក្រោយសហរដ្ឋអាមេរិកបានការដាក់ទណ្ឌកម្មថា ក្រុមហ៊ុនព្រីនស៍ ជាអង្គការឧក្រិដ្ឋកម្មឆ្លងដែនដ៏ធំបំផុតមួយនៅអាស៊ី។
របាយការណ៍ឆ្នាំ២០២៣ របស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បានប៉ាន់ប្រមាណថា មានមនុស្សយ៉ាងតិច ១០០ ០០០នាក់មកពីប្រទេសជាច្រើនត្រូវបានបង្ខំឱ្យធ្វើការនៅក្នុងប្រតិបត្តិការឆបោកតាមអនឡាញនៅកម្ពុជាក្នុងឆ្នាំនោះ ដែលភាគច្រើនត្រូវបានគេចោទប្រកាន់ថា ដំណើរការដោយក្រុមឧក្រិដ្ឋជនជនជាតិចិន។ បណ្ដាញស្រដៀងគ្នានេះ បានរីករាលដាលពាសពេញអាស៊ីអាគ្នេយ៍ រួមទាំងប្រទេសមីយ៉ាន់ម៉ា និងឡាវ ដោយបានបោកប្រាស់ប្រាក់ពីជនរងគ្រោះនៅទូទាំងពិភពលោកប្រមាណពី១៨ ពាន់លានដុល្លារ ទៅ ៣៧ពាន់លានដុល្លារក្នុងមួយឆ្នាំ៕