ប្រជាពលរដ្ឋប្រមាណ ១០០នាក់ ដែលអះអាងថាបានចាញ់បោកក្រុមហ៊ុនពិភពដីមាស របស់អតីតឧកញ៉ា ហ៊ី គឹមហុង បាននាំគ្នាប្រមូលផ្តុំនៅមុខសាលាដំបូងរាជធានីភ្នំពេញ ស្នើឱ្យតុលាការពន្លឿននិតិវិធីក្នុងការស្វែងរកយុត្តិធម៌ជូនពួកគាត់ ខណៈពួកគាត់កំពុងជាប់បំណុលវ័ណ្ឌក និងជួបការលំបាកក្នុងជីវភាព។
ការស្នើនេះ បានធ្វើឡើងស្របពេលដែលសាលាដំបូងរាជធានីភ្នំពេញ បានបើកសវនាការលើសំណុំរឿង «គំរាមកំហែង» ដែលជាមានជនជាប់ចោទឈ្មោះ ហ៊ែល ស៊ីធីន និងឈ្មោះ រ៉ន ចាន់ថន ដែលពលរដ្ឋអះអាងថា ជាបក្ខពួករបស់អតីតឧកញ៉ា ហ៊ី គឹមហុង នៅថ្ងៃទី២១ ខែកក្កដា ឆ្នាំ២០២៥ ប៉ុន្តែក្នុងសវនាការនោះពុំមានវត្តមានជនជាប់ចោទនោះទេ។
អ្នកស្រី ម៉ៅ រ៉ានី អាយុ ៤៦ឆ្នាំ ជាប្រជាពលរដ្ឋមកពីស្រុកស្វាយទាប ខេត្តស្វាយរៀង ដែលអះអាងថាចាញ់បោកក្រុមហ៊ុនពិភពដីមាស បានថ្លែងនៅមុខសាលាដំបូងរាជធានីភ្នំពេញថា អ្នកស្រីបានខ្ចីបុលពីធនាគារចំនួន ៣ម៉ឺនដុល្លារ អំឡុងឆ្នាំ២០២០ ដើម្បីចូលរួមវិនិយោគទិញដីពីក្រុមហ៊ុនពិភពដីមាស អ៊ីនវេសមិន ឯ.ក ដោយក្រុមហ៊ុនសន្យាឱ្យការប្រាក់ចំនួន ៣% ប៉ុន្តែមកដល់ពេលនេះនៅពុំទាន់បានដី ឬប្រាក់តាមការសន្យាឡើយ។
ស្រ្តីដែលមានកូនពីរក្នុងបន្ទុករូបនេះ បានឱ្យដឹងទៀតថា ក្នុងរយៈពេលប្រមាណ ២ឆ្នាំមកនេះ គ្រួសាររបស់អ្នកស្រីត្រូវរស់នៅក្រោមសម្ពាធបំណុល ដោយមិនមានលុយបង់ធនាគារ ខណៈកូនៗត្រូវប្រឈមនឹងការបោះបង់ការសិក្សា ដែលធ្វើឱ្យស្ថានភាពគ្រួសារកាន់តែធ្លាក់ដុនដាបទៅៗ។
អ្នកស្រី ម៉ៅ រ៉ានី និយាយថា៖ «ខ្ញុំអត់មានលុយបង់ ប្រឈមធនាគារប្តឹង អញ្ចឹងរាល់ថ្ងៃកំពុងតែដាក់ដីលក់ គេប្តឹងឱ្យសងលុយគេតែខ្ញុំអត់លទ្ធភាព ព្រោះខ្ញុំជាស្រ្តីមេម៉ាយ មានកូន២នាក់។ កូនក៏បាត់បង់ការរៀនសូត្រដែរ[…] ខ្ញុំសង្ឃឹមទៅលើតុលាការហើយ បានជាខ្ញុំដាក់ពាក្យប្តឹង ខ្ញុំសង្ឃឹមទៅលើច្បាប់ ច្បាប់នឹងរកយុត្តិធម៌ឱ្យជនរងគ្រោះទាំងអស់គ្នា ព្រោះខ្ញុំជឿជាក់ថាតុលាការ មិនកាន់ជើងមនុស្សបោកប្រាស់ មិនកាន់ជើងមនុស្សខូចទេ។ ថ្ងៃនេះខ្ញុំមកនេះចង់បានតែភាពត្រឹមត្រូវ និងយុត្តិធម៌ទេ»។
ចំណែក អ្នកស្រី ហួន សុខនី អាយុ៣១ឆ្នាំ ជាប្រជាពលរដ្ឋមកពីស្រុកដងទង់ ខេត្តកំពត ប្រាប់អ្នកសារព័ត៌មាននៅមុខតុលាការថា កន្លងមក ក្រុមហ៊ុនពិភពដីមាស របស់អតីតឧកញ៉ា ហ៊ី គឹមហុង បានស្នើឱ្យពលរដ្ឋទុកពេលឱ្យពួកគេ ៣៦ខែ ឬ៣ឆ្នាំ ដើម្បីដោះស្រាយបញ្ហានេះ ប៉ុន្តែអ្នកស្រីនិងពលរដ្ឋផ្សេងទៀត មិនអាចទទួលយកបានទេ ព្រោះពួកគេបានរងគ្រោះ និងរកចាំយុត្តិធម៌អស់រយៈពេល២ឆ្នាំមកហើយ។
អ្នកស្រីបន្តថា ពួកគាត់កំពុងជួបបញ្ហាប្រឈមជាច្រើនក្នុងជីវភាព ជាពិសេសបញ្ហាបំណុលធនាគារ ដែលករណីនេះអ្នកស្រីបានស្នើដល់រាជរដ្ឋាភិបាល និងតុលាការ ជួយស្វែងរកដំណោះស្រាយ និងពន្លឿននិតិវិធីក្នុងការស្វែងរកយុត្តិធម៌សម្រាប់ពួកគាត់ និងចាត់ការទៅលើអ្នកប្រព្រឹត្តអំពើឆបោកពលរដ្ឋទៅតាមច្បាប់។
អ្នកស្រីបានថ្លែងថា៖ «ខ្ញុំបង់មួយខែ១លាន២០ម៉ឺនរៀល ទុក្ខលំបាកខ្លាំង សូម្បីគ្រួសារក៏អត់នៅជុំគ្នា កូនរៀនក៏មានបានផ្តល់លុយឱ្យកូនរៀនគ្រប់គ្រាន់ ជីវភាពការហូបចុកក៏ខ្វះខាត យើងពិបាកខ្លាំង ហើយធនាគារមករាល់ថ្ងៃ ពិបាក ពិបាកហ្នឹងថ្លែងប្រាប់ណាស់[…] យើងឈឺ ជួនណាអត់មានលុយមើលទេ សូម្បីតែកូនក៏អត់ដែរ ឈឺឡើងខ្ចីគេគ្រប់កន្លែង រាល់ថ្ងៃវេទនាមាំណាស់ ផ្ទះសម្បែងក៏គេមករឹបអូសដែរ បើអត់បង់ធនាគារ គឺធនាគារមករាល់ថ្ងៃម៉ង»។
ក្រៅពីប្រជាពលរដ្ឋមកពីខេត្តកំពត និងស្វាយរៀងនេះ ក៏មានពលរដ្ឋមកពីរាជធានីភ្នំពេញ ខេត្តកណ្តាល ពោធិ៍សាត់ និងព្រៃវែង ជាដើម ក៏បានមកប្រមូលផ្តុំទាមទាររកយុត្តិធម៌នៅមុខតុលាការផងដែរ។
លោក សេង ហាន់ អាយុ ៤២ឆ្នាំ ជាពលរដ្ឋរស់នៅរាជធានីភ្នំពេញ និងជាតំណាងពលរដ្ឋដែលរងគ្រោះដោយសារគម្រោងវិនិយោគដីនិងផ្ទះរបស់ក្រុមហ៊ុនពិភពដីមាស បានឱ្យដឹងថា គិតមកដល់បច្ចុប្បន្ននេះ មានពលរដ្ឋចំនួន ២៧នាក់ដែលបានស្លាប់ដោយសារគ្មានលុយព្យាបាលជំងឺ និងពលរដ្ឋរាប់ពាន់នាក់ផ្សេងទៀត កំពុងជួបបញ្ហាប្រឈមក្នុងជីវភាព និងជាប់បំណុលធនាគារ ដោយសារក្រុមហ៊ុនពិភពដីមាសនេះ ខណៈពលរដ្ឋមួយចំនួនក៏រងនូវការគំរាមកំហែង ពីបក្ខពួករបស់លោក ហ៊ី គឹមហុងផងដែរ។
លោកបន្តថា៖ «ក្នុងនាមខ្ញុំជាតំណាងប្រជាពលរដ្ឋ សំណូមពរធ្វើម៉េច ឱ្យតុលាការជួយដោះស្រាយឱ្យបានលឿនបំផុត ដែលអាចធ្វើបាន ដោយសាររាល់ថ្ងៃនេះ ទុក្ខលំបាកនោះលើសពីទុក្ខលំបាកហើយ និយាយលែងចេញហើយ គ្រាន់តែអ្នកស្លាប់កើនដល់២៧នាក់ហើយ អញ្ចឹងខ្ញុំសំណូមពរឱ្យតុលាការពន្លឿនដីកាជម្រះ ហើយដោះស្រាយលុយជូនប្រជាពលរដ្ឋឆាប់ៗ និងសូមតុលាការចាប់ឃាត់ខ្លួនគាត់ ហើយនឹងបក្សពួកគាត់ទាំងអស់ ដោយរឹបអូសទ្រព្យសម្បត្តិគាត់ទាំងអស់ ទាំងលោក ហ៊ី គឹមហុង ម្ចាស់ក្រុមហ៊ុនដីមាស ទាំងគូកនទាំងអស់ហ្នឹងរឹបអូសទ្រព្យសម្បត្តិទាំងអស់ ព្រោះទ្រព្យសម្បិត្តទាំងនោះជារបស់ប្រជាពលរដ្ឋទេ»។
តំណាងពលរដ្ឋរូបនេះ ឱ្យដឹងទៀតថា ក្រោយមានការគំរាមកំហែងពីសំណាក់បក្ខពួកលោក ហ៊ី គឹមហុង នោះពលរដ្ឋបានដាក់ពាក្យប្តឹងទៅលើបុគ្គលពីររូប ក្នុងនោះមានឈ្មោះ ហ៊ែល ស៊ីធីន និងឈ្មោះ រ៉ន ចាន់ថន ទៅកាន់សាលាដំបូងរាជធានីភ្នំពេញ កាលពីថ្ងៃទី២៧ ខែឧសភា ឆ្នាំ២០២៤ ពាក់ព័ន្ធនឹងបទ «គំរាមកំហែង» ដែលតុលាការបានលើកយកសំណុំរឿងនេះមកជំនុំជម្រះ នៅថ្ងៃទី២១ ខែកក្កដានេះ ប៉ុន្តែក្នុងសវនាការមិនមានវត្តមានជនជាប់ចោទនោះទេ។
លោក សេង ហាន់ បានឱ្យដឹងថា តុលាការនឹងប្រកាសសាលក្រមលើសំណុំរឿងនេះ នៅថ្ងៃទី៣០ ខែកក្កដា ឆ្នាំ២០២៥ ខាងមុខ។
បើតាមក្រុមប្រជាពលរដ្ឋ អ្នកដែលចាញ់បោកក្រុមហ៊ុនពិភពដីមាស មានប្រមាណ ៨០០០នាក់ បាត់បង់ថវិកាប្រមាណ ៤០០លានដុល្លារអាមេរិក។
អ្នកនាំពាក្យសាលាដំបូងរាជធានីភ្នំពេញ លោក សួស វិទ្យារ៉ាឌី បានឱ្យដឹងថា សំណុំរឿងដែលចៅក្រម លើកយកមកជំនុំជម្រះនៅថ្ងៃទី២១ ខែកក្កដានោះ ជាសំណុំរឿង គំរាមកំហែង ទៅលើជនរងគ្រោះដោយសារក្រុមហ៊ុនពិភពដីមាស ដោយបុគ្គល២រូប មិនមែនជាសំណុំរឿងពាក់ព័ន្ធនឹង លោក ហ៊ី គឹមហុង នោះឡើយ។
លោកថា៖ «ជនរងគ្រោះខាងដីមាសទេ អត់ពាក់ព័ន្ធជាមួយលោក គឹមហុង ហ្នឹងទេ សវនាការព្រឹកមិញ ហើយអ្នកដែលមកហ្នឹងមកតាម[ការកោះហៅ]ចូលសវនាការទេ […] ហើយចៅក្រមគាត់សម្រេចប្រកាសសាលក្រមនៅថ្ងៃទី៣០ ខែកក្កដា ឆ្នាំ២០២៥ នេះ»។
Press Start Cambodia មិនអាចសុំការអត្ថាធិប្បាយជុំវិញបញ្ហានេះ ពីអគ្គនាយកក្រុមហ៊ុនពិភពដីមាស លោក ហ៊ី គឹមហុង បានទេនៅថ្ងៃទី២១ ខែកក្កដានេះ ដោយទូរសព្ទចូលជាច្រើនដងពុំមានអ្នកទទួល។
មន្រ្តីអង្កេតជាន់ខ្ពស់នៃសមាគមការពារសិទ្ធិមនុស្ស អាដហុក(Adhoc) លោក យី សុខសាន្ត សង្កេតឃើញថា បច្ចុប្បន្ន មានករណីឆបោកកាន់តែច្រើនឡើងជុំវិញការទិញដីទិញផ្ទះនេះ ដែលករណីនេះ លោកអំពាវនាវដល់ប្រជាពលរដ្ឋបង្កើនការប្រុងប្រយ័ត្ន និងគិតពិចារណាឱ្យស៊ីជម្រៅមុននឹងទិញឬលក់អចលនទ្រព្យផ្សេងៗ។
លោកថា៖ «បច្ចុប្បន្ននេះ យើងមើលឃើញហើយគឺការឈរបោកច្រើនណាស់ មានទាំងបរទេសមានទាំងខ្មែរ ពាក់ព័ន្ធទៅនឹងការឆបោក ការទិញតែផ្ដល់ប្រាក់ដើម្បីថាឱ្យការប្រាក់ខ្ពស់ អញ្ចឹងឱ្យប្រជាពលរដ្ឋយើងពិចារណា មុននឹងធ្វើអ្វីមួយគួរតែពិចារណាដែរ កុំឱ្យផុងខ្លួនទៅលើការឆបោកពីសំណាក់ គេហៅថា ឧក្រិដ្ឋជនដែលឆបោក មិនថាតែយើងទិញផ្ទះទិញដីធ្លី ឬមួយក៏ការផ្តល់ការធានាដើម្បីឲ្យបានអ្វីមួយជាល្បិចកលនៃក្រុមជនឆបោក អញ្ចឹងប្រជាពលរដ្ឋយើងគួរតែមុននឹងធ្វើអ្វីមួយ គួរតែប្រឹក្សាយោបល់ ក៏ដូចជាជជែកជាមួយអាជ្ញាធរ ឬក៏អ្នកច្បាប់ ដើម្បីកុំឲ្យចាញ់បោកលើឧបាយកលរបស់អ្នកបោក»។
អគ្គនាយកក្រុមហ៊ុនពិភពដីមាស គឺអតីតឧកញ៉ា ហ៊ី គឹមហុង ត្រូវបានចាប់ខ្លួន កាលពីខែសីហា ឆ្នាំ២០២៣ ពីបទ ឆបោកពលរដ្ឋ តែប្រមាណ ៤ខែក្រោយមក ពោលគឺនៅខែវិច្ឆិកា ឆ្នាំ២០២៣ តុលាការបានសម្រេចដោះលែងវិញ ក្រោយសន្យារកលុយសងជនរងគ្រោះវិញ។
តែយ៉ាងណា បើតាមក្រុមប្រជាពលរដ្ឋ មកដល់ពេលនេះ គឺពួកគាត់នៅមិនទាន់ទទួលបានដំណោះស្រាយសមរម្យនៅឡើយទេ៕