ក្រសួងសុខាភិបាលនៃព្រះរាជាណាចក្រកម្ពុជាបានចេញសេចក្ដីប្រកាសព័ត៌មានច្រានចោលរាល់ការចោទប្រកាន់របស់បណ្តាញសារព័ត៌មានថៃដែលថា បុរសចុងភៅជនជាតិថៃម្នាក់បានស្លាប់ ក្រោយពីមន្ទីរពេទ្យនៅកម្ពុជាបដិសេធមិនព្រមទទួលព្យាបាល។
ការច្រានចោលនេះធ្វើឡើង បន្ទាប់ពីសារព័ត៌មាន Khaosod English របស់ថៃបានធ្វើសេចក្តីរាយការណ៍កាលពីថ្ងៃទី៨ ខែតុលា ឆ្នាំ២០២៥ ថា បុរសជនជាតិថៃឈ្មោះ METHACHAN YOSENG អាយុ២៤ឆ្នាំ បានស្លាប់នៅតំបន់ប៉ោយប៉ែតក្នុងទឹកដីកម្ពុជាកាលពីរសៀលថ្ងៃអង្គារ បន្ទាប់ពីមន្ទីរពេទ្យក្នុងស្រុក បដិសេធមិនព្យាបាលគាត់ ដោយសារគាត់គ្មានប្រាក់ឬឯកសារបញ្ជាក់អត្តសញ្ញាណ
យោងតាមសេចក្តីប្រកាសព័ត៌មានចុះថ្ងៃទី៨ ខែតុលា ឆ្នាំ២០២៥ របស់ក្រសួងសុខាភិបាលនៃព្រះរាជាណាចក្រកម្ពុជាបានលើកឡើងថា តាមរយៈការពិនិត្យស្រាវជ្រាវជាក់ស្តែង និងការធ្វើកោសល្យវិច័យ បុរសជនជាតិថៃរូបនេះបានស្លាប់ដោយសារគាំងបេះដូង ដោយមិនបានមកទទួលសេវាព្យាបាល ឬត្រូវបានបដិសេធដោយមន្ទីរពេទ្យក្នុងស្រុក មុនពេលទទួលមរណភាពនោះឡើយ។
ក្រសួងសុខាភិបាលបន្តថា មន្ត្រី បុគ្គលិកនៅគ្រប់មូលដ្ឋានសុខាភិបាលតែងតែប្រកាន់ខ្ជាប់នូវក្រមសីលធម៌វិជ្ជាជីវៈ ក្នុងការជួយសង្គ្រោះអាយុជីវិតអ្នកជំងឺដោយគ្មានការរើសអើង ជាតិសាសន៍ សាសនាឬនិន្នាការនយោបាយណាមួយឡើយ។
ជុំវិញករណីនេះដែរ រដ្ឋបាលខេត្តបន្ទាយមានជ័យកាលពីថ្ងៃទី៨ ខែតុលា ឆ្នាំ២០២៥ ក៏បានបញ្ជាក់នៅក្នុងសេចក្តីប្រកាសព័ត៌មានដាច់ដោយឡែកមួយទៀតថា សាកសពបុរសចុងភៅជនជាតិថៃ ឈ្មោះ METHACHAN YOSENG អាយុ២៤ឆ្នាំ មកពីស្រុក Nakhon Si Thammarat បានចូលមកធ្វើការនៅប្រទេសកម្ពុជាដោយមិនស្របច្បាប់ និងស្លាប់ដោយសារជំងឺគាំងបេះដូង កាលពីថ្ងៃទី៧ ខែតុលា ឆ្នាំ២០២៥ ។
រដ្ឋបាលខេត្តបន្ទាយមានជ័យបានបញ្ជាក់ថា សពរបស់បុរសឈ្មោះ METHACHAN YOSENG ត្រូវបានប្រទះឃើញដេកស្លាប់នៅមុខសំយ៉ាបអគារទុកចោលដែលគ្មានមនុស្សរស់នៅ ដោយមិនដឹងមូលហេតុច្បាស់ និងមិនបានបញ្ជូនមកមន្ទីពេទ្យ ដើម្បីពិនិត្យ និងព្យាបាលឡើយ៕