មន្ត្រីកម្ពុជា អំពាវនាវអាជ្ញាធរថៃ ចាត់វិធានការការពារពលករខ្មែរដែលស្នាក់នៅ និងធ្វើការនៅប្រទេសថៃ ព្រមទាំងវែកមុខជនល្មើសឱ្យទទួលខុសត្រូវចំពោះមុខច្បាប់ ក្រោយពីមានសេចក្តីរាយការណ៍ថា មានក្រុមជ្រុលនិយមថៃមួយចំនួន បានប្រើអំពើហិង្សា និងគំរាមកំហែងទៅលើពលរដ្ឋខ្មែរនៅថៃ។
ក្នុងសន្និសីទសារព័ត៌មាន ស្តីពី បច្ចុប្បន្នភាពនៃការឈ្លានពានរបស់កងទ័ពថៃមកលើទឹកដីកម្ពុជា នាព្រឹកថ្ងៃទី២៨ ខែកក្កដា ឆ្នាំ២០២៥នេះ លោកស្រី ម៉ាលី សុជាតា អ្នកនាំពាក្យក្រសួងការពារជាតិកម្ពុជា ថ្លែងថា មានសេចក្តីរាយការណ៍ជាច្រើន បានលើកឡើងជុំវិញករណីក្រុមជ្រុលនិយមថៃ បានធ្វើទុក្ខបុកម្នេញលើពលករខ្មែរដែលស្នាក់នៅ និងធ្វើការនៅប្រទេសថៃ ដែលជាទង្វើអមនុស្សធម៌ និងមិនអាចទទួលយកបាន។
លោកស្រីថា៖ «យើងទទួលបានរបាយការណ៍ជាច្រើន ពាក់ព័ន្ធនឹងការវាយដំ គំរាមកំហែងពីសំណាក់ក្រុមជ្រុលនិយមថៃ លើពលរដ្ឋខ្មែរនៅទីនោះ ដែលជាទង្វើអមនុស្សធម៌ ខុសច្បាប់ និងមិនអាចអត់ឱនឲ្យបាន។ កម្ពុជាសូមអំពាវនាវដល់អាជ្ញាធរថៃ ចាត់វិធានការជាបន្ទាន់ ដើម្បីការពារប្រជាពលរដ្ឋខ្មែរនៅទីនោះ ក៏ដូចជាជនល្មើសឲ្យទទួលខុសត្រូវចំពោះអំពើឧក្រិដ្ឋរបស់ខ្លួន ដោយផ្តល់យុត្តិធម៌ និងតម្លាភាពជូនពលរដ្ឋខ្មែរ»។
ជាមួយគ្នានេះដែរ ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៧ ខែកក្កដា ក៏បានចេញសេចក្តីអំពាវនាវមួយ អំពីការទប់ស្កាត់ការរើសអើង និងការប្រើប្រាស់ហិង្សាលើប្រជាពលរដ្ឋ និងពលករខ្មែរនៅប្រទេសថៃ។
សេចក្តីអំពាវនាវនោះ បានលើកឡើងថា មានការកើនឡើងនូវការរើសអើង ការប្រើហិង្សា និងការគំរាមកំហែងដល់សុវត្ថិភាពរបស់ប្រជាពលរដ្ឋខ្មែរ និងពលករខ្មែរដែលកំពុងស្នាក់នៅ និងធ្វើការនៅប្រទេសថៃ បង្កឡើងដោយក្រុមជ្រុលនិយមថៃ ដែលត្រូវបានផ្សព្វផ្សាយនិងចែករំលែកនៅលើបណ្តាញសង្គម ជាពិសេសក្រោយពេលមានការឈ្លានពានខាងយោធាពីភាគីថៃ មកលើដែនអធិបតេយ្យភាពកម្ពុជានៅតាមបណ្តោយព្រំដែនខ្មែរ-ថៃ កាលពីថ្ងៃទី២៤ ខែកក្កដា ឆ្នាំ២០២៥។
ក្រៅពីនោះ ក្រសួងក៏សង្កេតឃើញថា មានការកើនឡើងនូវការដាក់សម្ពាធលើពលករខ្មែរជាច្រើនទម្រង់ ដូចជា ការគំរាមមិនផ្តល់ប្រាក់ខែដល់ពលករខ្មែរដើម្បីបង្ខំឱ្យពលរដ្ឋខ្មែរបន្តធ្វើការ បើទោះបីជាពលករខ្មែរស្នើសុំឈប់ពីការងារ ការរឹតត្បិតសិទ្ធិបញ្ចេញមតិ និងការគំរាមកំហែងផ្សេងៗ រហូតធ្វើឱ្យពលករខ្មែរមួយចំនួន មិនហ៊ានចេញពីកន្លែងធ្វើការ ឬមិនហ៊ានធ្វើដំណើរចេញពីកន្លែងស្នាក់នៅជាដើម។
ប្រភពបន្តថា៖ «ក្រសួងការងារ និងបណ្តុះបណ្តាលវិជ្ជាជីវៈ សូមអំពាវនាវទៅដល់អាជ្ញាធរមានសមត្ថកិច្ចថៃ ក៏ដូចជាក្រសួងការងារថៃ សូមធ្វើការស៊ើបអង្កេត និងចាត់វិធានការឱ្យបានម៉ឺងមាត់ដើម្បីដោះស្រាយករណីការរើសអើង និងការប្រើហិង្សាដែលបានកើតឡើងលើពលករខ្មែរនាពេលកន្លងមក ព្រមទាំងដាក់ចេញនូវយន្តការបង្ការ និងទប់ស្កាត់ឱ្យបានច្បាស់លាស់ និងប្រកបដោយប្រសិទ្ធភាព ក្នុងនាមជាសមាជិកនៃអង្គការអន្តរជាតិខាងការងារ និងអង្គការអន្តរជាតិ ទេសន្តរប្រវេសន៍»។
តាមរយ:វីដេអូឃ្លីបជាង ៣នាទី នៅក្នុងទំព័រហ្វេសបុករបស់ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៨ ខែកក្កដានេះ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានប្រកាសថ្កោលទោសចំពោះការប្រើប្រាស់នូវអំពើហិង្សាលើពលករទេសន្តរប្រវេសន៍កម្ពុជា ដែលកំពុងបម្រើការងារនៅថៃ និងអំពាវនាវឱ្យរដ្ឋាភិបាលថៃ ព្រមទាំងមជ្ឈដ្ឋានអន្តរជាតិ ជួយអន្តរាគមន៍ការពារសិទ្ធិ និងសុវត្ថិភាពពលករខ្មែរ។
លោកថ្លែងថា៖ «ក្នុងរយៈពេលប៉ុន្មានថ្ងៃនេះ យើងឃើញរូបភាពបែបនេះកើតឡើង ពលករទេសន្តរប្រវេសន៍របស់យើង នៅពេលដែលគាត់ចេញពីធ្វើការ នៅពេលដែលគាត់ដើរតាមផ្លូវ នៅពេលគេសួរទៅគាត់ អត់សូវចេះភាសាថៃ គឺគេសន្មត់ថាជាខ្មែរ គឺគេវ៉ៃតែម្តង នេះគឺជារឿងមួយដែលយើងគិតស្មានថា មានរឿងបែបនេះកើតឡើងនៅលើទឹកដីថៃនោះទេ ទោះបីជាក្រសួងការងារថៃ រដ្ឋាភិបាលថៃ បានអំពាវនាវ ប៉ុន្តែយើងឃើញថាមានអំពើហិង្សាបែបនេះ នៅកើតមានឡើងនៅឡើយ»។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈកម្ពុជា លោក ស៊ុន មេសា ប្រាប់Press Start Cambodia ថា គិតត្រឹមថ្ងៃទី២៨ ខែកក្កដានេះ ក្រសួងនៅមិនទាន់សរុបតួលេខពលរដ្ឋ និងពលករខ្មែរ ដែលរងការប្រើហិង្សា និងការគំរាមកំហែងពីសំណាក់ក្រុមជ្រុលនិយមថៃនៅឡើយ ខណៈបច្ចុប្បន្នកំពុងស្ថិតក្នុងដំណាក់កាលប្រមូលពាក្យបណ្តឹងពីជនរងគ្រោះនៅឡើយ។
យ៉ាងណា លោកថា ក្រសួងការងារបាននិងកំពុងធ្វើការជាមួយអនុព័ន្ធការងារក្នុងប្រទសថៃ ដើម្បី ស្វែងរកជនរងគ្រោះ និងទាមទារនូវយុត្តិធម៌ជូនពួកគេតាមលទ្ធភាពដែលអាចធ្វើទៅបាន។
លោក ស៊ុន មេសា ថ្លែងថា៖ «ក្រសួងមិនអាចពឹងលើហ្វេសប៊ុក ហើយប្រកាសសន្និដ្ឋានថាគេធ្វើបាបខ្មែរទេ យើងត្រូវវាយតម្លៃច្បាស់លាស់ជាមុនលើកិច្ចការថាពិតជាខ្មែរមែនទេ? នៅកន្លែងណា? វីដេអូចាស់ឬថ្មី? អ្វីដែលសំខាន់គឺផ្អែកលើការប្តឹងរបស់បងប្អូនដែលពេលនេះ កំពុងតែបន្តបូកជាបន្តបន្ទាប់»។
កម្មករសំណង់ដែលកំពុងធ្វើការនៅកោះតៅ ប្រទេសថៃ និងមានស្រុកកំណើតនៅខេត្តបាត់ដំបង លោក ឈាន ថ្លែងថា បច្ចុប្បន្ន លោកកំពុងមានក្តីបារម្ភពីសុវត្ថិភាពជាខ្លាំង ខណ:លោកសង្កេតឃើញទង្វើហួសហេតុរបស់ក្រុមជ្រុលនិយមថៃមួយចំនួន ដែលបានប្រើហិង្សា ជេរប្រមាថ និងមិនលក់ឥវ៉ាន់ឱ្យជនជាតិខ្មែរដែលស្នាក់នៅ និងធ្វើការនៅប្រទេសថៃ។
លោកថា៖ «ខ្ញុំអត់ហ៊ានចេញទេ បារម្ភសុវត្ថិភាពដែរ ខ្ញុំនៅកោះតៅឯនេះឆ្ងាយ ពិបាករកឡានចេញអាចថាទៅមុខក៏មិនកើត ថយក្រោយក៏មិនកើត ហើយឮមិត្តភក្តិភូមាប្រាប់ថា គេស្រែករកជនជាតិខ្មែរ ជួនកាលខ្ញុំផ្ញើគាត់ទិញម្ហូបឱ្យ! គាត់ថាមានក្មេងស្ទាវ៦-៧នាក់ស្រែកឡូឡាដែរ តែអ្វីដែលខ្ញុំឈឺចាប់ខ្លាំងមិនមែនសម្រែកវាទេ គឺឈឺចាប់នឹងគេឈ្លានពាន»។
បើតាមប្រភពដដែល អះអាងថា មូលហេតុដែលលោក និងពលករខ្មែរជាច្រើនរូបទៀត មិនទាន់សម្រេចចិត្តវិលចូលប្រទេសវិញ ក៏ដោយសារកង្វះថវិកាធ្វើដំណើរ និងពលករខ្លះរង់ចាំបើកប្រាក់ឈ្នួលពីថៅកែ និងខ្លះទៀតពិបាករកមធ្យោបាយត្រឡប់មកព្រំដែនវិញ។
មន្ត្រីគម្រោងការពារសិទ្ធិពលករប្រចាំប្រទេសថៃ នៃអង្គការសង់ត្រាល់ លោក លឹង សុផុន មានប្រសាសន៍ថា កាលពីថ្ងៃទី២៥ ដល់ថ្ងៃទី២៦ ខែកក្កដា ក៏មានពលរដ្ឋខ្មែររងគ្រោះជាង១៥នាក់ បានរាយការណ៍ពីការធ្វើទុក្ខបុកម្នេញពីសំណាក់ក្រុមជ្រុលនិយមថៃផងដែរ ក្នុងនោះមានដូចជាការប្រើពាក្យសម្តីអសុរោះ និងការធ្វើបាបលើរាងកាយផងដែរ ប៉ុន្តែក្នុងរយៈពេល២ថ្ងៃចុងក្រោយនេះ នៅមិនទាន់មានករណីថ្មីដែលគួរឱ្យកត់សម្គាល់ទេ ដោយសារអាជ្ញាធរថៃបានជួយអន្តរាគមន៍ខ្លះហើយ។
លោកថា៖ «ពាក់ព័ន្ធនឹងការមិនវិលត្រឡប់របស់ប្រជាពលរដ្ឋខ្មែរ ថ្មីៗនេះយើងឃើញហើយថា នៅ តាមព្រំដែនមានការផ្ទុះអាវុធ វាជាក្តីបារម្ភ មួយទៀតក្មេងស្ទាវបានបង្ហាញពីការរើសអើង ហិង្សាដល់ពួកគាត់ ធ្វើឱ្យពួកគាត់ខ្លាច គឺទាក់ទងនឹងការរស់នៅមិនសុវត្ថិភាព ទោះជាមានការអន្តរាគមន៍ពីខាងអាជ្ញាធរថៃយ៉ាងណាក្តី ឬថៅកែគាត់ផ្តល់ភាពកក់ក្តៅក្តី ក៏ការព្រួយបារម្ភពួកគាត់គឺនៅតែកើតមាន ហើយមួយទៀតសាច់ញាតិសឹងតែ៩០% ហើយដែលទំនាក់ទំនងឱ្យគាត់ត្រូវតែត្រឡប់ទៅខ្មែរវិញ»។
បើតាមអ្នកនាំពាក្យក្រសួងការពារជាតិ លោកស្រី ម៉ាលី សុជាតា គិតពីថ្ងៃទី២៤ ខែកក្កដា រហូតដល់ថ្ងៃទី២៧ ខែកក្កដា ដែលទាហានថៃបានបើកការបាញ់ប្រហារមកលើទឹកដីកម្ពុជា ហើយកម្ពុជាបានធ្វើការវាយបកទៅវិញនោះ គឺពលករខ្មែរបានវិលត្រឡប់ពីប្រទេសថៃវិញ ចំនួនប្រមាណ ៣៩ ៧២៨នាក់ ខណៈនៅថ្ងៃចន្ទនេះ តាមការព្យាករណ៍អាចមានពលករប្រមាណ ១៥ម៉ឺននាក់ទៀត នឹងត្រឡប់មកកម្ពុជាវិញ។ លោកស្រីបន្តថា ប្រសិនបើស្ថានភាពនៅតាមព្រំដែន ថៃនៅបន្តការវាយប្រហារដោយសព្វាវុធមកលើទឹកដីកម្ពុជាទៀតនោះ ចំនួនពលករខ្មែរដែលវិលត្រឡប់មកពីប្រទេសថៃ អាចនឹងមានការកើនឡើងបន្ថែមទៀត៕