អាជ្ញាធរមីនកម្ពុជាបានបដិសេធយ៉ាងដាច់ខាតចំពោះការចោទប្រកាន់របស់ភាកីថៃ ដែលថា កម្ពុជាបានដាក់មីនថ្មី ដោយអះអាងថា ការចោទប្រកាន់នេះ មិនមានការស៊ើបអង្កេតត្រឹមត្រូវនិងគ្មានភស្តុតាងច្បាស់លាស់។
អាជ្ញាធរមីនកម្ពុជាបានប្តេជ្ញាចិត្តគោរពតាមបទឈប់បាញ់និងអនុវត្តកាតព្វកិច្ចរបស់ខ្លួន ក្នុងនាមជារដ្ឋភាគីអនុសញ្ញាអូតាវ៉ា តាំងពីឆ្នាំ២០០០ ដោយដាច់ខាតមិនប្រើប្រាស់មីនប្រឆាំងមនុស្ស មិនបានប្រើប្រាស់ ផលិត ឬដាក់មីនថ្មីឡើយ ចាប់តាំងពីអនុសញ្ញាចូលជាធរមានសម្រាប់កម្ពុជា។
អាជ្ញាធរមីនបានលើកឡើងបន្ថែមថា តំបន់ដែលកើតហេតុ ស្តិតនៅតាមបណ្តោយព្រំដែនក្បែរប្រសាទតាក្របី ដែលជាតំបន់មានមីនច្រើន បន្សល់ទុកតាំងពីសម័យសង្រាម ជាច្រើនទសវត្សមកហើយ នៅអំឡុងសង្រាមស៊ិវិល ហើយថា ឧប្បត្តិហេតុផ្ទុះមីន កាលពីថ្ងៃទី២៧ ខែសីហា គឺពិតជាបង្កឡើងដោយសារគ្រាប់មីនចាស់ មិនមែនជាគ្រាប់មីនថ្មីឡើយ។
អាជ្ញាធរមីនកម្ពុជាបន្តទៀតថា កម្ពុជាសម្រេចបានសមិទ្ធផលក្នុងការបោសសម្អាតមីន ចាប់តាំងពីទសវត្សរ៍ឆ្នាំ១៩៩០ រហូតដល់បច្ចុប្បន្ន។ ទោះជាយ៉ាងណាក្ដី នៅតាមតំបន់ព្រំដែនកម្ពុជា-ថៃ នៅតែបន្ដរងគ្រោះធ្ងន់ធ្ងរ ដោយសារមីននៅឡើយហើយភាគីកម្ពុជាជំរុញឱ្យភាគីថៃបង្ហាញនូវភស្តុតាង និងអនុញ្ញាតឱ្យមានការស៊ីបអង្កេត ចូលរួមដោះស្រាយបញ្ហានេះ ដោយការទទួលខុសត្រូវ រក្សាឱ្យបានសន្តិភាព នៅតាមតំបន់ព្រំដែន និងធានាសុវត្តិភាពរបស់ប្រជាជនទាំងពីរប្រទេស។
កម្ពុជាបញ្ចាក់ជាថ្មីថា មិនបានប្រើប្រាស់មីនប្រឆាំងមនុស្សឡើយ និងនៅតែបេ្តជ្ញាអនុវត្តតាមអនុសញ្ញាអូតាវ៉ា និងបទឈប់បាញ់៕
អត្ថបទដោយ លន ម៉ាលី