អង្គការលីកាដូរកឃើញថា មានពលរដ្ឋយ៉ាងតិច ៨២នាក់ ត្រូវបានចាប់ខ្លួន ចោទប្រកាន់ និងឃុំខ្លួន ដោយសារតែការបញ្ចេញមតិ និងការយល់ឃើញនៅតាមបណ្តាញសង្គម ដោយបានចាត់ទុកឆ្នាំ២០២៥ គឺជាឆ្នាំដ៏អាប់អួរ នៃសេរីភាពក្នុងការបញ្ចេញមតិ។
អង្គកាលីដូរកឃើញថា នៅក្នុងចំណោមពលរដ្ឋចំនួន ៨២នាក់នោះ មានពលរដ្ឋចំនួន៧៦នាក់ បានកំពុងឃុំខ្លួននៅពន្ធនាគារតាមបណ្តារាជធានីខេត្តនៅទូទាំងប្រទេស គិតត្រឹមខែធ្នូ ឆ្នាំ២០២៥។ នេះបើតាមរបាយការណ៍ ចុះថ្ងៃទី២៧ ខែកុម្ភៈ ឆ្នាំ២០២៦។
អង្គការលីកាដូ អះអាងថា ពលរដ្ឋទាំងនោះ ត្រូវបានចាប់ខ្លួន ចោទប្រកាន់និងឃុំខ្លួន ដោយសារតែពួកគេចែករំលែកបន្តនូវទស្សនៈ ការបញ្ចេញមតិ និងការយល់ឃើញ តាមបណ្តាញសង្គម ដែលភាគច្រើនទាក់ទិននឹងករណីឃាតកម្មលើសកម្មជននយោបាយ លោក លិម គិមយ៉ា ស្ថានភាពនៃការផ្តល់ជំនួយពីបរទេសមកប្រទេសកម្ពុជា បញ្ហាជម្លោះព្រំដែនកម្ពុជា-ថៃ និងបញ្ហាសង្គមផ្សេងៗទៀត។
អង្គការលីកាដូ បន្តថា ក្នុងចំណោមអ្នកកំពុងជាប់ពន្ធនាគារទាំង ៧៦នាក់នោះ យ៉ាងហោចណាស់មានពលរដ្ឋចំនួន ៣៣នាក់ ជាអ្នកមានទំនាក់ទំនងជាមួយគណបក្សបក្សជំទាស់ ក្នុងនោះ ៦នាក់ជាមន្ត្រីមកពីគណបក្សជំទាស់ ដែលជាប់ឆ្នោត ជាអ្នកសារព័ត៌មាន ៣នាក់ និងអនុប្រធានសហជីព ១នាក់ ដែលពួកគេមានអាយុចន្លោះពី ២០ឆ្នាំ ដល់ ៧៨ឆ្នាំ ហើយក្នុងចំណោមពលរដ្ឋទាំង ៨២នាក់នោះ មានស្ត្រី ៧នាក់ផងដែរ។
អង្គកាលីកាដូអះអាងទៀតថា ពលរដ្ឋទាំងនោះ ភាគច្រើនត្រូវបានចោទប្រកាន់ពីបទ “ញុះញង់ឱ្យប្រព្រឹត្តបទឧក្រិដ្ឋជាអាទិ៍” តាមបញ្ញត្តិមាត្រា ៤៩៤ និង៤៩៥ ដែលអាចជាប់ពន្ធនាគាររហូតដល់ ២ឆ្នាំ និងបទ “រួមគំនិតក្បត់” តាមបញ្ញត្តិមាត្រា ៤៥៣ និងបទ “ប្រគល់ឱ្យរដ្ឋបរទេសនូវព័ត៌មានជាអាទិ៍ ដែលអាចធ្វើឱ្យអន្តរាយការការពារជាតិ” តាមបញ្ញត្តិមាត្រា ៤៤៥ នៃក្រមព្រហ្មទណ្ឌ ដោយអាជ្ញាធរបានប្រើប្រាស់លើមនុស្សចំនួន១០នាក់ ដែលអាចឱ្យពួកគេប្រឈមនឹងការជាប់ពន្ធនាគាររហូតដល់ ១០ឆ្នាំ ឬ១៥ឆ្នាំ។
អង្គការលីកាដូក៏បានរកឃើញផងដែរថា ពលរដ្ឋមួយចំនួនត្រូវបាននគរបាលស្លៀកពាក់ស៊ីវិលចូលទៅចាប់ខ្លួននៅក្នុងផ្ទះ នៅចម្ការ កន្លែងធ្វើការ និងនៅទីសាធារណៈ ហើយភាគច្រើន គឺពុំបានដឹងពីមូលហេតុនៃការចាប់ខ្លួន ឬដឹងពីដីកាចាប់ខ្លួននោះទេ៕
សិក្ខាកាម រ៉ា ជឺយ៉ាង