អាជ្ញាធរខេត្តបន្ទាយមានជ័យ ហាមឃាត់អ្នកសារព័ត៌មានក្នុងការផ្សាយបន្តផ្ទាល់នៅក្បែរតំបន់ដែលកងកម្លាំងថៃបានរាយបន្លាលួសហ៊ុមព័ទ្ធលើទឹកដីកម្ពុជា ខណៈអ្នកសារព័ត៌មានម្នាក់ដែលក្រសួងព័ត៌មានទើបដកអាជ្ញាបណ្ណ ត្រូវបានចាប់ខ្លួន ក្រោយពេលផ្សាយផ្ទាល់ពីព្រឹត្តិការណ៍ដែលកើតមាននៅព្រំដែនកម្ពុជា-ថៃ។
តាមរយៈឃ្លីបវីដេអូមួយដែលបានចែកចាយក្នុងបណ្ដាញសង្គមហ្វេសប៊ុក នៅថ្ងៃទី២៦ ខែសីហា អភិបាលខេត្តបន្ទាយមានជ័យលោក អ៊ុំ រាត្រី បានបញ្ជាឱ្យលោក សាន ប៊ុនធឿន ចាងហ្វាងកាសែង SBT News បញ្ឈប់ការផ្សាយបន្តផ្ទាល់នៅលើបណ្តាញសង្គមរបស់ខ្លួន ពីព្រឹត្តិការណ៍ដែលប្រជាពលរដ្ឋខ្មែរ ប្រមូលផ្តុំតវ៉ារឿងទាហានថៃដាក់បន្លាលួសនៅព្រំដែនក្នុងខេត្តបន្ទាយមានជ័យ។
ក្នុងវីដេអូឃ្លីបនោះ លោក អ៊ុំ រាត្រី និយាយថា៖ «លើកចុងក្រោយនិយាយគ្នាឱ្យហើយ ឈប់ឡាយ[Live]យល់ ខ្ញុំធ្វើការនៅទីនេះ ខ្ញុំចេះធ្វើការ ប្រជាពលរដ្ឋឱ្យចូលមិនឱ្យចូលរបៀបម៉េច ខ្ញុំចេះធ្វើការ យល់អត់»។
ជុំវិញរឿងនេះ អ្នកនាំពាក្យរដ្ឋបាលខេត្តបន្ទាយមានជ័យ លោកលី សុវណ្ណរិទ្ធិ បានថ្លែងថា ការហាមឃាត់មិនឱ្យផ្សាយបន្តផ្ទាល់លើបណ្តាញសង្គម នៅតំបន់ដែលកងកម្លាំងថៃរាយបន្លាលួស ជាពិសេសចំណុចភូមិជោគជ័យ ដោយសារកន្លងមក មានអ្នកកាសែតនិងមនុស្សមួយក្រុមតូច បានធ្វើការផ្សាយផ្ទាល់ដែលនាំឱ្យបញ្ឆេះកំហឹងពាក់ព័ន្ធនឹងបញ្ហាព្រំដែន ហើយធ្វើឱ្យពិបាកក្នុងការដោះស្រាយ។
ជាមួយគ្នានេះ លោកថា ក៏មានមនុស្សមួយចំនួន ច្បិចយកតែការផ្សាយមួយជ្រុងតូចរបស់អ្នកនាំពាក្យក្រសួងការពារជាតិ ថ្លែងក្នុងសន្និសីទសារព័ត៌មាន ដោយបំភ័ន្តខ្លឹមសារព័ត៌មានរួមផងដែរ។
លោកបញ្ជាក់ថា៖ «ពាក់ព័ន្ធទៅនឹងការហាមឃាត់មិនអនុញ្ញាតឱ្យមាន ផ្សាយផ្ទាល់ (Live) នៅតំបន់ដែលយោធាថៃរាយបន្លាលួស នៅបន្ទាត់ព្រំដែន ពិសេសនៅចំនុចភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដោយសារកន្លងទៅមានសាព័ត៌មាន ក៏ដូចជាក្រុមមួយក្តាប់តូច បានធ្វើការផ្សាយផ្ទាល់ បញ្ឆេះកំហឹងរឿងបញ្ហាព្រំដែន ដែលនាំឱ្យបញ្ហាកាន់តែពិបាកក្នុងការដោះស្រាយ»។
នៅរសៀលថ្ងៃទី២៦ ខែសីហានោះដែរ សមត្ថកិច្ចខេត្តបន្ទាយមានជ័យ ក៏បានចាប់ខ្លួនអ្នកសារព័ត៌មានមួយរូប ឈ្មោះ មាស សារ៉ា ដែលជាម្ចាស់គេហទំព័រ សារ៉ា អ៊ិនស៊ីស៊ី ដេលី នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ នេះបើតាមទំព័រហ្វេសប៊ុកឈ្មោះ «Meas Sara មាស សារ៉ា» ប៉ុន្តែក្រោយការផុសបានប៉ុន្មាននាទី ទំព័រហ្វេសប៊ុកនេះ ក៏បានលុបការបង្ហោះរបស់ខ្លួនចេញវិញ។
តែយ៉ាងណា អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី ថ្លែងថា ពិតជាមានការចាប់ខ្លួនលោក មាស សារ៉ា មែន ប៉ុន្តែលោកប្រាប់ឱ្យសួរទៅកាន់តំណាងអយ្យការជំនួសវិញ។
លោកបញ្ជាក់ថា៖ «បាទ [ពិតជាមានការចាប់ខ្លួននៅភូមិជោគជ័យ] ។ ពាក់ព័ន្ធនឹងការចាប់ខ្លួន ការឃាត់ខ្លួន ការអនុវត្តនីតិវិធី គឺសូមឱ្យសួរទៅអយ្យការផ្ទាល់ទៅ ព្រោះធម្មតា ពាក់ព័ន្ធការងារស៊ើបអង្កេតចឹង គឺជាការសង្ងាត់វិជ្ជាជីវៈ»។
កាលពីថ្ងៃទី២១ ខែសីហា ក្រសួងព័ត៌មានបានសម្រេចលុបអាជ្ញាបណ្ណគេហទំព័រ សារ៉ា អិនស៊ីស៊ី ដេលី ដែលជាស្ថាប័នសារព័ត៌មានរបស់លោក មាស សារ៉ា ស្របពេលដែលលោកកំពុងចុះយកព័ត៌មានពាក់ព័ន្ធនឹងបញ្ហាព្រំដែន។ ការចាប់ខ្លួននេះ បន្ទាប់ពីលោក មាស សារ៉ា នៅតែបន្តទៅផ្សាយព័ត៌មានផ្ទាល់តាមបណ្តាញសង្គមជុំវិញបញ្ហាព្រំដែន នៅខេត្តបន្ទាយមានជ័យ ក្រោយពីក្រសួងព័ត៌មានបានលុបអាជ្ញាប័ណ្ណ។
ប្រធានមន្ទីរព័ត៌មានខេត្តបន្ទាយមានជ័យ លោក សេក សុខុម មានប្រសាសន៍ថា លោកមិនដឹងច្បាស់ថា អាជ្ញាធរហាមឃាត់ការផ្សាយផ្ទាល់របស់អ្នកកាសែត ក្នុងចម្ងាយប៉ុន្មានម៉ែត្រពីទីតាំងជម្លោះនោះទេ ដោយសារតំបន់ទាំងនោះគឺគ្រប់គ្រងដោយយោធា។ យ៉ាងណា លោកថា មន្ទីរព័ត៌មាន ក៏បានណែនាំដល់អ្នកកាសែតមួយចំនួន ចំពោះការផ្សាយផ្ទាល់នៅកន្លែងនោះ អាចមានទាំងចំណុចល្អនិងចំណុចអាក្រក់។
លោកបញ្ជាក់ថា៖ «ខ្ញុំក្ដាប់អត់បានទេ ព្រោះតំបន់យើងគ្រប់គ្រងដោយយោធា ចឹងយើងអត់ដឹងកំណត់ថាប៉ុន្មានម៉ែត្រពីកន្លែងព័ទ្ធលួសហ្នឹង ត្រូវឡាយឬមិនឡាយ។ ប៉ុន្តែអ្នកកាសែតយើងមួយចំនួន យើងបានប្រាប់ហើយថា ការឡាយហ្នឹងរឿងល្អមួយជ្រុង អាក្រក់មួយជ្រុង ឡាយនៅតំបន់ជម្លោះ ជាការផុសនូវកំហឹងតវ៉ា តែកាមេរ៉ាចំមុខអ្នកត្រូវចង់និយាយចេះតែនិយាយ»។
ចំណែក អ្នកនាំពាក្យក្រសួងព័ត៌មាន លោក ទេព អស្នារិទ្ធ មានប្រសាសន៍ថា កាលពីកន្លងទៅ ក្រសួងព័ត៌មាន បានចេញសេចក្ដីណែនាំហើយថា រាល់ការចុះយកព័ត៌មាននៅសមរភូមិមុខ គឺទាមទារឱ្យសុំការអនុញ្ញាតពីក្រសួង និងសមត្ថកិច្ចក្នុងតំបន់ចុះយកព័ត៌មាននោះជាមុនសិន។
លោកនិយាយថា៖ «អ្នកសារព័ត៌មានត្រូវចូលរួមជាអតិបរមា នូវរាល់សកម្មភាពទាំងឡាយណាដែលវាអាចប៉ះពាល់ ដើម្បីធានាសុវត្ថិភាពផ្ទាល់ខ្លួន និងសន្តិសុខជាតិ ហើយត្រូវគោរពក្រមសីលធម៌ វិជ្ជាជីវៈសារព័ត៌មាន និងជាពិសេសច្បាប់ស្ដីពីរបបរសាព័ត៌មានក៏ដូចជាលិខិតបទដ្ឋានគតិយុត្តនៃប្រទេសកម្ពុជា»។
លោក បន្តថា៖ «សិទ្ធិចុះយកព័ត៌មាន ផលិត រាយការណ៍ព័ត៌មាន ត្រូវធ្វើឡើងក្នុងក្របខណ្ឌច្បាប់កំណត់។ សេរីភាពសារព័ត៌មាននៅកម្ពុជា ត្រូវបានធានាយ៉ាងត្រឹមត្រូវ ពេញលេញ និងមានសង្គតិភាព ដោយអនុលោមតាមច្បាប់រដ្ឋធម្មនុញ្ញ ច្បាប់ស្តីពីរបបសារព័ត៌មាន។
យ៉ាងណា នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា លោក ណុប វី យល់ថា ការហាមឃាត់អ្នកសារព័ត៌មាន ក្នុងការចុះយកព័ត៌មានអំពីព្រឹត្តិការណ៍ ជាការរំលោភលើសេរីភាពសារព័ត៌មានដែលមានចែងក្នុងរដ្ឋធម្មនុញ្ញ និងច្បាប់នៅប្រទេសកម្ពុជា។
លោកថា៖ «ការហាមឃាត់អ្នកសារព័ត៌មានមិនឱ្យផ្សព្វផ្សាយអំពីព្រឹត្តការណ៍ ជាសកម្មភាពនៃការរឹតត្បិតហើយ វាធ្វើឱ្យមានការប៉ះពាលទៅដល់ការអនុវត្តតួនាទី បំពេញតួនាទីភារកិច្ចរបស់អ្នកសារព័ត៌មាន»។
បើយោងតាមរបាយការណ៍របស់អង្គការអ្នកសារព័ត៌មានគ្មានព្រំដែន(RSF) ដែលបានចេញផ្សាយថ្ងៃទី២ ខែឧសភា ឆ្នាំ២០២៥ បានដាក់ចំណាត់ថ្នាក់ប្រទេសកម្ពុជា ១៦១ ក្នុងចំណោម ១៨០ ប្រទេសនៅក្នុងសន្ទស្សន៍សេរីភាពសារព័ត៌មានពិភពលោកឆ្នាំ២០២៥ ដែលជាការធ្លាក់ចុះបន្ថែមទៀតពីចំណាត់ថ្នាក់ ១៥១ កាលពីឆ្នាំ២០២៤ ដែលចំណាត់ថ្នាក់នេះឆ្លុះបញ្ចាំងពីទិដ្ឋភាពនៃប្រព័ន្ធផ្សព្វផ្សាយកាន់តែយ៉ាប់ទៅៗ៕