ក្រសួងអប់រំ យុវជននិងកីឡា អះអាងថា ដំណើរការប្រឡងមធ្យមសិក្សាទុតិយភូមិនៅថ្ងៃទី១ បានប្រព្រឹត្តទៅដោយរលូន ខណៈមានបេក្ខជនអវត្តមានប្រមាណ ១៨១៣នាក់។
យោងតាមរបាយការណ៍បឋមរបស់ក្រសួងអប់រំ ដែលទើបចេញផ្សាយនៅរសៀលថ្ងៃទី២៨ ខែសីហា នេះ បានឱ្យដឹងថា មានបេក្ខជនអវត្តមាន ១៨១៣នាក់ (ស្រី៧២៦នាក់) ស្មើនឹង១,២២ភាគរយ ដែលក្នុងនោះមានបេក្ខជនស្វ័យរិនចំនួន ១៤៨៣នាក់ (ស្រី៥៧៥នាក់) បេក្ខជនចំណេះទូទៅចំនួន៣៣០នាក់ (ស្រី១៥១នាក់)។
ក្រសួងបញ្ជាក់ទៀតថា បេក្ខជនដែលមានបញ្ហាសុខភាពមាន៨៥នាក់ ហើយដាក់ឱ្យប្រឡងដាច់ដោយឡែក២៦នាក់ បេក្ខជនបោះបង់ការប្រឡងដោយសារបញ្ហាសុខភាពចំនួន២នាក់ បេក្ខជនមានជំងឺគ្រុនឈាមមានចំនួន៩នាក់ និងគ្រោះថ្នាក់ចរាចរណ៍៤នាក់ ដោយឡែកគណៈមេប្រយោគមានបញ្ហាសុខភាព៣៥នាក់។
លោកស្រី ឃួន វិច្ឆិកា អ្នកនាំពាក្យក្រសួងអប់រំ មិនអាចទាក់ទងសុំការអត្ថាធិប្បាយបានទេ។
លោក សយ ចាន់វិចិត្រ អ្នកនាំពាក្យអង្គភាពប្រឆាំងអំពើពុករលួយ (ACU) មានប្រសាសន៍ថា នៅឆ្នាំនេះ ACU មានអ្នកសង្កេតការណ៍ស្ម័គ្រចិត្តទូទាំងប្រទេសចំនួន ៣៧០០នាក់។ លោកថា ស្ថានភាពនៅក្នុងមណ្ឌល និងបន្ទប់ប្រឡង មានសភាពស្ងប់ស្ងាត់ មានរបៀបរៀបរយ ព្រមទាំងការប្រឡងប្រពឹ្រត្តទៅដោយរលូន។
លោក ចាន់វិចិត្រ មានប្រសាសន៍ថា « គ្រប់មណ្ឌលទាំងបុគ្គលិកអប់រំ និងបេក្ខជន ព្រមទាំងភាគីពាក់ព័ន្ធទាំងអស់បានបំពេញការងារប្រកបដោយស្មារតីទទួលខុសត្រូវខ្ពស់បំផុត»។
ទាក់ទងនឹងអវត្តមានរបស់បេក្ខជនជិត២០០០នាក់នេះ លោក សយ ចាន់វិចិត្រ មានប្រសាសន៍ថា តួលេខនេះ ស្មើនឹងប្រមាណជា ១% នៃចំនួនបេក្ខជនសរុបតែប៉ុណ្ណោះ និងមិនប៉ះពាល់ដល់ការប្រឡងរួមឡើយ។
ក្រសួងអប់រំបានប្រកាសថា ការប្រឡងសញ្ញាបត្រមធ្យមសិក្សាទុតិយភូមិឆ្នាំនេះ នឹងធ្វើឡើងនៅថ្ងៃទី២៨ និង២៩ ខែសីហា ដោយមានបេក្ខជនចុះឈ្មោះប្រឡងបាក់ឌុប សរុបចំនួន ១៤៦ ៧២០នាក់ ដែលថ្នាក់វិទ្យាសាស្រ្តមានចំនួន ៤០ ៦៧៨នាក់(ស្មើនឹង ២៧.៧២%) និងថ្នាក់វិទ្យាសាស្រ្តសង្គមចំនួន ១០៦ ០៤២ នាក់(ស្មើនឹង ៧២.២៨%)។
រដ្ឋា សិរីវឌ្ឍនា អាយុ១៨ឆ្នាំ ជាបេក្ខជនប្រឡងផ្នែកវិទ្យាសាស្រ្តសង្គម នៅមណ្ឌលអនុវិទ្យាល័យចតុមុខនិយាយថា វិញ្ញាសារប្រឡងនាព្រឹកមិញនេះ ផ្ទុយពីអ្វីដែលខ្លួនបានរំពឹងទុក និងខុសពីអ្វីដែលបានខំទន្ទេញ ប៉ុន្តែ សិរីវឌ្ឍនា ថា ខ្លួននៅតែមានសង្ឃឹមថា នឹងអាចជាប់ក្នុងការប្រឡងបាក់ឌុបឆ្នាំនេះ។
សិរីវឌ្ឍនា និយាយថា “ភាគច្រើនចេញមកសំណួរបើកទាំងអស់។ សម្រាប់វិញ្ញារនេះ គឺ ៥០/៥០ ល្មមដែលអាចឱ្យយើងអាចយកពិន្ទុជាប់បាន។ ខ្ញុំសង្ឃឹមលើការប្រឡងនេះ 30 ទៅ70 ភាគរយដែរ“។
ខៀវ តុបឆាយ អាយុ១៨ឆ្នាំ ជាបេក្ខជនប្រឡងផ្នែកវិទ្យាសាស្ត្រ នៅមណ្ឌលវិទ្យាល័យព្រះស៊ីសុវត្ថិអះអាងថា នៅថ្ងៃទី១ នេះ ខ្លួនធ្វើបានល្អលើវិញ្ញាសារប្រវត្តិវិទ្យា ហើយសង្ឃឹមថា អាចទទួលបានពិន្ទុខ្ពស់ ចំណែកឯវិញ្ញាសារជីវៈវិទ្យាមានសង្ឃឹមទាបជាងអ្វីដែលបានរំពឹងទុក។
តុបឆាយ បន្តថា «ខ្ញុំមានការសោកស្ដាយណាស់ចំពោះវិញ្ញាសារជីវៈវិទ្យា ប៉ុន្តែរឿងដែលហួសទៅហើយ យើងបំភ្លេចចោលទៅ»។
លោក ខៀវ សុខា អាយុ៥៣ឆ្នាំ ជាឪពុកបេក្ខជន ខៀវ តុបឆាយ បាននិយាយថា នេះជាលើកទី១ ហើយដែលលោកមានកូនប្រឡងបាក់ឌុប និងចង់ឃើញកូនទទួលបានជោគជ័យទៅតាមអ្វី ដែលកូនបានខិតខំប្រឹងប្រែងក្នុងរយៈពេលពេញមួយឆ្នាំមកនេះ។
លោក សុខា និយាយថា «ខ្ញុំបានធ្វើអ្វីៗគ្រប់យ៉ាង ដើម្បីកូនហើយ…និងចង់ដឹងពីលទ្ធផលកូនខ្លះៗដែរ។ ជូនពរឱ្យកូនជោគជ័យពេលប្រឡងចប់ទាំងពីរថ្ងៃនេះ ឱ្យគាត់ប្រឹងប្រែងទៅតាមលទ្ធភាពដែលគាត់ប្រឹងហ្នឹង» ។
កាលពីថ្ងៃទី២២ ខែសីហា ឆ្នាំ២០២៥ លោក ហង់ជួន ណារ៉ូន រដ្ឋមន្ត្រីក្រសួងអប់រំ យុវជននិងកីឡាបានអះអាងថា នៅឆ្នាំសិក្សាថ្មីនេះ ក្រសួងនឹងញែកសិស្សទៅតាមគន្លងថ្នាក់វិទ្យាសាស្ត្រ វិទ្យាសាស្ត្រសង្គម និងគន្លងវិជ្ជាជីវៈ ពីកម្រិតថ្នាក់ទី១០ ដល់ថ្នាក់ទី១២ ដើម្បីកាត់បង្កើនចំនួនសិស្សថ្នាក់វិទ្យាសាស្ត្រ៕
អត្ថបទដោយ ឃុត ពិសី និង ស៊ន សោភា