ក្រសួងទេសចរណ៍បើកភ្លើងខៀវឱ្យក្រុមហ៊ុនទេសចរណ៍កម្រិតពិភពលោកមួយរៀបចំមហាសន្និបាតប្រតិបត្តិករទេសចរណ៍ពិភពលោកឆ្នាំ២០២៦ នៅកម្ពុជា ដើម្បីរួមចំណែកលើកកម្ពស់វិស័យទេសចរណ៍នៅកម្ពុជា។
ក្នុងជំនួបសម្តែងការគួរសមជាមួយលោក ហួត ហាក់ រដ្ឋមន្ត្រីក្រសួងទេសចរណ៍ កាលពីថ្ងៃទី២៦ ខែកុម្ភៈ លោក Mark Howarth Archer តំណាងក្រុមហ៊ុនទេសចរណ៍ G Adventures ទទួលបានការគាំទ្រនិងឯកភាពលើការស្នើសុំរៀបចំព្រឹត្តិការណ៍កម្រិតអន្តរជាតិ និងជំនួបប្រតិបត្តិករទេសចរណ៍ពិភពលោក (GX Summit ២០២៦) នៅកម្ពុជា រួមទាំងការផ្តល់ទីតាំងរៀបចំពិព័រណ៌ផលិតផលក្នុងស្រុកនៅវត្តភ្នំ និងការរៀបចំដំណើរទស្សនាប្រាសាទនានានៅក្នុងខេត្តសៀមរាប។ នេះបើតាមអត្ថបទរាយការណ៍របស់ក្រសួងទេសចរណ៍ចុះថ្ងៃទី២៧ ខែកុម្ភៈ ឆ្នាំ២០២៦។
សេចក្តីរាយការណ៍ដដែលបន្ត រដ្ឋមន្ត្រីក្រសួងទេសចរណ៍បានថ្លែងអំណរគុណចំពោះគំនិតផ្តួចផ្តើមនេះ និងកោតសរសើរចំពោះការសម្រេចចិត្តដ៏ល្អរបស់ក្រុមហ៊ុន ដែលជ្រើសរើសកម្ពុជា ដើម្បីប្រារព្ធព្រឹត្តិការណ៍អន្តរជាតិដ៏ធំនេះ។
លោករដ្ឋមន្ត្រីបានបន្ថែមទៀតថា កម្ពុជា គឺជាគោលដៅទេសចរណ៍មានសុវត្ថិភាព និងមានសក្តានុពលខ្ពស់សម្រាប់ការធ្វើដំណើរវិនិយោគនិងរៀបចំព្រឹត្តិការណ៍សកលលោក ដោយសង្ឃឹមថា ការរៀបចំព្រឹត្តិការណ៍ GX Annual Summit ២០២៦ នៅកម្ពុជា នឹងរួមចំណែកលើកកម្ពស់វិស័យទេសចរណ៍ និងជំរុញការផ្សព្វផ្សាយកម្ពុជាទៅកាន់ទីផ្សារអន្តរជាតិកាន់តែទូលំទូលាយ។
ចំនួនភ្ញៀវទេសចរបរទេសមកលេងកម្សាន្តនៅកម្ពុជាមួយរយៈចុងក្រោយនេះហាក់មានការថយចុះ បើធៀបនឹងឆ្នាំ២០២៤។ ជាក់ស្ដែងនៅក្នុងរយៈពេល១១ខែ ឆ្នាំ២០២៥ កម្ពុជាទទួលបានភ្ញៀវទេសចរបរទេសត្រឹមតែជាង៥លាននាក់ប៉ុណ្ណោះ ធ្លាក់ចុះជិត១៤% បើធៀបនឹងរយៈពេលដូចគ្នាកាលពីឆ្នាំ២០២៤។ អ្នកជំនាញក្នុងវិស័យទេសចរណ៍ បានវាយតម្លៃថា ការធ្លាក់ចុះភ្ញៀវទេសចរបរទេសនេះ ត្រូវបានទាញទម្លាក់ជាចម្បងដោយសារបញ្ហាជម្លោះព្រំដែនជាមួយថៃ៕
អត្ថបទដោយ៖ ហ៊ាង ឧត្តម