នាយករដ្ឋមន្ត្រីកម្ពុជា ឱ្យដឹងថា ប្រធានាធិបតីសហរដ្ឋអាមេរិក លោក ដូណាល់ ត្រាំ នឹងបន្តតាមដានការអនុវត្តកិច្ចព្រមព្រៀងសន្តិភាពរវាងកម្ពុជា និងថៃ ដោយយកចិត្តទុកដាក់ ដើម្បីធានាមិនឱ្យមានការផ្ទុះអាវុធឡើងវិញ នៅតាមបណ្តោយនៃប្រទេសជិតខាងទាំងពីរនេះទេ។
ក្នុងទំព័រហ្វេសប៊ុកផ្លូវការរបស់នាយករដ្ឋមន្ត្រីកម្ពុជា លោក ហ៊ុន ម៉ាណែត នៅព្រឹកថ្ងៃទី១៥ ខែវិច្ឆិកា ឆ្នាំ២០២៥នេះ បានឱ្យដឹងថា រូបលោកបានជួបពិភាក្សាតាមទូរសព្ទ ជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ នៅយប់ថ្ងៃទី១៤ ខែវិច្ឆិកា ដើម្បីពិភាក្សាអំពីការវិវត្តសភាពការណ៍តាមបណ្តោយព្រំដែនកម្ពុជា-ថៃ ក្នុងគោលបំណងបន្តជំរុញការអនុវត្តកិច្ចព្រមព្រៀងសន្តិភាពរវាងកម្ពុជានិងថៃ។
លោកនាយករដ្ឋមន្ត្រី ហ៊ុន ម៉ាណែត បន្តថា លោកបានអគុណដល់លោក ត្រាំ ដែលបានផ្តួចផ្តើម និងសម្របសម្រួលឱ្យមានបទឈប់បាញ់ រវាងកម្ពុជា-ថៃកន្លងមក និងសម្រេចបាននូវសេចក្ដីថ្លែងការណ៍រួមទីក្រុងគូឡាឡាំពួរ ដើម្បីស្វែងរកសន្តិភាពយូរអង្វែងសម្រាប់កម្ពុជា និងថៃ។ លោកក៏បានប្រាប់ទៅលោក ត្រាំ ដែរថា កម្ពុជា នៅតែប្រកាន់ខ្ជាប់បន្តអនុវត្តតាមសេចក្តីថ្លែងការណ៍នោះ ហើយសង្ឃឹមថា ភាគីទាំងពីរ នឹងបន្តធ្វើការជាមួយគ្នាស្របតាមគោលការណ៍ និងយន្តការទ្វេភាគីដែលបានឯកភាពគ្នា។
លោកនាយករដ្ឋមន្ត្រី បានលើកឡើងបន្តក្នុងសំណេរដើមថា៖ «ឯកឧត្តមប្រធានាធិបតី Trump បានគូសបញ្ជាក់ជំហរយ៉ាងច្បាស់លាស់ថា ឯកឧត្តមចង់ឃើញសន្តិភាពស្ថិតស្ថេររវាងកម្ពុជានិងថៃ។ ក្នុងន័យនេះ ឯកឧត្ដមប្រធានាធិបតី នឹងបន្តតាមដានកិច្ចការនេះ ដោយយកចិត្តទុកដាក់ ដើម្បីធានាមិនឱ្យមានការផ្ទុះអាវុធឡើងវិញនៅបណ្តោយព្រំដែនកម្ពុជា-ថៃ»។
បើតាមប្រមុខរដ្ឋាភិបាលកម្ពុជា គឺកម្ពុជាបន្តរក្សាជំហរក្នុងការដោះស្រាយបញ្ហាព្រំដែនដោយសន្តិវិធី ដោយអនុលោមតាមគោលការណ៍ និងយន្តការដែលបានឯកភាពគ្នាកន្លងមក ដើម្បីដោះស្រាយបញ្ហាព្រំដែនកម្ពុជា-ថៃ និងកសាងសន្តិភាពយូរអង្វែងរវាងប្រទេសទាំងពីរ។
កាលពីរសៀលថ្ងៃម្សិលមិញ លោកនាយករដ្ឋមន្ត្រី ហ៊ុន ម៉ាណែត ក៏បានជួបពិភាក្សាតាមទូរសព្ទជាមួយប្រធានអាស៊ានប្តូរវេន និងជានាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ផងដែរដោយបានជជែកអំពីការបន្តស្វែងរកដំណោះស្រាយជម្លោះព្រំដែនកម្ពុជា-ថៃ ដោយសន្តិវិធី។
ការជួបពិភាក្សាតាមទូរសព្ទរវាងនាយករដ្ឋមន្ត្រីកម្ពុជា និងប្រធានាធិបតីសហរដ្ឋអាមេរិក និងរវាងនាយករដ្ឋមន្ត្រីកម្ពុជា និងនាយករដ្ឋមន្ត្រីម៉ាឡេស៊ីនេះ ធ្វើឡើងក្រោយពីយោធាថៃ បានបាញ់ប្រហារមកលើប្រជាពលរដ្ឋខ្មែរ នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីថ្ងៃទី១២ ខែវិច្ឆិកា ឆ្នាំ២០២៥ បណ្តាលឱ្យពលរដ្ឋខ្មែរម្នាក់បានស្លាប់បាត់បង់ជីវិត និង៣នាក់ទៀតរងរបួស។
លោក លី សុវណ្ណារិទ្ធ អ្នកនាំពាក្យរដ្ឋបាលខេត្តបន្ទាយមានជ័យ បានឱ្យដឹងថា ស្ថានភាពនៅតាមតំបន់ព្រំដែនក្នុងខេត្តនេះ មានសភាពស្ងប់ស្ងាត់គិតត្រឹមរសៀលថ្ងៃទី១៥ ខែវិច្ឆិកា ឆ្នាំ២០២៥នេះ ខណៈពលរដ្ឋនៅភូមិព្រៃចាន់ នៅតែបន្តស្នាក់នៅជំរុំភៀសសឹកដើម្បីសុវត្ថិភាព។
លោកថា៖ «នៅព្រំដែនស្ងប់ស្ងាត់ ហើយអ្នកដែលមកនៅភៀសសឹកហ្នឹង ទទួលបានការជួយគាំទ្រពីសម្ដេចតេជោ សម្ដេចធិបតី និងក្រុមការងារគ្រប់លំដាប់ថ្នាក់ សាធារណជនមានទាំងព្រះសង្ឃជួយផ្ដល់អំណោយផ្គត់ផ្គង់ពួកគាត់ទាំងស្បៀង ទាំងការស្នាក់នៅ និងអ្វីៗផ្សេងទាំងអស់បានបរិបូណ៌ហើយ មិនអ្វីនោះទេ»។
ឆ្លើយតបនឹងស្ថានការណ៍បច្ចុប្បន្ន លោករំពឹងថា ស្ថានភាពនិងត្រឡប់មកដូចដើមវិញក្នុងពេលដ៏ខ្លី បន្ទាប់ពីកម្ពុជាបានបង្ហាញជំហររឹងមាំនូវក្នុងការស្វែងរកដំណោះស្រាយតាមមធ្យោបាយការទូត។
ចំណែក លោក ពៅ បឿន មេភូមិព្រៃចាន់ បានឱ្យដឹងដែរថា ពលរដ្ឋនៅភូមិព្រៃចាន់ជាង ២៦០គ្រួសារ និងនៅភូមិជោគជ័យប្រមាណជិត ៥០០គ្រួសារ បាននិងកំពុងស្នាក់នៅក្រោមតង់ និងសាលាឆាន់នៅក្នុងវត្តចាន់ស៊ីសាមគ្គីរតនារាម ស្ថិតនៅឃុំកូប ស្រុកអូរជ្រៅ ខេត្តបន្ទាយមានជ័យ។
អ្នកតាមដានភូមិសាស្ត្រនយោបាយនៅតំបន់អាស៊ីប៉ាស៊ីហ្វិក លោក សេង វ៉ាន់លី បានលើកឡើងថា ចំណាត់ការបន្ទាប់របស់កម្ពុជាគួរតែមានភាពតឹងរឹង ស្របទៅតាមច្បាប់ និងប្រកបទំនួលខុសត្រូវជាក់ស្ដែង។
លោកបន្តថា៖ «រដ្ឋាភិបាលគួរតែថ្កោលទោសការសម្លាប់ជនស៊ីវិលកម្ពុជា ថាជាការបំពានយ៉ាងធ្ងន់ធ្ងរលើកិច្ចព្រមព្រៀងសន្តិភាព និងបទដ្ឋានមនុស្សធម៌[…] កម្ពុជាគួរតែបង្ហាញសារទៅកាន់សាធារណជន ក៏ដូចជាអន្តរជាតិឲ្យបានច្បាស់ថា កម្ពុជានឹងមិនឆ្លើយតបដោយអាវុធនោះទេ ប៉ុន្តែក៏មិនអនុញ្ញាតឲ្យប្រជាពលរដ្ឋរបស់ខ្លួន ត្រូវបានសម្លាប់ដោយនិទណ្ឌភាពនោះដែរ»។
កន្លងមក កម្ពុជា និងថៃ បានចុះហត្ថលេខាទៅលើកិច្ចព្រមព្រៀងចំនួនពីររួចមកហើយ ក្នុងនោះមានកិច្ចព្រមព្រៀងបទឈប់បាញ់ ដែលបានចូលជាធរមាននៅថ្ងៃទី២៨ ខែកក្កដា ឆ្នាំ ២០២៥ និងកិច្ចព្រមព្រៀងសន្តិភាពដែលទើបតែចុះហត្ថលេខា កាលពីថ្ងៃទី២៦ ខែតុលា ឆ្នាំ២០២៥ នៅទីក្រុងកូឡាឡាំពួរ ប្រទេសម៉ាឡេស៊ី ដែលមាននាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម និងប្រធានាធិបតីសហរដ្ឋអាមេរិក លោក ដូណាល់ ត្រាំ ធ្វើជាសាក្សី។
ក្នុងកិច្ចព្រមព្រៀងសន្តិភាពនោះ បានបញ្ជាក់ពីការដោះលែងទាហានខ្មែរ ចំនួន ១៨នាក់ ដែលភាគីថៃបានចាប់ឃុំខ្លួន ការដកហូតអាវុធធុនធ្ងន់ពីតំបន់ព្រំដែន និងការជួយសហការដោះស្រាយបញ្ហាមីនសល់ពីសង្គ្រាម ព្រមទាំងពង្រឹងសន្តិភាពតាមបណ្តោយព្រំដែន និងសហការក្នុងការដោះស្រាយជម្លោះដោយសន្តិភាព។
ប៉ុន្តែក្រោយការអនុវត្តកិច្ចព្រមព្រៀងសន្តិភាព បានប្រមាណ ២សប្តាហ៍ និងក្រោយមានហេតុការណ៍ទាហានថៃជាន់មីនរងរបួសនេះ រដ្ឋាភិបាលថៃ បានប្រកាសផ្អាកការអនុវត្តតាមកិច្ចព្រមព្រៀងសន្តិភាពជាមួយកម្ពុជា ដោយចោទកម្ពុជាថា បានដាក់មីនថ្មី តាមបណ្តោយព្រំដែន តែការចោទនេះត្រូវបានកម្ពុជាបដិសេធ៕