រដ្ឋបាលខេត្តបាត់ដំបងដាក់ចេញវិធានការមួយចំនួន ដើម្បីគ្រប់គ្រងហានិភ័យនៃការទិញ-លក់ប្រេងឥន្ធនៈ និងសុវត្ថិភាពអ្នកប្រើប្រាស់ ស្របពេលមានការបារម្ភអំពីការផ្គត់ផ្គង់ប្រេងឥន្ធនៈ។
យោងតាមសេចក្តីណែនាំចុះថ្ងៃទី១០ ខែមីនា ឆ្នាំ២០២៦ បានឱ្យដឹងថា រដ្ឋបាលខេត្តបាត់ដំបងបានធ្វើការណែនាំនូវវិធានការមួយចំនួនដូចជា តម្រូវឱ្យមន្ទីរ អង្គភាពជំនាញពាក់ព័ន្ធ រដ្ឋបាល ស្រុក និងកម្លាំងមានសមត្ថកិច្ច ចុះផ្សព្វផ្សាយ អប់រំណែនាំដល់គ្រប់ម្ចាស់ស្ថានីយប្រេងឥន្ធនៈ ដេប៉ូចែកចាយ និងអ្នកលក់រាយទាំងអស់ក្នុងមូលដ្ឋានឱ្យអនុវត្តបានខ្ជាប់ខ្ជួន លើតម្លៃនៃការលក់ប្រេងឥន្ធនៈ ស្របតាមការជូនដំណឹងរបស់ក្រសួងពាណិជ្ជកម្ម។
សេចក្តីណែនាំដដែលក៏តម្រូវឱ្យផ្សព្វផ្សាយឱ្យបានទូលំទូលាយដល់ប្រជាពលរដ្ឋចូលរួមបង្ការ និងគ្រប់គ្រងហានីភ័យនានា ដើម្បីធានាបាននូវការសន្សំសំចៃ និងចៀសវាងដាច់ខាតនូវការសម្រុកទិញប្រេងឥន្ធនៈស្តុកទុកដោយពុំមានការចាំបាច់ ដែលអាចបង្កឱ្យមានគ្រោះអាសន្ននានានាំឱ្យខូចខាតទ្រព្យសម្បត្តិ និងប៉ះពាល់ដល់ជីវភាពរស់នៅប្រចាំថ្ងៃ។
រដ្ឋបាលខេត្តបាត់ដំបងក៏បានបន្តណែនាំឱ្យមានកិច្ចសហការចុះត្រួតពិនិត្យទីតាំងស្ថានីយប្រេងឥន្ធនៈ ដេប៉ូចែកចាយ និងអ្នកលក់រាយទាំងអស់ ដើម្បីក្តាប់បាននូវស្ថានភាពជាក់ស្តែង និងណែនាំលើកទឹកចិត្តឱ្យប្រតិបត្តិការលក់ប្រេងឥន្ធនៈប្រកបដោយគុណភាពស្របតាមបទដ្ឋានកំណត់ និងគោរពតាមគោលការណ៍តម្លៃលើទីផ្សារ។
សេចក្តីណែនាំនេះក៏បានព្រមានផងដែរថា ករណីម្ចាស់ទីតាំងស្ថានីយប្រេងឥន្ធនៈ ដេប៉ូចែកចាយ និងអ្នកលក់រាយ អនុវត្តថ្លៃលក់ដំឡើងខុសប្រក្រតី ដោយផ្ទុយពីសេចក្តីជូនដំណឹងរបស់ក្រសួងពាណិជ្ជកម្ម កម្លាំងមានសមត្ថកិច្ច និងផ្នែកជំនាញនឹងបិទទីតាំងទាំងអស់នោះ ព្រមទាំងអនុវត្តតាមនីតិវិធីច្បាប់។
ទាក់ទិននឹងបញ្ហាប្រឈមអំពីកង្វះខាតប្រេងនេះ លោក កែវ រតនៈ រដ្ឋមន្ត្រីក្រសួងរ៉ែ និងថាមពលមានប្រសាសន៍ថា មកដល់ពេលនេះកម្ពុជានៅបន្តនាំប្រេងចូលជាធម្មតានៅឡើយ។
លោកមានប្រសាសន៍ថា “យើងអត់ទាន់មានបញ្ហាខ្វះប្រេងផ្គត់ផ្គង់ទេ។ សន្និធិបំរុងរបស់កម្ពុជាយើងនៅតែ ២១ ថ្ងៃដូចគ្នា បើគ្មានការនាំចូលមួយដំណក់សោះកម្ពុជាយើងក៏អាចឈរជើងបាន ២១ ថ្ងៃ ”។
គួរបញ្ជាក់ផងដែរថា បញ្ហាប្រេងឡើងថ្លៃកើតឡើងដោយសារជម្លោះនៅតំបន់មជ្ឈិមបូព៌ា កាលពីថ្ងៃទី២០ ខែកុម្ភៈ ឆ្នាំ ២០២៦ រវាងសហរដ្ឋអាមេរិក អ៊ីស្រាអែល និងអឺរ៉ង់ ធ្វើឲ្យប៉ះពាល់ដល់ការនាំចេញប្រេងជាង ២០ % ពីមជ្ឈិមបូព៌ា។ បច្ចុប្បន្នតម្លៃប្រេងឆៅនៅលើពិភពលោកបានបន្តធ្លាក់ចុះបន្តិចវិញ បន្ទាប់ពីបានឡើងថ្លៃយ៉ាងគំហុកក្នុងពេលសង្គ្រាមផ្ទុះឡើងនៅតំបន់មជ្ឈិមបូព៌ាកាលពីសប្តាហ៍មុន៕