សាលាឧទ្ធរណ៍ត្បូងឃ្មុំ នៅថ្ងៃពុធនេះ បានបើកសវនាការជំនុំជម្រះលើសំណុំរឿងរបស់ លោកសឿ សុជា អ្នកសារព័ត៌មាននៅគេហទំព័រហង្សប៉ុស្តិ៍ (HPN News)ប្រចាំនៅខេត្តកំពង់ធំ ដោយប្រធានក្រុមប្រឹក្សាជំនុំជម្រះ គ្រោងនឹងប្រកាសសាលដីកាលើសំណុំរឿងនេះ នៅចុងខែមិថុនា។
លោក សឿ សុជា ដែលតែងសកម្មក្នុងការរាយការណ៍ព័ត៌មានផ្នែកបរិស្ថាន ការរំលោភដីធ្លី និងការកាប់បំផ្លាញព្រៃឈើនៅដែនជម្រកសត្វព្រៃព្រៃឡង់ជាដើមនោះ ត្រូវបានតុលាការសម្រេចឃុំខ្លួនក្នុងពន្ធនាគារ កាលពីថ្ងៃទី២៦ ខែឧសភា ឆ្នាំ២០២៤ និងត្រូវបានតុលាការនៃសាលាដំបូងខេត្ដកំពង់ធំ សម្រេចផ្តន្ទាទោសដាក់ពន្ធនាគាររយៈពេល ១ឆ្នាំ ក្រោមការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍ ញុះញង់ឱ្យមានការរើសអើង និងបទបរិហាកេរ្ដិ៍ជាសាធារណៈ» តាមមាត្រា៤៩៥ មាត្រា៤៩៦ និងមាត្រា៣០៥ នៃក្រមព្រហ្មទណ្ឌ កាលពីអំឡុងខែវិច្ឆិកា ឆ្នាំ២០២៥។
ក្នុងពេលប្រកាសសាលក្រមក្នុងអំឡុងខែវិច្ឆិកានោះ តុលាការបានសម្រេចដោះលែង លោក សឿ សុជា ឱ្យនៅក្រៅឃុំជាបណ្តោះអាសន្ន បន្ទាប់ពីលោកជាប់ឃុំអស់រយៈពេល ៥ខែកន្លះ។
លោក សឿ សុជា អ្នកសារព័ត៌មាននៅគេហទំព័រហង្សប៉ុស្តិ៍ (HPN News)ប្រចាំនៅខេត្តកំពង់ធំ មានប្រសាសន៍នៅថ្ងៃទី០៤ ខែមិថុនា ឆ្នាំ២០២៥ បន្ទាប់ពីចេញពីបន្ទប់សវនាការនៅសាលាឧទ្ធរណ៍ត្បូងឃ្មុំថា លោកហាក់ពុំមានសង្ឃឹមថានឹងទទួលបានយុត្តិធម៌ក្នុងសំណុំរឿងនេះឡើយ ដោយសារតែក្នុងសវនាការ ព្រះរាជអាជ្ញារង មិនបានផ្ដល់ឱកាសឱ្យលោកបកស្រាយឱ្យអស់សេចក្ដីនោះទេ។
លោកថា៖ «បើតាមខ្ញុំមើល តាមខ្ញុំគិតទៅយើងវាមិនទាន់ហ៊ានថា ប៉ុន្តែតាមមើលចេតនានិងការជជែកដេញដោលយើងសង្ឃឹមតិចណាស់ សឹងតែគ្មានភាគរយនៃការសង្ឃឹមថា គេលើកលែងការចោទប្រកាន់ ប៉ុន្តែចំពោះខ្ញុំនៅតែយល់ថាអយុត្តិធម៌ហ្នឹង ព្រោះគេថាខ្ញុំជេរប្រមាថគេ[…] ហើយដល់ពេលយើងចង់និយាយបកស្រាយ គេអត់ឲ្យយើងនិយាយ គេថាគេសួរប៉ុណ្ណាគេឲ្យយើងឆ្លើយប៉ុណ្ណឹង តែពេលខ្លះគេឲ្យយើងនិយាយតែយើងនិយាយទៅខាងអគ្គព្រះរាជអាជ្ញារង គាត់សម្លុតទៅវិញ គាត់សម្លុតគាត់ស្រែកឮៗ ចឹងយើងមានអារម្មណ៍ណានិយាយទៀត»។
បើតាម លោក សឿ សុជា ក្រោយការសួរដេញដោលពេញមួយព្រឹក ប្រធានក្រុមប្រឹក្សាជំនុំជម្រះ នឹងប្រកាសសាលដីកាលើសំណុំរឿងនេះ នៅថ្ងៃទី២៤ ខែមិថុនា ឆ្នាំ២០២៥ ខាងមុខនេះ។
លោក កុល បុន អ្នកនាំពាក្យ និងជាព្រះរាជអាជ្ញា នៃមហាអយ្យការអមសាលាឧទ្ធរណ៍ត្បូងឃ្មុំ និងលោក តុប កក្កដា អតីតប្រធានមន្ទីរបរិស្ថានខេត្ដកំពង់ធំ និងជាដើមបណ្ដឹងក្នុងសំណុំរឿងនេះ បានបដិសេធអត្ថាធិប្បាយ។
លោក តុប កក្កដា បាននិយាយថា៖ «ខ្ញុំមិនខ្វល់ទេ បានហើយខ្ញុំរវល់ណាស់»។
បើតាមពាក្យបណ្តឹង អ្នកស្រី ស្រី សុផាន់ណារ៉ា មេធាវីតំណាងឱ្យលោក តុប កក្កដា ប្រធានមន្ទីរបរិស្ថានខេត្តកំពង់ធំ ដែលបានដាក់ចូលសាលាដំបូងខេត្តកំពង់ធំ កាលថ្ងៃទី២០ ខែឧសភា ឆ្នាំ២០២៤ បានប្តឹង លោក សឿ សុជា ដែលជាអតីតភ្នាក់ងារសារព័ត៌មានអនឡាញអាស៊ានដេលីផងនោះ ពីបទ ញុះញង់ឱ្យមានការរើសអើង ញុះញង់ឱ្យប្រព្រឹត្តបទល្មើសឧក្រិដ្ឋជាអាទិ៍ និងបរិហាកេរ្តិ៍ជាសាធារណៈ ដែលប្រព្រឹត្តតាមបណ្តាញសង្គមហ្វេសប៊ុក អាស៊ានដេលី សឿ សុជា និងគណនីតេឡេក្រាម សឿ សុជា។ នេះបើតាមការផ្សាយរបស់គេហទំព័រសារព័ត៌មានខេមបូចា។
ពាក្យបណ្តឹងនោះ បញ្ជាក់ថា លោក សឿ សុជា បានឈរនៅពីមុខស្នាក់ការបរិស្ថានចាស់តំបន់អូរផ្អាវ ហើយនិយាយថា ស្នាក់ការចាស់ដែលទុកចោល គឺជាឈើដែលបានកាប់យកមកសាងសង់ និងជាឈើដែលបានចាប់ពីពួកលួចកាប់ឈើ។ ដីព្រៃទីនេះវាលអស់ កាលពី១ឆ្នាំមុនសុទ្ធសឹងជាដីព្រៃស្តុក ដោយឃើញគេយកត្រាក់ទ័រមកឈូសឆាយព្រៃ តែគ្មានអ្នកអើពើ ហើយមន្រ្តីយាមយូរៗទៅបាត់ព្រៃអស់ មិនមែនការពារទេបែរជាអស់ព្រៃទៅវិញ។
ពាក្យបណ្តឹងនេះបានចោទលោក សឿ សុជា ថា ការនិយាយនេះសុទ្ធតែពាក្យមិនពិតនោះទេព្រោះថាមន្រ្តីឧទ្យានុរក្សនៃមន្ទីរបរិស្ថានខេត្តកំពង់ធំ បានខិតខំបំពេញការងារយ៉ាងយកចិត្តទុកដាក់ ដើម្បីបុព្វហេតុការពារធនធានធម្មជាតិ ដោយបានសហការជាមួយអាជ្ញាធរមូលដ្ឋានគ្រប់ជាន់ថ្នាក់ និងបង្រ្កាបបទល្មើសធនធានធម្មជាតិ។
ពាក្យបណ្តឹងខាងលើ បានចោទប្រកាន់ការផ្សាយរបស់លោក សឿ សុជា ធ្វើឱ្យមានការរើសអើងគុំកួនពូជសាសន៍ និងប៉ះពាល់ដល់ការខិតខំប្រឹងប្រែងរបស់មន្រ្តីជំនាញ និងអាជ្ញាធរគ្រប់ជាន់ថ្នាក់ និងគ្មានមូលដ្ឋានច្បាស់លាស់។
លោក ណុប វី នាយកប្រតិបត្តិនៃសមាគមខេមបូចាដែលធ្វើការផ្នែកលើកកម្ពស់សេរីភាពសារព័ត៌មាន សង្ឃឹមថា សាលាឧទ្ធរណ៍ខេត្តត្បូងឃ្មុំ នឹងពិចារណាឡើងវិញចំពោះករណីលោក សឿ សុជា។
លោកថា៖ «ខ្ញុំគិតថា យើងគួររង់ចាំពិនិត្យមើលលើការអនុវត្តនីតិវិធីនៃការសម្រេចរបស់តុលាការសិន ចឹងសង្ឃឹមថា សាលាឧទ្ធរណ៍ត្បូងឃ្មុំលោកនឹងពិចារណា ហើយនឹងលើកលែងការចោទប្រកាន់ទាំងឡាយលើ លោក សុជា ហើយឱ្យគាត់មានសេរីភាព ដើម្បីបន្តការងារជាអ្នកធ្វើសេចក្តីរាយការណ៍ព័ត៌មាន ពាក់ព័ន្ធជាមួយនឹងការកាប់បំផ្លាញធនធានធម្មជាតិ ហើយនឹងទាក់ទងជាមួយនឹងបញ្ហាដីធ្លីនៅក្នុងខេត្តដែលលោកកំពុងតែរស់នៅ»។
ចំណែក នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា ការរាយការណ៍ព័ត៌មានពីបញ្ហាបរិស្ថាន ឬបញ្ហានានាក្នុងសង្គមរបស់អ្នកសារព័ត៌មាន មិនគួរមានការចោទប្រកាន់ពាក់ព័ន្ធនឹងបទល្មើសព្រហ្មទណ្ឌនោះទេ។ លោកបន្តថា តាមច្បាប់ស្តីពីរបបសារព័ត៌មាន នៅពេលដែលអ្នកសារព័ត៌មាន អនុវត្តវិជ្ជាជីវៈសារព័ត៌មាន ហើយផ្សព្វផ្សាយទៅមានកំហុសឆ្គងណាមួយ អាជ្ញាធរ ឬស្ថាប័នសាម៉ី គួរប្រាប់ទៅអ្នកសារព័ត៌មាននោះឱ្យធ្វើការកែតម្រូវ។
លោកថា៖ «ករណីលោក សឿ សុជា ដែលជាអ្នកសារព័ត៌មាន ត្រូវបានសាលាដំបូងខេត្តកំពង់ធំចោទប្រកាន់ និងផ្តន្ទាទោស […]គឺផ្ទុយពីច្បាប់ស្តីពីរបបសារព័ត៌មាន ដែលចំពោះអ្នកសារព័ត៌មានក្នុងពេលធ្វើការផ្សព្វផ្សាយព័ត៌មានតាមវិជ្ជាជីវ:របស់ខ្លួន បើមានការខុសឆ្គងគឺត្រូវអនុវត្តច្បាប់ស្តីពីរបបសារពត៌មាន លើកលែងតែអ្នកសារព័ត៌មានទៅប្រព្រឹត្តបទល្មើសព្រហ្មទណ្ឌ ឬបទឧក្រិដ្ឋ ដែលមិនមែនជាការអនុវត្តន៍វិជ្ជាជីវ:សារព័ត៌មាន។ ដូច្នេះការផ្តន្ទាទោសនេះគឺប៉ះពាល់ដល់សេរីភាពសារព័ត៌មាន និងជាការបំផិតបំភ័យដល់អាជីពជាអ្នកសារព័ត៌មាន នាំឱ្យអ្នកសារព័ត៌មានកំណត់នូវសេរីភាពរបស់ខ្លួន ដែលនាំឱ្យបាត់តុល្យភាពព័ត៌មាន»។
ករណីនេះ មន្ត្រីសិទ្ធិមនុស្សរូបនេះ បានស្នើដល់សាលាឧទ្ធរណ៍ត្បូងឃ្មុំ ពិចារណាក្នុងការលើកលែងការចោទប្រកាន់ទៅលើលោក សឿ សុជា ដើម្បីចូលរួមលើកកម្ពស់សេរីភាពសារព័ត៌មាននៅកម្ពុជា។
លោកថា៖«ខ្ញុំសង្ឃឹមថាសាលាឧទ្ធរណ៍ត្បូងឃ្មុំនឹងពិចារណាករណីលោក សឿ សុជា តាមច្បាប់ស្តីពីរបបសារពត៌មាន និងលើកលែងបទចោទប្រកាន់លើ លោក សឿ សុជា ដើម្បីលើកកម្ពស់សេរីភាពសារព័ត៌មានឱ្យសមពាក្យលើកឡើងថា សារព័ត៌មានជាអំណាចទី៤ នៅក្នុងប្រទេសកម្ពុជា»៕