សាលាដំបូងរាជធានីភ្នំពេញ នៅព្រឹកថ្ងៃទី៤ ខែកក្កដា បានបដិសេធសំណើរសុំដោះលែងឱ្យមានសេរីភាពរបស់សកម្មជនផ្សព្វផ្សាយសន្ធិសញ្ញាទីក្រុងប៉ារីស ខណៈសាច់ញាតិនិងអ្នកគាំទ្រមួយចំនួន បានសម្តែងការខកចិត្តចំពោះការសម្រេចនេះ។
សកម្មជនផ្សព្វផ្សាយសន្ធិសញ្ញាទីក្រុងប៉ារីស រួមមាន លោក ស្រ៊ុន ស្រ៊ន កញ្ញា ភឹង សោភា និងលោក សាន សិទ្ធិ ត្រូវបានតុលាការចោទប្រកាន់ក្រោមបទចោទ«ញុះញង់បង្កឱ្យមានភាពវិកវរធ្ងន់ធ្ងរដល់សន្តិសុខសង្គម» ក្រោយពួកគេចេញវីដេអូនិយាយអំពី គុណសម្បត្តិនិងគុណវិបត្តិនៃការបង្កើតតំបន់អភិវឌ្ឍន៍កម្ពុជា ឡាវ និងវៀតណាមឬតំបន់ CLV។
លោក ស៊ឺន ជុំជួន សហមេធាវីការពារក្តីឱ្យ លោក ស្រ៊ុន ស្រ៊ន និងសកម្មជនកិច្ចព្រមព្រៀងសន្តិភាពទីក្រុងប៉ារីស បានបញ្ជាក់ប្រាប់Press Start Cambodia ថា តុលាការបានសម្រេចបដិសេធសំណើរសុំឱ្យដោះលែងកូនក្តីរបស់លោក ប៉ុន្តែលោកមិនទាន់ដឹងអំពីមូលហេតុនៅឡើយទេ ព្រោះមិនទាន់បានទទួលសាលក្រមពីតុលាការ។
លោកលើកឡើងថា៖«យើងខ្ញុំពិតជាមានការសោកស្តាយ ដែលតុលាការបដិសេធនូវពាក្យសុំរបស់យើងខ្ញុំដើម្បីដោះលែងជនជាប់ចោទឱ្យមានសេរីភាព ប៉ុន្តែតុលាការបដិសេដ។ យើងមិនទាន់ច្បាស់ថាតុលាការសំអាងហេតុអ្វី មិនទាន់ច្បាស់នៅឡើយ ព្រោះយើងនៅចាំទទួលបានសាលក្រមសិន អ្វីដែលជាការប្រកាសសាលក្រមព្រឹកមិញ គ្រាន់តែជាការប្រកាសអំពីសេចក្តីសម្រេច ប៉ុន្តែមិនបានលើកអំពីការសំអាងហេតុទេ។ យើងនឹងពិភាក្សាជាមួយក្រុមគ្រួសារជនជាប់ចោទ ថាយើងខ្ញុំ គួរតែបន្តដំណើរការនីតិវិធីប្តឹងជំទាស់ទៅឧទ្ធណ៍ទៀត ឬយ៉ាងណានោះ ចាំពិភាក្សាជាមួយកូនក្តីសិន»។
អ្នកស្រី សុ ភីណា អាយុ៤២ឆ្នាំ ដែលជាភរិយាលោក ស្រ៊ុន ស្រ៊ន បង្ហាញការខកចិត្តដែលតុលាការបន្តឃុំខ្លួនប្តីអ្នកស្រី និងសកម្មជនផ្សេងទៀត។ ទោះជាយ៉ាងណា អ្នកស្រីនៅមានសង្ឃឹមចំពោះតុលាការថា នឹងផ្តល់យុត្តិធម៌ជូនសកម្មជនទាំងអស់។
អ្នកស្រីបន្តថា៖«អារម្មណ៍កំពុងតែក្តុកក្តួល ព្រោះពេលមកយើងសង្ឃឹម[តុលាការសម្រេចដោះលែង] តែប្តូរទៅជាអវិជ្ជមានរាងអន់ចិត្តតិចតួច តែយើងនៅតែបន្តទៀត ព្រោះខ្ញុំនៅមានសង្ឃឹមលើតុលាការ[…]សំណូមពរតុលាការ គាត់ពិចារណាទៅលើករណីប្តីខ្ញុំ នឹងបងប្អូនផ្សេងទៀត ព្រោះពួកគាត់ធ្វើហ្នឹងមិនមែនជាប្រយោជន៍ផ្ទាល់ខ្លួនតែគាត់ម្នាក់ទេ គឺប្រយោជន៍រួមទូទាំងប្រទេស»។
កញ្ញា ភឹង សោភ័ណ ជាបងស្រីបង្កើតកញ្ញា ភឹង សោភា បានប្រាប់ថា ក្រោយការបដិសេធសំណើសុំដោះលែងនេះ ប្អូនស្រីរបស់កញ្ញា និងមេធាវី នឹងពិភាក្សា ដើម្បីបន្តនីតិវិធីតាមផ្លូវច្បាប់ទៅកាន់សាលាឧទ្ធរណ៍បន្តទៀត។
កញ្ញានិយាយថា៖«ខ្ញុំស្នើសុំឱ្យតុលាការពិចារណាទៅលើចំណុចល្អៗដែរ កញ្ញា ភឹង សោភា បង ស៊ុ្រន ស៊្រន និងបង សាន សិទ្ធិ ដែលជួយសង្គម វិភាគទានទៅដល់ការអភិវឌ្ឍសហគមន៍ គាត់ចូលរួមក្នុងការបង្រៀនច្បាប់ ហើយជួយទៅដល់ជនងាយរងគ្រោះ សង្ឃឹមថា តុលារការពិចារណាទៅលើចំណុចទាំងអស់នឹងដែលពួកគាត់ខិតខំធ្វើការ១០ឆ្នាំទៅក្នុងការកសាងប្រយោជន៍ជួយសហគមន៍»។
ចំណែក លោក កែន ជ្រុន ជាប្រជាពលរដ្ឋដែលមកពីខេត្តព្រះសីហនុ ដែលឡើងមកតាមដានសវនាការនៅសាលាដំបូងរាជធានីភ្នំពេញដែរនោះ ក៏បានបង្ហាញការខកចិត្តចំពោះការបន្តឃុំខ្លួនសកម្មជនទាំង៣រូបនេះ។ ក្នុងនាមជាពលរដ្ឋម្នាក់ លោកបានស្នើដល់រាជរដ្ឋាភិបាល និងតុលាការ ដោះលែងសកម្មជនទាំង៣រូបឱ្យមានសេរីភាពវិញ ដើម្បីបានជួបជុំគ្រួសារ និងបន្តសកម្មការងារទៅមុខទៀត។
លោកបន្ថែមថា៖ «ខ្ញុំមកក្នុងនាមជាពលរដ្ឋ គឺប្រជាពលរដ្ឋចង់ស្នើសុំដល់តុលាការរាជធានីភ្នំពេញ សុំដោះលែងឱ្យមានសិទ្ធិសេរីភាពឡើងវិញ យោងតាមរដ្ឋធម្មនុញ្ញ ជំពូក៣ និយាយអំពីសិទ្ធិ និងករណីកិច្ចរបស់ពលរដ្ឋខ្មែរ ដូចជា មាត្រា៣៥ មាត្រា៤១ និងមាត្រា៥១ ចែងអំពិសិទ្ធប្រជាពលរដ្ឋនោះ គឺចង់ឱ្យរាជរដ្ឋាភិបាល ដោះលែងឱ្យគាត់មានសេរីភាពដែលមានចែងក្នុងច្បាប់ជាតិ និងច្បាប់អន្តរជាតិ»។
មន្ត្រីស៊ើបអង្កេតជាន់ខ្ពស់នៃសមាគមការពារសិទ្ធិមនុស្សអាដហុក លោក យី សុខសាន្ត ប្រាប់អ្នកសារព័ត៌មាននៅមុខសាលាដំបូងរាជធានីភ្នំពេញ នៅថ្ងៃទី៤ ខែកក្កដានេះថា យល់ថា ការឃុំខ្លួនសកម្មជនផ្សព្វផ្សាយសន្ធិសញ្ញាកិច្ចព្រមព្រៀងទីក្រុងប៉ារីសនេះ បន្តទៀត ពុំមានផលចំណេញណាមួយសម្រាប់រាជរដ្ឋាភិបាលនោះទេ គឺមានតែនាំឱ្យប៉ះពាល់ដល់សុខភាព សេរីភាពរបស់សកម្មជន និងប៉ះពាល់ដល់កេរ្តិ៍ឈ្មោះកម្ពុជានៅលើឆាកអន្តរជាតិ។
លោកបន្តថា៖«អ្វីដែលយើងស្នើសុំ គឺស្នើដោយទទូចដល់រាជរដ្ឋាភិបាល ជាពិសេសតុលាការមេត្តាដោះលែងឱ្យគាត់មានសេរីភាពឡើងវិញ ដើម្បីឱ្យគាត់ជួបជុំគ្រួសារ ហើយអ្វីដែលឃុំគាត់ទុកអត់ចំណេញទេ ធ្វើឱ្យប៉ះពាល់ដល់ស្ថានភាពគ្រួសារគាត់ ធ្វើឱ្យប៉ះពាល់ដល់សុខភាពគាត់ ធ្វើឱ្យប៉ះពាល់រដ្ឋាភិបាលដែលមានឈ្មោះមិនល្អនៅលើឆាកអន្តរជាតិ»។
គួរបញ្ជាក់ថា លោក ស្រ៊ុន ស្រ៊ន កញ្ញា ភឹង សោភា និងលោក សាន សិទ្ធ ត្រូវបានសមត្ថកិច្ចចាប់ខ្លួនកាលពីថ្ងៃទី២៣ ខែកក្កដា ឆ្នាំ២០២៤ និងនៅថ្ងៃបន្ទាប់ ត្រូវបានសាលាដំបូងរាជធានីភ្នំពេញ សម្រេចចោទប្រកាន់ ពីបទ ញុះញង់បង្កឱ្យមានភាពវឹកវរធ្ងន់ធ្ងរ ដល់សន្តិសុខសង្គម បន្ទាប់ពីពួកគេបានផ្សាយផ្ទាល់ (LIVE) វីដេអូនៅក្នុងបណ្តាញសង្គមហ្វេសប៊ុក ពាក់ព័ន្ធទៅនឹង «គម្រោងអភិវឌ្ឍ តំបន់ត្រីកោណរវាងរដ្ឋាភិបាលកម្ពុជា ឡាវ វៀតណាម (CLV-DTA)»។
សវនាការជាលើកដំបូងលើសំណុំរឿងនេះ បានធ្វើឡើងកាលពីថ្ងៃទី២៤ ខែធ្នូ ឆ្នាំ២០២៤ ដោយពេលនោះតុលាការបានពុះញែកសំណុំរឿង លោក ស្រ៊ុន ស្រ៊ន និងអ្នកដទៃទៀត ទៅជា ៥សំណុំរឿងផ្សេងៗគ្នា។ ការសម្រេចនេះ បានធ្វើឲ្យក្រុមមេធាវីការពារសកម្មជន២៣តុលា បង្ហាញការមិនពេញចិត្ត និងប្តឹងជំទាស់ការសម្រេចទៅសាលាឧទ្ធរណ៍។
រហូតដល់ថ្ងៃ១៩ ខែកុម្ភៈ ឆ្នាំ២០២៥ សវនាការលើសកម្មជន២៣តុលាទាំង៣រូប បានបើកជាថ្មីម្តងទៀត ហើយក៏ត្រូវពន្យារពេលភ្លាមៗដែរ។ ការពន្យារនោះ គឺដោយសារតែបណ្តឹងជំទាស់របស់ក្រុមមេធាវីនៅឯសាលាឧទ្ធរណ៍នៅមិនទាន់មានការសម្រេច៕