អភិបាលខេត្តបន្ទាយមានជ័យ បានប្រាប់ទៅកាន់អភិបាលខេត្តស្រះកែវថៃ បញ្ឈប់រាល់សកម្មភាពដែលពង្រីកទំហំវិវាទ និងបង្កើនភាពតានតឹងនៅព្រំដែន ដោយរងចាំការដោះស្រាយពីគណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ ជុំវិញការកំណត់ខ្សែបន្ទាត់ព្រំដែន នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
រដ្ឋបាលខេត្តបន្ទាយមានជ័យ តាមរយៈលិខិតមួយចុះថ្ងៃទី០៨ ខែតុលា បានប្រាប់អភិបាលខេត្តស្រះកែវថៃថា ទីតាំងដែលរដ្ឋបាលខេត្តស្រះកែវតវ៉ា ជុំវិញការសង់ជម្រកបណ្ដោះអាសន្ន និងការប្រមូលផ្ដុំរបស់ពលរដ្ឋខ្មែរនៅតំបន់នោះ គឺស្ថិតនៅភូមិជោគជ័យ ឃុំអូរបីជាន់ ស្រុកអូរជ្រៅ ដែលពលរដ្ឋកម្ពុជា បានរស់នៅ និងអាស្រ័យផលជាយូរមកហើយ។
លិខិតដដែល បន្ថែមថា ពលរដ្ឋខ្មែរដែលកំពុងតាំងទីលំនៅក្នុងជម្រកបណ្ដោះអាសន្ននោះ គឺជាអ្នកដែលបាត់បង់ផ្ទះសម្បែង ដោយការរាយបន្លាលួស សំណាញ់ខ្មៅ និងដាក់កង់ឡានរបស់កងកម្លាំងថៃ ហើយក៏ភៀសខ្លួនមកស្នាក់នៅទីតាំងនេះ។
លិខិតខាងលើ បានគូសបញ្ជាក់ថា រដ្ឋបាលខេត្តបន្ទាយមានជ័យ និងខេត្តស្រះកែវ មិនមានសិទ្ធិក្នុងការកំណត់ព្រំដែន ក្នុងតំបន់មិនទាន់មានការខណ្ឌសីមាព្រំដែនរួចរាល់នោះទេ។
អ្នកនាំពាក្យសាលាខេត្តបន្ទាយមានជ័យ លោក លី សុវណ្ណារិទ្ធ មានប្រសាសន៍នៅថ្ងៃទី០៩ ខែតុលានេះថា នៅភូមិព្រៃចាន់ និងភូមិជោគជ័យ ស្ថិតក្នុងស្ថានភាពធម្មតា។ លោកបន្តថា មានពលរដ្ឋ១២គ្រួសារ រស់នៅភូមិទាំងពីរដែលរងផលប៉ះពាល់ដោយថៃរាយបន្លាយលួស បានបន្តដេកយាម ជាមួយពលរដ្ឋមួយចំនួនទៀតដែលផ្ទះនៅក្បែរទីតាំងជម្លោះ។
បើតាមលោក លី សុវណ្ណារិទ្ធ គ្រួសារដែលរងផលប៉ះពាល់ពីផែនការបណ្ដេញចេញរបស់ថៃ មានចំនួន២០២គ្រួសារ ដែលរស់នៅភូមិទាំងពីរ ខណៈភាគីថៃ នៅមិនទាន់ឆ្លើយតបចំពោះលិខិតរបស់រដ្ឋបាលខេត្ត ដែលបានដាក់ជូនកាលពីថ្ងៃទី០៨ ខែតុលានេះឡើយ។
លោកនិយាយថា៖ «ការត្រៀមខ្លួនក្នុងការការពារប្រជាពលរដ្ឋ គឺអាជ្ញាធរនិងកងកម្លាំងដែលប្រចាំការនៅតាមតំបន់ព្រំដែន គឺយើងធ្វើយ៉ាងណារក្សាសន្តិសុខ សណ្ដាប់ធ្នាប់ ជូនប្រជាពលរដ្ឋ នេះជាការត្រៀមរៀបចំរបស់យើង [សម្រាប់ថ្ងៃទី១០ ខែតុលា]»។
ប្រជាពលរដ្ឋរស់នៅភូមិព្រៃចាន់ ដែលត្រូវបានកងកម្លាំងថៃយកបន្លាលួសហ៊ុមព័ទ្ធផ្ទះ អ្នកស្រី ហ៊ូល ម្លិះ និយាយថា នៅថ្ងៃទី១០ខែតុលានេះ ប្រសិនបើកងកម្លាំងថៃរុះរើផ្ទះសម្បែងរបស់អ្នកស្រីនោះ អ្នកស្រីនឹងទម្លុះបន្លាលួសចូលទៅរារាំងភ្លាម។ អ្នកស្រីថា គ្រួសាររបស់អ្នកស្រី មិនព្រមចាកចេញតាមការចង់បានរបស់ភាគីថៃនោះឡើយ។
អ្នកស្រីនិយាយថា៖ «ចេញទៅណាទៅ អត់ចេញទេ ខ្ញុំចេញទៅណា បើផ្ទះខ្ញុំដីខ្ញុំ នៅហ្នឹង ដីខ្ញុំមានប្លង់កម្មសិទ្ធិរបស់ខ្ញុំ ខ្ញុំចេញទៅណាតាមពួកវា។ [បើរុះរើផ្ទះខ្ញុំ] ឃាត់ និងទម្លុះបន្លាលួសទៅបណ្ដោយទៅ»។
កាលពីពេលកន្លងទៅ អភិបាលខេត្តស្រះកែវ ថៃ បានកំណត់ពេលឲ្យពលរដ្ឋខ្មែរនៅភូមិព្រៃចាន់ និងភូមិជោគជ័យ ចាកចេញពីតំបន់ដែលថៃហៅថា Ban Nong Chan នៃព្រំដែនខេត្តស្រះកែវ ត្រឹមថ្ងៃទី១០ ខែតុលា។
កាលពីថ្ងៃទី២៨ ខែកញ្ញា ឆ្នាំ២០២៥ អាជ្ញាធរកម្ពុជាដាក់លិខិតតវ៉ា បន្ទាប់ពីរដ្ឋបាលខេត្តស្រះកែវរបស់ថៃ ប្រកាសអនុវត្តច្បាប់អាជ្ញាសឹកថៃ លើពលរដ្ឋកម្ពុជាដែលរស់នៅក្នុងភូមិជោគជ័យនិងភូមិព្រៃចាន់ ខេត្តបន្ទាយមានជ័យ ប្រសិនបើពួកគេមិនចាកចេញ។
នៅក្នុងលិខិតនោះ រដ្ឋបាលខេត្តបន្ទាយមានជ័យ អះអាងថា សកម្មភាពនៃការលើកបដារបស់រដ្ឋបាលខេត្តស្រះកែវរបស់ថៃ ដែលបានលើកបដាចំនួន៦ផ្ទាំង ដោយព្រមានទុកពេលឱ្យអ្នកភូមិកម្ពុជារយៈពេល១៥ថ្ងៃ ដើម្បីចាកចេញពីតំបន់មានជម្លោះខាងលើ គឺជាការគំរាមកំហែងយ៉ាងធ្ងន់ធ្ងរមកលើសិទ្ធិរបស់ប្រជាពលរដ្ឋស្លូតត្រង់កម្ពុជា ដែលបានកំពុងរស់នៅអាស្រ័យផលក្នុងភូមិទាំងពីរ តាំងពីយូរមកហើយ មុនពេលមានអនុស្សរណៈនៃការយោគយល់គ្នាស្តីពីការវាស់វែង និងខណ្ឌសីមាព្រំដែនគោកកម្ពុជា-ថៃ (MOU 2000) ចូលជាធរមាន។
លិខិតដដែលនេះ ក៏បានបញ្ជាក់ផងដែរថា រដ្ឋបាលខេត្តស្រះកែវ «មិនមានសមត្ថកិច្ច» កំណត់ព្រំដែន និងអនុវត្តច្បាប់ក្នុងស្រុករបស់ថៃមកលើសហគមន៍កម្ពុជាដែលបាននិងកំពុងរស់នៅអាស្រ័យផលក្នុងតំបន់មិនទាន់មានការកំណត់ខណ្ឌសីមាព្រំដែនរួចរាល់នោះទេ។
អ្នកវិភាគនយោបាយ លោក ឯម សុវណ្ណរ៉ា មានប្រសាសន៍ថា កម្ពុជាគួរស្វែងរកដំណោះស្រាយក្នុងជម្លោះព្រំដែនជាមួយថៃ តាមរយៈយន្តការក្របខណ្ឌអាស៊ាន។ លោកថា ការប៉ះទង្គិចគ្នារវាងកម្ពុជានិងថៃ បានប្រាសចាកទៅនឹងរដ្ឋធម្មនុញ្ញអាស៊ាន និងគោលការណ៍សន្តិសុខ ហើយថា ប្រសិនបើអាស៊ានរងការបរាជ័យ ក្នុងការដោះស្រាយជម្លោះព្រំដែនកម្ពុជា ថៃ នោះ ស្ថាប័ននេះនឹងចុះខ្សោយនៅពេលខាងមុខ។
បើតាមអ្នកវិភាគនយោបាយរូបនេះ ការសម្របសម្រួលរបស់ម៉ាឡេស៊ីដែលជាប្រធានអាស៊ានប្តូរវេន កន្លងមក គឺជាដោះស្រាយដោយភាគីម៉ាឡេស៊ីផ្ទាល់ ដោយមិនមានការកោះប្រជុំសមាជិកទាំងមូលរបស់អាស៊ាន ចូលរួមឈឺឆ្អាលឡើយ។
លោកនិយាយថា៖ «បើសិនយន្តការសហគមន៍សន្តិសុខហ្នឹងមិនដំណើរការ មិនធ្វើបានទេ វាអាចជះផលមិនល្អសម្រាប់សហគមន៍អាស៊ានខ្លួនឯងដែរ។ នៅថ្ងៃអនាគត អង្គការហ្នឹង មិនរឹងមាំទៀតទេ ប្រសិនបើជម្លោះសមាជិកនិងសមាជិក មិនអាចដោះស្រាយបាន នៅក្នុងក្របខណ្ឌអង្គការតំបន់ ពីព្រោះការបាញ់គ្នាហ្នឹង ប្រាសចាកនឹងគោលការណ៍ ធម្មនុញ្ញអាស៊ានហ្នឹងហើយ។ នេះទី១ ជាចំណុចសំខាន់។
កងកម្លាំងកម្ពុជា-ថៃ បានប៉ះទង្គិចគ្នាអស់រយៈពេល៥ថ្ងៃ ចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ រហូតទាល់តែមានបទឈប់បាញ់ ក្រោមការសម្របសម្រួលពីម៉ាឡេស៊ី និងសហរដ្ឋអាមេរិក។
តែយ៉ាងណា កាលពីថ្ងៃទី១២ និងថ្ងៃទី១៣ ខែសីហា ឆ្នាំ២០២៥ កងកម្លាំងប៉ារ៉ាថៃ និងតម្រួតព្រំដែនថៃ ប្រដាប់ដោយអាវុធ បានធ្វើសកម្មភាពចូលមកត្រួតពិនិត្យ នៅទល់មុខច្រកជោគជ័យ និងបានរាយបន្លាលួស និងដាក់កង់ឡាន នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
ដោយឡែក កាលពីថ្ងៃទី០៤ ខែសីហា កងទ័ពថៃក៏បានដាក់ពង្រាយបន្លាលួស និងយកគ្រឿងចក្រទៅដាក់នៅតំបន់អានសេះ ខេត្តព្រះវិហារ។ យ៉ាងណា នៅថ្ងៃទី០៥ ខែសីហា ក្រោយកងទ័ពប្រចាំតំបន់កម្ពុជា-ថៃ បានជួបពិភាក្សានិងចរចាគ្នា បន្លាលួសទាំងនោះ ក៏ត្រូវបានរុះរើ ហើយគ្រឿងចក្រថៃ ក៏ត្រូវបានផ្អាកធ្វើសកម្មភាព៕