រដ្ឋបាលរាជធានីភ្នំពេញបានដាក់ចេញនូវវិធានការណែនាំមួយចំនួនដល់រដ្ឋបាលខណ្ឌ មន្ទីរអប់រំ មន្ទីរធម្មការនិងសាសនា មន្ទីរវប្បធម៌ ស្នងការដ្ឋានរាជធានីភ្នំពេញនិងស្ថាប័នពាក់ព័ន្ធផ្សេងទៀត ដើម្បីចូលរួមអបអរសាទរនិងរៀបចំទិវាសន្តិភាពអន្តរជាតិ លើកទី២៣ ថ្ងៃទី២១ ខែកញ្ញា ឆ្នាំ២០២៥ ប្រព្រឹត្តទៅដោយរលូន។
នៅក្នុងសេចក្តីណែនាំរបស់ខ្លួនចុះថ្ងៃទី២១ ខែសីហា ឆ្នាំ២០២៥ សាលារាជធានីភ្នំពេញបានណែនាំរដ្ឋបាលខណ្ឌទាំង១៤ រដ្ឋបាលសង្កាត់ទាំង១០៥ មន្ទីរ អង្គភាពជំនាញ គ្រឹះស្ថានសិក្សា រោងចក្រ សហគ្រាស ផ្សារ រមណីយដ្ឋាន មជ្ឈមណ្ឌលកម្សាន្ត និងមូលដ្ឋានទីតាំងអាជីវកម្មទាំងអស់នៅក្នុងរាជធានីភ្នំពេញ រៀបចំតុបតែងលម្អទង់ជាតិ ទង់សាសនា ទង់ព្រះមហាក្សត្រ ចងបដាពាក្យស្លោក អមដោយការរចនាភ្លើងពណ៌ បំផុសនិងលើកទឹកចិត្តមន្ត្រីរាជការ និងប្រជាពលរដ្ឋឱ្យយល់ដឹងទូលំទូលាយអំពីទិវាសន្តិភាពអន្តរជាតិ ២១ កញ្ញា ជាទិវាគ្មានអំពើហិង្សា និងបញ្ឈប់ការផ្ទុះអាវុធគ្រប់ប្រភេទ។
សាលារាជធានីភ្នំពេញក៏បានណែនាំដល់មន្ទីរអប់រំ និងមន្ទីរធម្មការនិងសាសនា មន្ទីរវប្បធម៌និងវិចិត្រសិល្បៈ ដូចជាត្រូវបំផុសលោកគ្រូ អ្នកគ្រូ និងសាស្ត្រាចារ្យពន្យល់ណែនាំដល់សិស្សានុសិស្ស និងណែនាំគ្រប់វត្តអារាមឱ្យតុបតែងលម្អទង់ជាតិ ទង់សាសនា ទង់ព្រះមហាក្សត្រ ចង់បដាផ្សេងនិងរៀបចំឱ្យមានកម្មវិធីសូត្រកំណាព្យនិងកម្មវិធីសម្តែងសិល្បៈនៅតាមរមណីយដ្ឋានទេសចរណ៍ ទីសាធារណៈនានាឬនៅតាមទីតាំងសមស្របណាមួយ។
សាលារាជធានីភ្នំពេញក៏បានណែនាំដល់មន្ទីរនិងស្ថាប័នពាក់ព័ន្ធមួយចំនួនទៀតរួមទាំងស្នងការដ្ឋាននគរបាលរាជធានីភ្នំពេញ កងរាជអាវុធហត្ថរាជធានីភ្នំពេញ អនុវត្តផែនការការពារសន្តិសុខ សុវត្ថិភាព សណ្តាប់ធ្នាប់សាធារណៈ និងរបៀបរៀបរយសង្គមឱ្យបានល្អប្រសើរ៕
អត្ថបទដោយ ស៊ន សោភា