ពលរដ្ឋខ្មែរម្នាក់ បានស្លាប់ និង៣នាក់ទៀត រងរបួស ដោយសារការបាញ់ប្រហារពីសំណាក់កងកម្លាំងយោធាថៃ នៅរសៀលថ្ងៃពុធនេះ ខណៈប្រជាពលរដ្ឋខ្មែរជាច្រើននាក់ កំពុងស្នាក់នៅក្នុងជម្រកកៅស៊ូតង់ក្នុងដែនអធិបតេយ្យកម្ពុជា ស្ថិតនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
អ្នកនាំពាក្យក្រសួងការពារជាតិកម្ពុជា លោកស្រី ម៉ាលី សុជាតា បានឱ្យដឹងនៅក្នុងហ្វេសប៊ុកក្រសួងការពារជាតិថា យោធាថៃបានបើកការបាញ់ប្រហារមកលើប្រជាពលរដ្ឋខ្មែរ នៅម៉ោងប្រមាណ ១៥:៥០នាទី និងម៉ោង ១៧:៥៤នាទីល្ងាច និងកំពុងបន្តបាញ់ប្រហារមកលើប្រជាពលរដ្ឋខ្មែរ មកទល់ពេលនេះ នៅក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលយោងតាមព័ត៌មានបឋមពីអាជ្ញាធរមូលដ្ឋាន បង្កការរបួសជនស៊ីវិលចំនួន ០៣រូប និងស្លាប់ម្នាក់។
លោកស្រីបន្តថា ការបើកការវាយប្រហារនេះ ធ្វើឡើងបន្ទាប់ពីយោធាថៃបានធ្វើសកម្មភាពបង្កហេតុជាច្រើនរាប់មិនអស់ច្រើនថ្ងៃមកហើយ ក្នុងចេតនាញុះញង់ដើម្បីនាំដល់ការប៉ះទង្គិចគ្នា ខណៈកម្ពុជា ប្រកាន់ខ្ជាប់បំផុតនូវការគោរព និងការអនុវត្តបទឈប់បាញ់ និងសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ រួមទាំង គោលការណ៍ដែលបានឯកភាពគ្នា រវាងភាគីកម្ពុជា-ថៃ ដោយឈរលើមូលដ្ឋាននៃការដោះស្រាយ រាល់បញ្ហាដោយសន្តិវិធី ត្រឹមត្រូវ និងស្រប តាមច្បាប់អន្តរជាតិ។
ជាមួយគ្នានេះដែរ ក្រសួងការពារជាតិកម្ពុជា ក៏បានចេញសេចក្ដីប្រកាសថ្កោលទោសចំពោះ សកម្មភាពរបស់យោធាថៃ ដែលបាញ់ប្រហារលើជនស៊ីវិលខ្មែរ ថាជាទង្វើអមនុស្សធម៌ សាហាវឃោរឃៅ ហើយជាការរំលោភបំពានលើកិច្ចព្រមព្រៀងសន្តិភាពរវាងកម្ពុជា-ថៃ ដែលបានចុះហត្ថលេខាកាលពីចុងខែតុលា នៅប្រទេសម៉ាឡេស៊ី។
ក្រសួងការពារជាតិកម្ពុជា អំពាវនាវឱ្យអន្តរជាតិថ្កោលទោសយ៉ាងម៉ឺងម៉ាត់ ចំពោះការរំលោភបំពានកិច្ចព្រមព្រៀងសន្តិភាពរវាងកម្ពុជា-ថៃ និងសកម្មភាពខុសច្បាប់របស់ថៃម្ដងហើយម្ដងទៀត និងទាមទារឱ្យថៃទទួលខុសត្រូវទាំងស្រុងចំពោះការរំលោភបំពាននេះ។
ក្រសួងការពារជាតិកម្ពុជា ក៏បានអំពាវនាវឱ្យថៃបញ្ឈប់រាល់អរិភាពជាបន្ទាន់ ដែលគំរាមកំហែងដល់សន្តិភាព និងស្ថិរភាពនៅក្នុងតំបន់។
ចំណែក លោកនាយករដ្ឋមន្រ្តី ហ៊ុន ម៉ាណែត នៅម៉ោងជាង៦ល្ងាចថ្ងៃពុធនេះ ក៏បានសរសេរលើទំព័រហ្វេសប៊ុករបស់លោក ដោយថ្កោលទោសចំពោះការប្រើហិង្សារបស់ភាគីថៃមកលើពលរដ្ឋស៊ីវិល ដែលបណ្ដាលឱ្យពលរដ្ឋខ្មែរម្នាក់ស្លាប់ និង០៣នាក់ទៀតរបួស។ លោកបន្តថា ទង្វើរបស់យោធាថៃ បានផ្ទុយទៅនឹងការឯកភាពគ្នាកន្លងមក ក្នុងការដោះស្រាយបញ្ហាព្រំដែនដោយសន្តិវិធី។
លោកបានសរសេរក្នុងសំណេរដើមថា៖ «ខ្ញុំសូមឱ្យភាគីថៃ បញ្ឈប់ជាបន្ទាន់នូវការប្រើប្រាស់កម្លាំងមកលើប្រជាពលរដ្ឋស៊ីវិលស្លូតត្រង់កម្ពុជា នៅភូមិព្រៃចាន់ ក៏ដូចជាការប្រើប្រាស់កម្លាំងក្នុងការដោះស្រាយបញ្ហាព្រំដែនរវាងប្រទេសទាំងពីរ»។
ជាមួយគ្នានេះ លោកនាយករដ្ឋមន្រ្តី ក៏ស្នើឱ្យមានការបើកការស៊ើបអង្កេតដោយឯករាជ្យ ជុំវិញ ហេតុការណ៍នេះ និងអំពាវនាវឱ្យមានការចូលរួមពីភាគីបរទេសដែលមានជំនាញ ដើម្បីស្វែងរកការពិត និងផ្តល់យុត្តិធម៌ជូនប្រជាពលរដ្ឋខ្មែរដែលរងគ្រោះ ដោយសារការបាញ់ប្រហារ។
ទន្ទឹងនឹងនេះ លោក ហ៊ុន ម៉ាណែត ក៏ប្រាប់ឱ្យអាជ្ញាធរ និងកងកម្លាំងទាំងអស់ ចាត់វិធានការជាបន្ទាន់ ក្នុងការការពារប្រជាពលរដ្ឋ ជាពិសេសគិតគូរលើសុវត្ថិភាព និងអាយុជីវិតរបស់ពួកគេឱ្យបាន។
Press Start Cambodia នៅមិនទាន់អាចសុំការអត្ថាធិប្បាយបន្ថែមជុំវិញហេតុការណ៍នេះ ពីអ្នកនាំពាក្យរដ្ឋបាលខេត្តបន្ទាយមានជ័យ លោក លី សុវណ្ណារិទ្ធ បានទេ ដោយទូរសព្ទចូលតែមិនមានអ្នកទទួល។
ចំណែក អ្នកវិភាគនយោបាយលោក មាស នី មានប្រសាសន៍ថា កម្ពុជាអាចប្រមូលភស្តុតាងដើម្បីប្ដឹងថៃទៅកាន់សហរដ្ឋអាមេរិក ជុំវិញការបំពានកិច្ចព្រមព្រៀងឈប់បាញ់ ដែលមានអាមេរិកជាសាក្សី។ យ៉ាងណា លោកថា ក្រោយមានប្រតិកម្មពីសហរដ្ឋអាមេរិក ហើយថៃនៅតែមិនអើពើ កម្ពុជាមានតែតស៊ូប្រយុទ្ធ ប្រសិនបើស្ថានការណ៍នៅតែបន្តបែបនេះ។
លោកថា៖ «ខ្ញុំគិតថា កម្ពុជាអាចមានភស្តុតាងគ្រប់គ្រាន់ ប្រសិនបើមានការផ្ទុះអាវុធ នៅប៉ុន្មានម៉ោងក្រោយនេះ យប់នេះ ឬព្រឹកស្អែក នៅតាមបណ្ដោយព្រំដែន គឺយើងមានមូលហេតុគ្រប់គ្រាន់ដើម្បីអះអាងថា ថៃជាអ្នកបំពានមកបាញ់លើជនស៊ីវិលយើងមុន។ ប្រសិនបើស្ថានភាពបែបនេះទៀត យើងមិនអើពើតបតទេ ខ្ញុំគិតថា ថៃនឹងគឃ្លើនដើម្បីធ្វើបាបយើងបន្តទៀត។
កាលពីថ្ងៃទី២៦ ខែតុលា ឆ្នាំ២០២៥ កម្ពុជានិងថៃបានចុះហត្ថលេខាលើកិច្ចព្រមព្រៀងសន្តិភាពនៅ ក្នុងអំឡុងពេលកិច្ចប្រជុំអាស៊ាននៅប្រទេសម៉ាឡេស៊ី ដោយមានប្រធានាធិបតីសហរដ្ឋអាមេរិក លោក ដូណាល់ ត្រាំ និងនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលជាប្រធានកិច្ចប្រជុំកំពូលអាស៊ានប្តូរវេន ធ្វើជាសាក្សី។
ក្នុងកិច្ចព្រមព្រៀងនោះ បានបញ្ជាក់ពីការដោះលែងទាហានខ្មែរ ចំនួន ១៨នាក់ ដែលភាគីថៃបានចាប់ឃុំខ្លួន ការដកហូតអាវុធធុនធ្ងន់ពីតំបន់ព្រំដែន និងការជួយសហការដោះស្រាយបញ្ហាមីនសល់ពីសង្គ្រាម ព្រមទាំងពង្រឹងសន្តិភាពតាមបណ្តោយព្រំដែន និងសហការក្នុងការដោះស្រាយជម្លោះដោយសន្តិភាព។
ប៉ុន្តែបន្ទាប់ពីមានហេតុការណ៍ទាហានថៃជាន់មីនរងរបួស កាលពីថ្ងៃទី១០ ខែវិច្ឆិកាថ្មីៗនេះ រដ្ឋាភិបាលថៃ បានប្រកាសផ្អាកការអនុវត្តតាមកិច្ចព្រមព្រៀងសន្តិភាពជាមួយកម្ពុជា និងបានចោទកម្ពុជាថា បានដាក់មីនថ្មីតាមបណ្តោយព្រំដែន។
យ៉ាងណា ភ្លាមៗនោះ ក្រសួងការពារជាតិ និងក្រសួងការបរទេសកម្ពុជា បានចេញសេចក្តីថ្លែងការណ៍ច្រានចោលការចោទប្រកាន់របស់ថៃ ដោយបញ្ជាក់ថា កម្ពុជា មិនដែលដាក់មីនថ្មីនៅតាមព្រំដែនឡើយ ហើយបានអំពាវនាវឱ្យភាគីថៃ ត្រូវមានការប្រុងប្រយ័ត្ន ដោយមិនត្រូវធ្វើការល្បាតនៅតំបន់ដែលមានមីនសល់ពីសម័យសង្គ្រាមឡើយ។
គួរបញ្ជាក់ថា កងកម្លាំងកម្ពុជា-ថៃ ធ្លាប់មានការប៉ះទង្គិចគ្នាដោយសព្វាវុធ អស់រយៈពេល៥ថ្ងៃ ម្តងរួចមកហើយ ចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ រហូតទាល់តែមានបទឈប់បាញ់ ក្រោមការសម្របសម្រួលពីម៉ាឡេស៊ី និងសហរដ្ឋអាមេរិក។ តែយ៉ាងណា ភាពតានតឹងនៅតំបន់ព្រំដែន នៅតែបន្តកើតមាន ដោយសារកងកម្លាំងយោធាថៃ បានរាយបន្លាលួស ដាក់សំណាញ់ និងសំបកកង់ឡាន នៅតំបន់មួយចំនួន ជាពិសេសនៅភូមិព្រៃចាន់ និងភូមិជោគជ័យ ក្នុងខេត្តបន្ទាយមានជ័យ ចូលដែនអធិបតេយ្យកម្ពុជា៕