តំណាងអង្គការសង្គមស៊ីវិល សមាគម សហជីពនិងបណ្តាញយុវជនប្រហែល២០នាក់ចាប់ផ្តើមដាក់ញត្តិទៅកាន់ស្ថានទូតនៃបណ្តាប្រទេសដែលជាហត្ថលេខី នៃកិច្ចព្រមព្រៀងសន្តិភាពក្រុងប៉ារីសនៅព្រឹកថ្ងៃពុធនេះ ដោយអំពាវនាវឱ្យមានវិធានការបន្ទាន់ ក្នុងការការពារអធិបតេយ្យភាពនិងសន្តិភាពរបស់កម្ពុជា ចំពេលមានជម្លោះប្រដាប់អាវុធនាពេលថ្មីៗនៅតាមព្រំដែនកម្ពុជានិងថៃ។
ការដាក់ញត្តិនេះ គឺជាការឆ្លើយតបទៅនឹងការប៉ះទង្គិចគ្នាដោយយោធានាពេលថ្មីៗនេះ នៅតាមព្រំដែនកម្ពុជា-ថៃ ដែលក្រុមសង្គមស៊ីវិលចាត់ទុកថា បានបំពានច្បាប់អន្តរជាតិនិងគំរាមកំហែងដល់អស្ថិរភាពក្នុងតំបន់ នេះយោងតាមសេចក្តីប្រកាសព័ត៌មានមួយដែលចេញដោយអង្គការសង្គមស៊ីវិលចុះថ្ងៃទី១៩ ខែសីហា ឆ្នាំ២០២៥។
លោក រស់ សុថា ប្រធានអង្គការសម្ព័ន្ធភាពការពារសិទ្ធិមនុស្ស បានប្រាប់ Press Start Cambodia ថា ការដាក់ញត្តិនេះ នឹងចាប់ផ្តើមវេលាម៉ោង៨ព្រឹក ដោយត្រូវធ្វើដំណើរពីការិយាល័យសមាគមការពារសិទ្ធិមនុស្សអាដហុក ដែលមានប្រធានឬតំណាងជាន់ខ្ពស់របស់អង្គការសង្គមស៊ីវិលនិងតំណាងពលរដ្ឋដែលសកម្មក្នុងកិច្ចព្រមព្រៀងនេះប្រហែល២០នាក់។
លោកមានប្រសាសន៍ថា“ការដាក់ញត្តិ គឺមានគោលបំណងធំៗពីរ ដែលទី១ ឲ្យមានការគោរពនូវអធិបតេយ្យភាព ទឹកដីដែលមិនអាចរំលោភបាន និងធានាឲ្យបានសុខសន្តិភាពយូរអង្វែង ដែលជាគោលបំណងដែលបានដាក់ញត្តិទៅ”។
លោកបន្តថា កម្ពុជានិងថៃធ្លាប់មានសង្គ្រាមរ៉ាំរៃកន្លងមកនិងមានបញ្ហាថ្មីៗនេះទៀត ហើយវានឹងបន្តមរតកសង្គ្រាមសម្រាប់អ្នកជំនាន់ក្រោយ ហើយដូច្នេះលោកថា ពេលវេលានេះ គឺចាំបាច់ត្រូវមានយន្តការអន្តរជាតិមួយច្បាស់លាស់រវាងកម្ពុជាថៃនិងជាមួយអន្តរជាតិ ធ្វើម៉េចរក្សាបាននូវសន្តិភាពយូរអង្វែងនិងធ្វើឱ្យកម្ពុជារក្សាបានអធិបតេយ្យភាពនិងរួចផុតពីការរំលោភបំពាន។
លោកបានមានប្រសាសន៍ថា “ត្រូវមានភាពក្លាហាន។ ត្រូវក្រើនរំលឹកអ្នកស៊ីញ៉េ ដោយថៃក៏ជាអ្នកស៊ីញ៉េដែរ បើនិយាយឲ្យច្បាស់ត្រូវតែនិយាយ។ វាគ្មានខាតចំណេញអីទេ។ អាហ្នឹង គឺនិយាយ ដើម្បីប្រយោជន៍ជាតិ ដល់ពេលដែលយើងគិតពីអន្តរជាតិហើយ”។
អត្ថបទដោយ ទ្រី លាងគ្រី