រដ្ឋមន្រ្តីស្តីទី នៃក្រសួងការបរទេសកម្ពុជានិងសហប្រតិបត្តិការអន្តរជាតិបានសម្ដែងនូវក្ដីកង្វល់យ៉ាងខ្លាំងចំពោះកំណើននៃការគំរាមគំហែងមកលើបទឈប់បាញ់ដ៏ផុយស្រួយ ដោយលើកឡើងពីសកម្មភាពរំលោភបំពានជាបន្តបន្ទាប់របស់កងទ័ពថៃ។
យោងតាមសេចក្តីប្រកាសព័ត៍មានរបស់ក្រសួងការបរទេសចុះថ្ងៃទី១៥ ខែសីហា ឆ្នាំ២០២៥ បានលើកឡើងសកម្មភាពនានា ដែលប្រព្រឹត្តដោយភាគីថៃរួមមានការចល័តទ័ព ការធ្វើផ្លូវ និងជីកលេណដ្ឋានដោយប្រើប្រាស់គ្រឿងចក្រធុនធ្ងន់ ការប្រើប្រាស់ដ្រូនរំលោភចូលដែនអាកាសកម្ពុជា ការបំភ្លិចបំផ្លាញផ្ទះសម្បែងនិងរាយលួសបន្លាដាក់របាំងផ្សេងៗទៀត ក៏ដូចជាការរារាំងអ្នកភូមិមិនឱ្យចូលទៅរស់នៅក្នុងផ្ទះសម្បែងរបស់ខ្លួន ។
នៅក្នុងសេចក្ដីប្រកាសដដែលនេះ លោកស្រី អ៊ាត សោភា រដ្ឋលេខាធិការប្រចាំការក្រសួងការបរទេស និងសហប្រតិបត្តិការអន្តរជាតិ និងជារដ្ឋមន្ត្រីស្តីទី នៃក្រសួងការបរទេស និងសហប្រតិបត្តិការអន្តរជាតិ បានអំពាវនាវដល់ប្រទេសម៉ាឡេស៊ីក្នុងនាមជាប្រធានអាស៊ាននិងដៃគូពាក់ព័ន្ធផ្សេងៗទៀតឱ្យពន្លឿនការបង្កើតក្រុមអ្នកសង្កេតការណ៍អាស៊ាន (AOT) ជាពិសេសតាមរយះការបញ្ចប់ឱ្យបានឆាប់នៃលក្ខខណ្ឌប្រតិបត្តិ (TOR)។
លោកស្រីបានគូសបញ្ជាក់ពីជំហរជាគោលការណ៍របស់កម្ពុជាដែលថា “ពុំមានព្រំដែនអន្តរជាតិណាត្រូវបានផ្លាស់ប្ដូរដោយការប្រើប្រាស់កម្លាំងនោះទេ”។
លោកស្រីក៏បានបដិសេធដាច់អហង្ការលើការចោទប្រកាន់ទាំងឡាយដែលថា កម្ពុជាបានដាក់មីនថ្មី ដោយបានបញ្ជាក់ឡើងវិញពីការប្រកាន់ភ្ជាប់ឥតងៀករេរបស់កម្ពុជាចំពោះអនុសញ្ញាអូតាវ៉ានិងការបេ្តជ្ញាចិត្តចំពោះសន្តិភាពយូរអង្វែង ហើយកម្ពុជានិងត្រៀមខ្លួន ដើម្បីចាប់ផ្ដើមប្រតិបត្តិការដោះមីនរួមគ្នាជាមួយប្រទេសថៃនៅតំបន់ដែលមានខណ្ឌសីមាច្បាស់ លាស់ ឬតំបន់មិនមានវិវាទ។
កម្ពុជានិងថៃបានទទួលយកបទឈប់បាញ់កាលពីថ្ងៃទី២៨ ខែកក្កដា នៅប្រទេសម៉ាឡេស៊ីបន្ទាប់ពីការប្រយុទ្ធគ្នាយ៉ាងខ្លាំងក្លា ដែលបានចាប់ផ្តើមកាលពីថ្ងៃទី២៤ ខែកក្កដា បន្ទាប់ពីមានភាពតានតឹងជុំវិញតំបន់ព្រំដែនមានជម្លោះ។ ពលរដ្ឋជាង ៣០.០០០០នាក់ បានភៀសខ្លួនពីផ្ទះសម្បែងនិងមានមនុស្សជាង៤០នាក់បានបាត់បង់ជីវិតដោយសារការវាយប្រយុទ្ធគ្នានេះ៕
ដោយ ស៊ន សោភា