អភិបាលខេត្តបន្ទាយមានជ័យជម្រាបជូនអភិបាលខេត្តស្រះកែវ ដោយសម្តែងការព្រួយបារម្ភជុំវិញសេចក្តីរាយការណ៍ព័ត៌មានកាលពីថ្ងៃទី២៤ ខែសីហា ពីគម្រោងចេញប័ណ្ណកម្មសិទ្ធិដីធ្លីជូនប្រជាពលរដ្ឋថៃ នៅតំបន់ព្រំដែន ដែលប្រទេសទាំងពីរពុំទាន់បានឯកភាពខណ្ឌសីមានៅលើដីជាក់ស្តែងនៅឡើយ។
យោងតាមលិខិតចុះថ្ងៃទី២៥ ខែសីហា ឆ្នាំ២០២៥ ជម្រាបជូនអភិបាលខេត្តស្រះកែវ លោក អ៊ុំ រាត្រី អភិបាលខេត្តបន្ទាយមានជ័យបានសម្តែងការព្រួយបារម្មណ៍ចំពោះសេចក្តីរាយការណ៍ព័ត៌មានថៃ ដែលបានចេញផ្សាយកាលពីថ្ងៃ២៤ ខែសីហា អំពីគម្រោងផ្តល់កម្មសិទ្ធិជូនប្រជាពលរដ្ឋថៃ ដែលមានភូមិសាស្ត្រជាប់នឹងភូមិជោគជ័យ ឃុំអូបីជាន់ ស្រុកអូជ្រៅ ខេត្តបន្ទាយបានជ័យ។
លោក អ៊ុំ រាត្រី បន្តថា ការចេញប័ណ្ណកម្មសិទ្ធិជូនពលរដ្ឋថៃនៅលើទឹកដីថៃនេះ ជាសិទ្ធិរបស់អាជ្ញាធរថៃ ប៉ុន្តែការចេញប័ណ្ណនេះ មិនត្រូវធ្វើឲ្យប៉ះពាល់ដល់អធិបតេយ្យកម្ពុជា ឬប៉ះពាល់ដល់តំបន់ ដែលគណៈកម្មការចម្រុះខណ្ឌសីមាព្រំដែនគោក (JBC) របស់ប្រទេសទាំងពីរ មិនទាន់បានឯកភាពខណ្ឌសីមាលើដីជាក់ស្តែង ឬក៏ប៉ះពាល់ដល់តំបន់ ដែលប្រជាជនកម្ពុជាកំពុងកាន់កាប់ និងអាស្រ័យផលឡើយ។
លោក អ៊ុំ រាត្រី បន្តថា ក្នុងករណី ដែលការចេញប័ណ្ណនេះ ប៉ះពាល់ដល់តំបន់ទាំងនេះ រដ្ឋបាលខេត្តបន្ទាយមានជ័យសូមធ្វើការជំទាស់ចំពោះរឿងនេះ ព្រោះវាជាសកម្មភាពរំលោភស្មារតី MOU ឆ្នាំ២០០០ រវាងរដ្ឋាភិបាល នៃប្រទេសទាំងពីរ ជាពិសេសប៉ះពាល់ដល់ដំណើរការចរចារ និងខណ្ឌសីមារបស់គណៈកម្មការចម្រុះខណ្ឌសីមាព្រំដែនគោក (JBC) នៃប្រទេសទាំងពីរ។
ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិបានឲ្យដឹងថា នៅវេលាម៉ោង២៖២០នាទី ថ្ងៃទី២៥ ខែសីហា កងកម្លាំងយោធាថៃបានធ្វើសកម្មភាពរាយបន្លាលួសនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលមានភូមិសាស្ត្រទល់មុខនឹងភូមិណងចាន់ ខេត្តស្រះកែវរបស់ប្រទេសថៃ តែត្រូវបានពលរដ្ឋកម្ពុជាធ្វើការទប់ស្កាត់រហូតដល់ថៃបានយកបន្លាលួសរបស់ខ្លួនត្រឡប់ទៅវិញ។
ចុងក្រោយឯកឧត្តមអភិបាលខេត្តស្រះកែវ ចូលរួមសហការក្នុងស្មារតីមិត្តភាព និងភាពជាអ្នកជិតខាងល្អ ដើម្បីជៀសវាងបង្កើនភាពតានតឹង និងផលប៉ះពាល់អវិជ្ជមានរវាងភាគីទាំងពីរ៕
អត្ថបទដោយ ទ្រី លាងគ្រី