នាយករដ្ឋមន្ត្រីកម្ពុជា បានប្រកាសពីការបញ្ចប់ការទិញអ៊ីនធឺណេតពីប្រទេសថៃ នៅត្រឹមយប់ថ្ងៃទី១២ ខែមិថុនានេះ និងធានាការផ្គត់ផ្គង់អគ្គិសនីដោយខ្លួនឯង ដោយមិនបារម្ភចំពោះការកាត់ផ្ដាច់ចរន្តអគ្គិសនី និងអ៊ីនធឺណេតពីប្រទេសថៃនោះទេ។
លោកនាយករដ្ឋមន្ត្រី ហ៊ុន ម៉ាណែត បានលើកឡើងតាមរយៈសារនៅលើបណ្តាញសង្គមហ្វេសប៊ុករបស់លោក នៅយប់ថ្ងៃទី១២ ខែមិថុនា ឆ្នាំ២០២៥នេះថា ថ្មីៗនេះ មានការចែកចាយព័ត៌មានតាមបណ្ដាញសង្គមជាច្រើននៅប្រទេសថៃ ពាក់ព័ន្ធទៅនឹងការគំរាមពីសំណាក់ក្រុមជ្រុលនិយមមួយចំនួន ដែលឲ្យកាត់ផ្តាច់ការផ្គត់ផ្គង់អគ្គិសនី និងអ៊ីនធឺណេត មកកម្ពុជា។
លោកថា៖ «ដើម្បីកុំឲ្យវែងឆ្ងាយ ឬបង្កការលំបាកសម្រាប់ភាគីថៃ ក្នុងការសម្រេចកាត់ ឬមិនកាត់ ឬកាត់ពេលណានោះ កម្ពុជាបានសម្រេចចិត្តធានាការផ្គត់ផ្គង់អគ្គិសនី និងអ៊ីនធឺណេតដោយខ្លួនឯង»។
ប្រមុខរាជរដ្ឋាភិបាលកម្ពុជា បានគូសបញ្ជាក់ថា ក្រុមហ៊ុនបណ្ដាញខ្សែកាបអុបទិក ឬប្រតិបត្តិករអ៊ីនធឺណេតទាំងអស់នៅកម្ពុជា នឹងបញ្ចប់ការទិញអ៊ីនធឺណេត (Internet Bandwidth) ពីប្រទេសថៃ នៅម៉ោង១២យប់ថ្ងៃទី១២ ឈានចូលថ្ងៃទី១៣ ខែមិថុនានេះ ដោយសារកម្ពុជាមានលទ្ធភាពផ្គត់ផ្គង់សេវាអ៊ីនធឺណេតគ្រប់គ្រាន់ដោយខ្លួនឯង។
ចំណែក រឿងអគ្គិសនីវិញ លោកថា លោក កែវ រតនៈ រដ្ឋមន្ត្រីក្រសួងរ៉ែ និងថាមពល ក៏បានបញ្ជាក់រួចហើយអំពីសមត្ថភាពរបស់កម្ពុជា ក្នុងការផ្គត់ផ្គង់អគ្គិសនីនៅកម្ពុជាដោយខ្លួនឯងដែរ។
ជាមួយគ្នានេះ លោកនាយករដ្ឋមន្ត្រី ហ៊ុន ម៉ាណែត ក៏បានបញ្ជាឲ្យក្រសួងស្ថាប័នទាំងអស់ ពិនិត្យនិងត្រៀមលក្ខណៈជាយថាហេតុ ដើម្បីដាក់ចេញនូវវិធានការផ្សេងៗបន្ថែមទៀត ប្រសិនបើខាងភាគីថៃ មានការគំរាមកំហែងកាត់ផ្ដាច់អ្វីផ្សេងទៀតមកកម្ពុជា។
ថ្លែងពីខេត្តពោធិ៍សាត់ កាលពីថ្ងៃទី១១ ខែមិថុនា លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានលើកឡើងថា កម្ពុជា មិនបានយកអគ្គិសនីពីថៃមកតភ្ជាប់ក្នុងបណ្ដាញជាតិរបស់ខ្លួននោះទេ ហើយបច្ចុប្បន្ន មានតែសហគមន៍ចំនួនបីប៉ុណ្ណោះនៅតំបន់អូរស្មាច់ ខេត្តឧត្តរមានជ័យ ដែលតភ្លើងពីប្រទេសថៃ តាមរយៈ តង់ស្យុងមធ្យម ហើយប្រសិនបើមានការផ្តាច់អគ្គិសនីពីថៃនៅសហគមន៍ទាំង៣នោះ ក៏កម្ពុជាអាចមានលទ្ធភាពដើម្បីបញ្ជូនអគ្គិសនីពីបណ្តាញជាតិទៅផ្គត់ផ្គង់បានដែរ។
លោកបានគូសបញ្ជាក់ថា៖ «ព្រះរាជាណាចក្រកម្ពុជាយើង នៅពេលនេះ ម៉ោងនេះ ថ្ងៃនេះ យើងពុំបានយកភ្លើងពីព្រះរាជាណាចក្រថៃ ចូលមកកាន់ព្រះរាជាណាចក្រកម្ពុជា នៅក្នុងបណ្តាញជាតិរបស់ប្រទេសទាំងពីរទេ គឺសូន្យ ហើយការដែលមិនយកភ្លើងពីបណ្តាញជាតិថៃ មកចូលបណ្តាញជាតិកម្ពុជា គឺដោយសារព្រះរាជាណាចក្រកម្ពុជាយើង មានអគ្គិសនីគ្រប់គ្រាន់ ដើម្បីធ្វើការផ្គត់ផ្គង់ជូនគ្រប់ទីកន្លែងទាំងអស់»។
ការអះអាងរបស់ប្រមុខរដ្ឋាភិបាល និងមន្រ្តីជាន់ខ្ពស់កម្ពុជានាពេលនេះ ធ្វើឡើងក្រោយពីប្រទេសថៃ កាលពីដើមសប្ដាហ៍នេះ បានគំរាមក្នុងការកាត់ផ្ដាច់ចរន្តអគ្គិសនី និងអ៊ីនធឺណេតដែលតភ្ជាប់មកកម្ពុជា នៅតាមតំបន់ព្រំដែន។
កាលពីថ្ងៃចន្ទ ក្រសួងការបរទេសថៃ បានបញ្ជាក់ក្នុងសន្និសីទសារព័ត៌មានថា សំណើរវិធានការកាត់ផ្តាច់ចរន្តអគ្គិសនី និងការតភ្ជាប់អ៊ីនធឺណិត ទៅកាន់តំបន់ព្រំដែនកម្ពុជា នៅតែជាជម្រើស ចំពេលមានភាពតានតឹងកំពុងបន្ត។ នេះបើតាមការចុះផ្សាយរបស់កាសែតថៃ The Nation។
លោក Nikorndej Balankura អ្នកនាំពាក្យក្រសួងការបរទេសថៃ បានបញ្ជាក់ថា វិធានការនេះនឹងមិនចាំបាច់ទេ ប្រសិនបើកម្ពុជាបន្តកិច្ចប្រជុំគណៈកម្មាធិការចម្រុះព្រំដែន (JBC) ដែលបានគ្រោងទុកនៅថ្ងៃសៅរ៍ ដើម្បីដោះស្រាយបញ្ហាតាមរយៈការសន្ទនា។
រដ្ឋាភិបាលកម្ពុជា នឹងធ្វើជាម្ចាស់ផ្ទះរៀបចំកិច្ចប្រជុំគណៈកម្មការចម្រុះខណ្ឌសីមា និងបោះបង្គោលព្រំដែន គោក (JBC) នៅថ្ងៃទី១៤ ខែមិថុនា ឆ្នាំ២០២៥ខាងមុខនេះ។
កម្ពុជា បានបញ្ជាក់ក្នុងសេចក្តីថ្លែងការណ៍ថ្ងៃទី៤ ខែមិថុនា ឆ្នាំ២០១៥ថា កិច្ចប្រជុំ JBC នេះ នឹងគ្មានការជជែកអំពីវិវាទព្រំដែនកម្ពុជា-ថៃ នៅតំបន់មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របីនោះទេ ដោយកម្ពុជាបានសម្រេចបញ្ជូនវិវាទនៅតំបន់ទាំង៤នេះ ទៅតុលាការយុត្តិធម៌អន្តរជាតិ ICJ ហើយ។
លោក ឈិត រតនៈ អភិបាលរងខេត្តកោះកុង មានប្រសាសន៍នៅថ្ងៃទី១២ ខែមិថុនានេះថា ខេត្តកោះកុង មានទីតាំងមួយចំនួន បានទិញអគ្គិសនីពីថៃមកប្រើប្រាស់តាមរយៈក្រុមហ៊ុន។ ប៉ុន្តែលោកមិនមានរបាយការណ៍ជាក់លាក់នោះទេ ដោយសារស្ថិតក្រោមការចាត់ចែងរបស់ឯកជន។
យ៉ាងណា លោកថា ប្រសិនបើភាគីថៃ ផ្ដាច់ចរន្តអគ្គិសនីមែននោះ ខាងអគ្គិសនីកម្ពុជានឹងទទួលខុសត្រូវលើការតភ្ជាប់បណ្ដាញភ្លើងចូលវិញ ដូចការលើកឡើងរបស់រដ្ឋមន្រ្តីក្រសួងរ៉ែ។
លោកនិយាយថា៖ «ខាងកោះកុងយើងមានទិញភ្លើងពីថៃដែរ […] កិច្ចការងារខាងភ្លើងពាក់ព័ន្ធនឹងថ្នាក់ជាតិ ថ្នាក់លើ ចឹងបើករណីណាមួយមានបញ្ហាផ្នែកអគ្គិសនីខាង EDC គាត់ជាអ្នកតបណ្ដាញចូលវិញនៅក្នុងខេត្ត។ ខាងEDC អ្នករៀបចំទាំងអស់ បើករណីកាត់ផ្ដាច់ចឹង»។
នាយករងរដ្ឋបាលខេត្តព្រះវិហារ លោកស្រី នួន វលក្ខ ថ្លែងថា នៅខេត្តនេះ មិនមានការទិញអគ្គិសនីពីភាគីថៃសម្រាប់ប្រើប្រាស់នោះទេ ខណៈខេត្តនេះ មានអគ្គិសនីផ្គត់ផ្គង់ពីខេត្តស្ទឹងត្រែង។
ចំណែក លោក ជាវ ណារិន ប្រធានអគ្គិសនីខេត្តបន្ទាយមានជ័យ ក៏បានអះអាងដែរថា ទូទាំងខេត្ត មិនបានប្រើប្រាស់អគ្គិសនីថៃនោះឡើយ ដោយប្រើប្រាស់អគ្គិសនីផលិតក្នុងស្រុក។
លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា យល់ថា ប្រសិនបើកម្ពុជាអាចផ្គត់ផ្គង់អគ្គិសនីដោយខ្លួនឯងនោះ ការផ្ដាច់ចរន្តអគ្គិសនីរបស់ថៃ នឹងនាំឱ្យថៃរងផលប៉ះពាល់ដោយខ្លួនឯង។
លោកបញ្ជាក់ថា៖ «ចឹងការបិទភ្លើង បិទអ៊ីនធឺណេត វាមិនមែនជាបញ្ហាប៉ះពាល់ដល់ជីវភាពរស់នៅរបស់បងប្អូនពលរដ្ឋខ្មែរ ឬប៉ះពាល់ដល់សេដ្ឋកិច្ចកម្ពុជាទេ។ នេះគ្រាន់តែជាសារគំរាមដែលប្រជាជនមួយចំនួនស្ដាប់ទៅដូចជាថាធំអស្ចារ្យ ឬថាបញ្ហាអស្ចារ្យ តែបើយើងគិត ខ្ញុំគិតថាគ្មានបញ្ហាអស្ចារ្យអីទេ ចឹងជាការខាតបង់របស់ប្រទេសថៃត្រលប់ទៅវិញទេ»។
ភាពតានតឹងរវាងកម្ពុជា-ថៃ បានផ្ទុះឡើងសារជាថ្មី បន្ទាប់ពីទាហានថៃដែលកម្ពុជាអះអាងថា បានបាញ់មកលើលេណដ្ឋានកងទ័ពកម្ពុជា នៅវេលាទាបភ្លឺកាលពីថ្ងៃទី២៨ ខែឧសភា ឆ្នាំ២០២៥ បណ្ដាលឲ្យកងទ័ពកម្ពុជាម្នាក់ស្លាប់បាត់បង់ជីវិត។
យោងតាមរបាយការណ៍របស់ក្រសួងរ៉ែ និងថាមពល គិតត្រឹមឆ្នាំ២០២៤ ប្រទេសកម្ពុជា មានសមត្ថភាពផ្គត់ផ្គង់ថាមពលអគ្គិសនីសរុប ៥ ០៤៤ មេហ្កាវ៉ាត់(WW) កើនពី ៤ ៦៤៩មេហ្កាវ៉ាត់ក្នុងឆ្នាំ២០២៣។
ក្នុងចំណោមអានុភាពថាមពលសរុបទាំង ៥ ០៤៤មេហ្កាវ៉ាត់ គឺប្រភពក្នុងប្រទេសមានចំនួន ៤ ៣៧២ មេហ្គាវ៉ាត់(ថាមពលកកើតឡើងវិញ ២ ៦៧២ មេហ្កាវ៉ាត់និងប្រភពដុតធ្យូងថ្ម+ប្រេង ១ ៧០០ មេហ្គាវ៉ាត់) និងប្រភពនាំចូលពីប្រទេសជិតខាង រួមមាន ថៃ វៀតណាម និងឡាវ មានសរុប ៦៧២ មេហ្គាវ៉ាត់ ប៉ុន្តែការនាំចូលពីថៃ មានតិចតួចជាងប្រទេសជិតខាងផ្សេងទៀត៕