តុលាការកំពូល បានបដិសេធសំណើសុំដោះលែងប្រធានសមាគមសម្ពន្ធនិសិ្សតបញ្ញវន្តខ្មែរ (KSILA) លោក កើត សារ៉ាយ ឱ្យមានសេរីភាព ខណៈសាច់ញាតិ និងសង្គមស៊ីវិល បង្ហាញការសោកស្តាយចំពោះការសម្រេចនេះ ដោយថាសកម្មភាពរបស់ប្រធានសមាគមរូបនេះ ធ្វើឡើងដើម្បីជួយពលរដ្ឋមានបញ្ហាដីធ្លី សង្គមជាតិ និងបរិស្ថាន។
តុលាការកំពូល បានបើកសវនាការលើសំណើសុំដោះលែង លោក កើត សារ៉ាយ កាលពីថ្ងៃទី៦ ខែតុលា ឆ្នាំ២០២៥ និងត្រូវប្រកាសសាលដីកា នៅថ្ងៃទី១៣ ខែតុលា ឆ្នាំ២០២៥នេះ។
អ្នកនាំពាក្យតុលាការកំពូល អ្នកស្រី ម៉ៅ ធីតា មានប្រសាសន៍ប្រាប់ Press Start Cambodia នៅរសៀលថ្ងៃទី១៣ ខែតុលា ឆ្នាំ២០២៥នេះថា តុលាការកំពូលបានចេញដីការតម្កល់សាលដីកាសាលាឧទ្ធរណ៍ភ្នំពេញទុកជាបានការដដែល ដែលបានបដិសេធសំណើសុំដោះលែង លោក កើត សារ៉ាយ ឱ្យមានសេរីភាព។ យ៉ាងណា អ្នកស្រី មិនបានបញ្ជាក់ពីមូលហេតុដែលតុលាការសម្រេចមិនដោះលែងលោក កើត សារ៉ាយ នេះទេ។
អ្នកស្រីថា៖ «ក្រុមប្រឹក្សាសម្រេចតម្កល់សាលដីការបស់សាលាឧទ្ទរណ៍»។
សាលាឧទ្ធរណ៍ បានបដិសេធសំណើសុំដោះលែងចំពោះ លោក សារ៉ាយ កាលពីខែកក្កដា ឆ្នាំ២០២៥។
បងស្រីបង្កើតរបស់លោក កើត សារ៉ាយ គឺអ្នកស្រី កើត យី វ័យ៣៥ឆ្នាំ បង្ហាញការសោកស្ដាយដែលតុលាការកំពូលបដិសេធសំណើដោះលែងប្អូនប្រុសគាត់ឱ្យមានសេរីភាព ដោយអ្នកស្រីអះអាងថា លោក សារ៉ាយ មិនបានប្រព្រឹត្តខុសដូចការចោទប្រកាន់នោះទេ ហើយសកម្មភាពដែលប្អូនរបស់គាត់បានធ្វើ គឺដើម្បីជួយប្រជាពលរដ្ឋរងគ្រោះ និងសង្គមជាតិតែប៉ុណ្ណោះ។
អ្នកស្រីថា៖ «ខ្ញុំក៏មានការសោកស្ដាយដែរ ខ្ញុំសង្ឃឹមថា សាលក្រមប្រកាសថ្ងៃនេះ នឹងឱ្យប្អូនខ្ញុំនៅក្រៅឃុំ ផ្ទុយទៅវិញសាលក្រមបានបដិសេធ ខ្ញុំមានការអស់សង្ឃឹម […] សុំឱ្យតុលាការឱ្យគាត់ស្នើឱ្យប្អូនខ្ញុំបាននៅក្រៅឃុំ ឱ្យគាត់មានសិទ្ធិសេរីភាព ឱ្យគាត់បានបន្តធ្វើការជួយសង្គមបន្តទៅទៀត»។
លោក កើត សារ៉ាយ ត្រូវបានសាលាដំបូងរាជធានីភ្នំពេញ សម្រេចផ្តន្ទាទោសដាក់ពន្ធនាគារ រយៈពេល ៤ឆ្នាំ និងបង្គាប់ឱ្យសងសំណងចំនួន ៥០០ដុល្លារអាមេរិក ឬ (២ ០០០ ០០០ រៀល) ក្រោមការចោទពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍ ឬបង្កភាពវឹកវរធ្ងន់ធ្ងរដល់សន្តិសុខសង្គម» តាមបញ្ញតិ្តមាត្រា៤៩៤ និង៤៩៥ នៃក្រមព្រហ្មទណ្ឌ កាលពីខែវិច្ឆិកា ឆ្នាំ២០២៤ បន្ទាប់ពីលោកបានបញ្ចេញមតិទាក់ទងនឹងបញ្ហាជម្លោះដីធ្លីមួយនៅឃុំស្រយង់ និងឃុំភ្នំត្បែងពីរ ស្រុកគូលែន ខេត្តព្រះវិហារ ។ លោកត្រូវបានសមត្ថកិច្ចចាប់ខ្លួន កាលពីដើមខែមេសា ឆ្នាំ២០២៤ នៅការិយាល័យសមាគមសម្ពន្ធនិសិ្សតបញ្ញវន្តខ្មែរ (KSILA) ក្នុងរាជធានីភ្នំពេញ។
ពលរដ្ឋនៅភូមិម្រេច ឃុំស្រយង់ ស្រុកគូលែន ខេត្តព្រះវិហារ ដែលមានជម្លោះដីធ្លីកាលពីឆ្នាំ២០២៤ សុំមិនបញ្ចេញឈ្មោះ បានលើកឡើងថា នេះជារឿងអយុត្តិធម៌ចំពោះលោក កើត សារ៉ាយ ដែលតុលាការបន្តឃុំខ្លួនគាត់។
ពលរដ្ឋរូបនេះអះអាងថា លោក កើត សារ៉ាយ ជាមនុស្សល្អ ព្រោះកាលពេលមានជម្លោះដីធ្លី ពលរដ្ឋត្រូវការជំនួយ ទើបលោក សារ៉ាយ ចុះទៅជួយ ហើយលោកមិនបានញុះញង់ពលរដ្ឋឱ្យបះបោរនោះទេ។
ពលរដ្ឋរូបនេះ និយាយថា៖ «គាត់រងអយុត្តិធម៌មែន ព្រោះគាត់ជួយសង្គមតើ គាត់ជួយប្រជាពលរដ្ឋដែលរងគ្រោះលំបាកពិតប្រាកដមែន ហើយដល់ពេលអ៊ីចឹងគេចោទ គេធ្វើបាបគាត់អ៊ីចឹងវាអយុត្តិធម៌សម្រាប់មនុស្សល្អណាស់ […] សំណូមពរឱ្យរាជរដ្ឋាភិបាលហ្នឹង បើយកដីធ្លីប្រជាជនអស់ហើយ កុំបាច់ធ្វើបាប លោកគ្រូ កើត សារ៉ាយ ទៀត ដោះលែងគាត់ទៅ ព្រោះរាល់ថ្ងៃនេះ ក៏មិនមានប្រគល់ដីធ្លីឱ្យប្រជាជនដែរ គេទទួលយកអស់ហើយ អ៊ីចឹងប្រជាជនអត់មានពីណាមួយទៅតវ៉ាអីទៀតទេរាល់ថ្ងៃនោះ»។
នាយកទទួលបន្ទុកការងារទូទៅនៃអង្គការការពារសិទ្ធិមនុស្សលីកាដូ លោក អំ សំអាត ដែលតាមដានសំណុំរឿងនេះ មានប្រសាសន៍ថា តុលាការកំពូល បានសម្រេចបដិសេធដោះលែង លោក កើត សារ៉ាយ ក្រោមហេតុផលថា រក្សាទុកជនជាប់ចោទ ដើម្បីឱ្យសាលាឧទ្ធរណ៍ដំណើរការតាមនីតិវិធី ស្របពេលសវនាការលើអង្គសេចក្តីរបស់លោក កើត សារ៉ាយ កំពុងស្ថិតក្នុងដៃសាលាឧទ្ធរណ៍។
ទោះយ៉ាងណា លោក អំ សំអាត យល់ថា ការងារ ក៏ដូចជាសកម្មភាពរបស់លោក កើត សារ៉ាយ នាពេលកន្លងមក ធ្វើឡើងដើម្បីការពារសិទ្ធិមនុស្ស បរិស្ថាន និងជួយស្វែងរកដំណោះស្រាយជូនប្រជាពលរដ្ឋរងគ្រោះដោយសារបញ្ហាដីធ្លីប៉ុណ្ណោះ ដែលគួរណាតុលាការពិចារណាក្នុងការដោះលែងរូបគាត់។
លោកបន្ថែមថា៖ «មិនគួរត្រូវបានបន្តឬក៏ផ្ដន្ទាទោសទៅលើ លោក កើត សារ៉ាយ នោះទេ ហើយសាលដីកានេះ ក៏វាជាសារមួយធ្វើឲ្យបាក់ទឹកចិត្ត និងស្មារតីដល់យុវជនដែលចង់ចូលរួមនៅក្នុងកិច្ចការពារបរិស្ថានធនធានធម្មជាតិសិទ្ធិមនុស្ស ក៏ដូចជាជួយប្រជាពលរដ្ឋរងគ្រោះដោយសារបញ្ហាដីធ្លី»។
គួររម្លឹកដែរថា លោក កើត សារ៉ាយ ក៏ធ្លាប់ត្រូវបានតុលាការផ្តន្ទាទោសដាក់ពន្ធនាគារម្ដងហើយ កាលពីថ្ងៃទី២៦ ខែតុលា ឆ្នាំ២០២១ ដោយពេលនោះសាលាដំបូងរាជធានីភ្នំពេញ បានកាត់ទោសលោកដាក់ពន្ធនាគាររយៈពេល ២០ខែ និងពិន័យជាប្រាក់ចំនួន ២លានរៀល ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម តែត្រូវអនុវត្តទោសក្នុងពន្ធនាគារចំនួន ១៤ខែ ខណៈទោសសេសសល់ត្រូវព្យួរសាកល្បងរយៈពេល២ឆ្នាំ៕