មន្ត្រីជាន់ខ្ពស់ក្រសួងមហាផ្ទៃអះអាងថា ការតែងតាំងនិងការផ្លាស់ប្តូរអភិបាលខេត្តកោះកុងនាពេលថ្មីៗនេះ គឺដើម្បីប្រសិទ្ធភាពការងាររដ្ឋបាលថ្នាក់ក្រោមជាតិ មិនពាក់ព័ន្ធនឹងបញ្ហាជម្លោះព្រំដែនឬកំហុសណាមួយទេ។
ព្រះរាជក្រឹត្យពីរដាច់ដោយឡែកពីគ្នាចុះថ្ងៃ២០ ខែសីហា ឆ្នាំ២០២៥ បានបញ្ជាក់ថា លោកស្រី ឈី វ៉ា ដែលបច្ចុប្បន្នជាអភិបាលរងខេត្តកោះកុង ត្រូវបានតែងតាំងជាអភិបាលខេត្ត ខណៈលោកស្រី មិថុនា ភូថង ជាអភិបាលខេត្តកោះកុងបច្ចុប្បន្ន ត្រូវបានតែងតាំងជារដ្ឋលេខាធិការក្រសួងកិច្ចការនារី។ ការតែងតាំងនេះ ធ្វើឡើងតាមសេចក្តីក្រាបបង្គំទូលថ្វាយរបស់លោកនាយករដ្ឋមន្ត្រី ហ៊ុន ម៉ាណែត។
លោកស្រី ឈី វ៉ា ត្រូវបានតែងតាំងជាអភិបាលរងខេត្តកោះកុង ដោយអនុក្រឹត្យរបស់រាជរដ្ឋាភិបាល កាលពីខែមិថុនា ឆ្នាំ២០២២។ លោកស្រី ឈី វ៉ា ជាអនុប្រធាន ស.ស.យក.ក. ខេត្តកោះកុង។
លោក ទូច សុខៈ បានផ្តល់បទសម្ភាសន៍ដល់សារព័ត៌មានក្នុងស្រុកមួយកាលពីម្សិលមិញថា ការផ្លាស់ប្តូរតំណែងរបស់លោកស្រី មិថុនា ភូថង មិនពាក់ព័ន្ធនឹងបញ្ហាព្រំដែន ឬមានកំហុសឆ្គងណាមួយនោះទេ។ លោកបន្តថា ការផ្លាស់ប្តូរនិងតែងតាំងនេះ ធ្វើឡើងដោយមានការពេញចិត្តពីសមីខ្លួននិងផ្អែកលើបទពិសោធន៍ការងាររបស់លោកស្រី មិថុនា ភូថង ជាពិសេសលើផ្នែកកុមារនិងស្ត្រី ដោយលោកស្រីបានកាន់តំណែងជាអភិបាលខេត្តកោះកុងរយៈពេល៨ឆ្នាំមកហើយ។
លោក សុខៈ មានប្រសាសន៍ថា “បញ្ហាទាំងអស់នេះហើយ ដែលអាចឱ្យលោកជំទាវមានមូលដ្ឋានយ៉ាងច្រើន យ៉ាងរឹងមាំ យកមកកាន់ក្រសួងកិច្ចការនារី ដើម្បីយកបញ្ហាទាំងអស់នេះមកធ្វើការវិភាគ ហើយដាក់ចេញនូវគោលនយោបាយឱ្យបានកាន់តែចំទិសដៅ កាន់តែមានប្រសិទ្ធភាព ជួយក្រសួងកិច្ចការនារីឱ្យកាន់តែខ្លាំងក្លាបន្ថែមទៀត ដើម្បីលើកកម្ពស់ស្ថានភាពរបស់កុមារី និងស្ថានភាពស្រ្តីនៅកម្ពុជា”។
Press Start Cambodia បានព្យាយាមទាក់ទងលោក ទូច សុខៈ ដើម្បីសុំការអត្ថាធិប្បាយ ប៉ុន្តែទូរស័ព្ទរបស់លោកតេចូលមិនលើក។
លោក ប៉ែន បូណា អ្នកនាំពាក្យរដ្ឋាភិបាលបានបដិសេធមិនធ្វើអត្ថាធិប្បាយ ជុំវិញការផ្លាស់ប្ដូរតំណែងអភិបាលខេត្តកោះកុង ដោយលោកបានបង្វែរសំណួរឱ្យទៅសួរលោក ទូច សុខៈ ជាអ្នកនាំពាក្យក្រសួងមហាផ្ទៃវិញ។
លោក ប៉ែន បូណា មានប្រសាសន៍ថា “ប្អូនអាចសាកសួរទៅខាងក្រសួងមហាផ្ទៃដែលជាអ្នកគ្រប់គ្រងលើរឿងនេះ”។
ទោះបីជាយ៉ាងណា លោក ឯម សុវណ្ណារ៉ា សាស្រ្តាចារ្យវិទ្យាសាស្ត្រនយោបាយ បានលើកឡើងថា ការផ្លាស់ប្តូរតំណែងរបស់លោកស្រី មិថុនា ភូថង ហាក់បីដូចជាលឿនពេក ដែលចេញពីចៅហ្វាយខេត្តឡើងជារដ្ឋលេខាធិការនៃក្រសួងកិច្ចការនារី គួរតែធ្វើតាមជំហានឬដំណាក់កាលណាមួយ ប៉ុន្តែលោកទទួលស្គាល់ថា ការតែងតាំងលោកស្រី មិថុនា ភូថង បានរួមចំណែកក្នុងការកាត់បន្ថយនូវគម្លាតសមភាពយេនឌ័រ ព្រោះតួនាទីស្រ្តីនៅក្នុងនយោបាយមានចំនួនតិច។
លោក សុវណ្ណារ៉ា យល់ឃើញថា “សម្រាប់ខ្ញុំផ្អែកទៅលើសមិទ្ធផល ឬស្នាដៃរបស់បុគ្គលឥស្សរជនស្រ្តីរូបនេះ អត់មានជារូបភាព ឬជាកិច្ចការលេចធ្លោ ក្នុងការឡើងឋានៈ ឬតួនាទីទេ។ ប៉ុន្តែកិច្ចការនេះ ប្រហែលជាពាក់ព័ន្ធនឹងអតីតភាពការងារ ការជឿជាក់ ការទុកចិត្ត ជាជាងទៅលើស្នាដៃ”។
លោកស្រី មិថុនា ភូថង ជាស្រ្តីដំបូងគេត្រូវបានតែងតាំងដោយក្លាយជាអភិបាលខេត្តកោះកុង កាលពីខែមិថុនា ឆ្នាំ ២០១៧។ លោកស្រី ជាកូនស្រីច្បងរបស់លោក យុទ្ធ ភូថង និងជាចៅស្រីរបស់លោក សាយ ភូថង ដែលជាមេដឹកនាំចលនាតស៊ូភាគនិរតី ក្នុងសម័យតស៊ូរំដោះជាតិពីរបបខ្មែរក្រហម៕
អត្ថបទដោយ ឃុត ពិសី