ប្រជាសហគមន៍សាមគ្គីរុងរឿងរស់នៅជាប់ប្រឡាយលូបឹងត្របែក ក្នុងភូមិ៥ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ប្រមាណជាង៥០នាក់ ស្នើប្រមុខរដ្ឋាភិបាល ជួយអន្តរាគមន៍ដោយផ្ដល់សំណងជាថវិកា ឬផ្ទះសមរម្យជូនពួកគាត់ ខណៈអាជ្ញាធរមូលដ្ឋានដាក់កំហិតឱ្យពួកគាត់រុះរើផ្ទះសម្បែងនៅសប្ដាហ៍នេះ។
ការស្នើនេះ បានធ្វើឡើងអំឡុងពេលដែលប្រជាពលរដ្ឋប្រមាណ ៥០នាក់ តំណាងឱ្យជាង ៨០គ្រួសារ ដែលរស់ជាប់ប្រឡាយលូបឹងត្របែក តាមបណ្តោយផ្លូវលេខ៩៧ ៩៩ និង១០៥ បានធ្វើសន្និសីទសារព័ត៌មាន កាលពីថ្ងៃទី១៩ ខែមិថុនា ឆ្នាំ២០២៥នេះ។
អ្នកស្រី ខឹម ពៅ អាយុ ៥៨ឆ្នាំ ជាពលរដ្ឋរស់នៅតាមបណ្តោយផ្លូវលេខ៩៩ តាមមាត់ប្រទ្បាយបឹងត្របែក បានថ្លែងថា កាលពីថ្ងៃទី១៣ ខែមិថុនា អាជ្ញាធរមូលដ្ឋាន បានជូនដំណឹងឱ្យប្រជាពលរដ្ឋជាង ៨០គ្រួសារ រុះរើផ្ទះចេញពីតំបន់នោះ ដើម្បីឱ្យរដ្ឋាភិបាលអភិវឌ្ឍន៍គម្រោងពង្រីកប្រឡាយរំដោះទឹកក្នុងរាជធានីភ្នំពេញ។
អ្នកស្រីបន្តថា ខាងអាជ្ញាធរបានដាក់ឱសានវាទ ឱ្យពួកគាត់រុះរើចេញ ត្រឹមថ្ងៃទី ២២ ខែមិថុនានេះជាកំហិត ដែលការណ៍នេះ អ្នកស្រីបានស្នើដល់ប្រមុខរាជរដ្ឋាភិបាល ជួយអន្តរាគមន៍រកដំណោះស្រាយសម្រាប់ពួកគាត់ ដោយពួកគាត់ស្នើសុំសំណងសមរម្យ ឬផ្លាស់ប្តូរទីតាំងថ្មីឱ្យពលរដ្ឋរស់នៅបានសមរម្យ។
អ្នកស្រីបន្តថា៖ «គាត់បានដាក់លិខិតមកឱ្យប្រជាជនរុះរើផ្ទះ សម្បែងនៅថ្ងៃទី២២ ខែ៦ ឆ្នាំ២០២៥ គាត់ផ្តល់សំណងជាលុយមួយខ្នងផ្ទះបាន ១២០០[ដុល្លារ] ខ្នងផ្ទះខ្លះបានតែ៧៥០[ដុល្លារ] ខ្នងផ្ទះឯទៀតបាន៨០០[ដុល្លារ] ខ្នងផ្ទះខ្លះបាន២០០០[ដុល្លារ] ខ្នងផ្ទះខ្លះបាន១៥០០[ដុល្លារ] តើឱ្យប្រជាពលរដ្ឋរស់នៅកន្លែងណា? តើឱ្យគាត់ទៅទិញអ្វីបាន? ដូចខ្ញុំកូនច្រើន ដើររើសអេតចាយផង ឱ្យលុយខ្ញុំប៉ុណ្ណឹងតើឱ្យខ្ញុំទៅទិញអ្វីបាន? ខ្ញុំរើសអេតចាយសម្រាប់ចិញ្ចឹមជីវិត ឱ្យ១២០០[ដុល្លារ] តើខ្ញុំរស់នៅរបៀបណា? តើប្រជាជនទាំងអស់រស់នៅរបៀបណា?»។
ចំណែកឯ អ្នកស្រី មុត សុផុន អាយុ៥៨ ឆ្នាំ រស់នៅបណ្ដោយផ្លូវលេខ៩៧ ស្របតាមបណ្តោយលូបឹងត្របែកនោះដែរ ដែលមានកូនចំនួន ៩នាក់ក្នុងបន្ទុក បានលើកឡើងថា ពួកគាត់មិនជំទាស់នឹងការអភិវឌ្ឍរបស់រាជរដ្ឋាភិបាលនោះទេ ប៉ុន្តែស្នើសុំឱ្យអាជ្ញាធរផ្ដល់សំណងសមរម្យ ខណៈដែលពួកគាត់បានតាំងទីលំនៅនៅទីតាំងជាង ៣០ឆ្នាំមកហើយ។ អ្នកស្រីបន្តថា ចំពោះការផ្តល់សំណងត្រឹមចំនួន ៧៥៦ដុល្លារ ជាថ្នូរឱ្យពួកគាត់ចាកចេញពីលំនៅឋាននេះ គឺពួកគាត់ពុំអាចទទួលយកបានទេ ដោយសារចំនួននេះមិនគ្រប់គ្រាន់សម្រាប់ឱ្យគាត់ទៅរកផ្ទះថ្មីសម្រាប់រស់នៅសមរម្យបានឡើយ។
អ្នកស្រីថា៖ «នៅក្នុងថ្ងៃ២២ហ្នឹង គេមករូសរើផ្ទះអញ្ចឹងពួកយើងវាពិបាក ដើម្បីអីប្រជាពលរដ្ឋនៅនេះសុទ្ធតែអ្នកក្រ ដូចខ្ញុំកូនច្រើន ដល់អ៊ីចឹងអត់ដឹងទៅរស់នៅកន្លែងណា វាអត់ដឹងទៅនៅកន្លែងណា លុយបានតែ ៧-៨ រយ[ដុល្លារ]ហ្នឹង ហើយទៅទិញដីកន្លែងណាបាននៅ?[…] សូមសម្ដេច ហ៊ុន សែន ហ៊ុន ម៉ាណែត សម្ដេចតាសម្ដេចយាយទាំងអស់ ដើម្បីឱ្យជួយប្រជាពលរដ្ឋនៅតាមលូ ឱ្យរកកន្លែងឱ្យសមរម្យ ដើម្បីបានប្រជាពលរដ្ឋរស់នៅឱ្យបានសុខ កុំឱ្យចេញទៅទាំងទឹកភ្នែក»។
អ្នកស្រី ម៉េង ស្រីនឿន ជាពលរដ្ឋរស់នៅតាមបណ្តោយផ្លូវលេខ១០៥ បាននិយាយថា អ្នកស្រីបានរស់នៅតំបន់នោះអស់រយៈពេល ២០ឆ្នាំ ជាមួយសមាជិកគ្រួសារទាំង ៨នាក់។ អ្នកស្រីគ្រាំទ្រ ចំពោះគម្រោងអភិវឌ្ឍន៍របស់រដ្ឋាភិបាល ក្នុងគោលបំណងការពារទឹកជំនន់ ប៉ុន្តែអ្នកស្រីមិនយល់ស្របក្នុងការទទួលសំណងរបស់អាជ្ញាធរផ្តល់ឲ្យនោះទេ។
អ្នកស្រីនិយាយថា៖ «បើរាជរដ្ឋាភិបាលចង់ដោះស្រាយនៅទីនេះដែរ ដើម្បីបញ្ចៀសទឹកជំនន់កុំឲ្យជន់លិចដល់ទីក្រុង នាងខ្ញុំក៏ព្រមទទួលការអភិវឌ្ឍរបស់រដ្ឋាភិបាល ក៏ប៉ុន្តែនៅខាងអាជ្ញាធរដែលគាត់ដោះដូរជាសំណង ២១០០[ដុល្លារ] ឲ្យនាងខ្ញុំទទួលបែបម៉េច? តើពួកយើងយកលុយហ្នឹងទៅធ្វើអីកើតដែរ»។
ជុំវិញករណីនេះ អ្នកនាំពាក្យរដ្ឋបាលរាជធានីភ្នំពេញ អ្នកស្រី ដោ សម្ភស្ស មានប្រសាសន៍ថា អាជ្ញាធរមិនអនុញ្ញាតឱ្យពលរដ្ឋរស់នៅតំបន់នោះបន្តទៀតបានទេ ព្រោះត្រូវពង្រីកប្រឡាយដើម្បីរំដោះទឹកកុំឱ្យជន់លិចរាជធានីភ្នំពេញ ហើយក្នុងករណីក្រុមពលរដ្ឋមិនសុខចិត្ត គាត់អាចប្ដឹងទៅតុលាការបាន។
អ្នកស្រីថា៖ «បើគាត់ទាមទារៗមិនសុខចិត្តជាមួយនឹងសំណងដែលអន្តរក្រសួង គាត់កំពុងដោះស្រាយ យើងបានបើកផ្លូវឱ្យគាត់ធ្វើការប្ដឹងតវ៉ា គាត់អាចប្ដឹងទៅក្រសួង ហើយទីពីរទៀតបើគាត់មិនព្រមទេ សំណងរដ្បវេណីហ្នឹង គាត់អាចប្ដឹងទៅតុលាការ គាត់អាចប្ដឹងបាន»។
លោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ មានប្រសាសន៍ថា អាជ្ញាធរត្រូវចរចារជាមួយប្រជាពលរដ្ឋដោយសន្តិវិធី ដើម្បីស្វែងរកដំណោះស្រាយដែលអាចទទួលយកបានទាំងអស់គ្នា ដើម្បីបញ្ចៀសការបណ្តេញចេញដោយបង្ខំ ឬការកើតឡើងនូវអំពើហិង្សាណាមួយ ។
លោកថា៖ «ការបណ្តេញចេញដោយបង្ខំធ្វើឱ្យប៉ះពាល់ដល់សិទ្ធិរបស់ប្រជាពលរដ្ឋ និងបង្កឱ្យមានផលប៉ះពាល់ក្នុងការតាំងទីលំនៅថ្មី និងជីវភាពរស់នៅ និងមុខរបររបស់ប្រជាពលរដ្ឋ ការសិក្សារបស់កុមារ ជាដើម។ បទពិសោធន៍កន្លងមក អាជ្ញាធរអាចធ្វើការដកស្រង់បទពិសោធន៍ទាំងនោះបាន ហើយពីការបណ្តេញចេញដោយបង្ខំ។ កន្លងមក អង្គការសង្គមស៊ីវិលជាតិ និងអន្តរជាតិ បានទទូចឱ្យរាជរដ្ឋាភិបាលបញ្ឈប់ការបណ្តេញចេញដោយបង្ខំ»។
គួរបញ្ជាក់ផងដែរថា គម្រោងស្តារប្រឡាយឡូបឹងត្របែក គឺជាគម្រោងមួយក្នុងផែនការធំ ដើម្បីដោះស្រាយបញ្ហាទឹកជំនន់ និងបង្កើនប្រសិទ្ធភាពប្រព័ន្ធលូទឹកនៅរាជធានីភ្នំពេញ ដែលបានដឹកនាំដោយក្រសួងសាធារណការ និងដឹកជញ្ជូន និងរដ្ឋបាលរាជធានីភ្នំពេញ៕