អង្គការសង្គមស៊ីវិល និងគណបក្សប្រឆាំង អះអាងថា មានសកម្មជននយោបាយចំនួន ៣នាក់ ត្រូវបានអាជ្ញាធរចាប់ខ្លួន ចោទប្រកាន់ និងឃុំខ្លួននៅពន្ធនាគារបណ្ដោះអាសន្ន ពាក់ព័ន្ធនឹងបទ ក្បត់ជាតិ និងញុះញង់។
អង្គការការពារសិទ្ធិមនុស្សលីកាដូ បានចេញផ្សាយអត្ថបទខ្លីមួយ នៅល្ងាចថ្ងៃទី០៩ ខែកញ្ញាថា សមាជិកបក្សប្រឆាំងចំនួន៣នាក់ ក្នុងនោះមួយរូប នៅខេត្តបន្ទាយមានជ័យ និងពីរនាក់ទៀត នៅខេត្តកំពង់ស្ពឺ ត្រូវបានសមត្ថកិច្ចចាប់ខ្លួន កាលពីថ្ងៃទី០៥ ខែកញ្ញា។
អង្គការលីកាដូ បន្តថា លោក ចាន់ ជាតិ សកម្មជនបក្សឆន្ទៈខ្មែរ នៅខេត្តបន្ទាយមានជ័យ ត្រូវបានចោទប្រកាន់ពីបទ «ប្រគល់ឱ្យរដ្ឋបរទេសនូវព័ត៌មាន ជាអាទិ៍ អាចធ្វើឱ្យអន្តរាយការការពារជាតិ» តាមបញ្ញតិ្តមាត្រា៤៤៥ នៃក្រមព្រហ្មទណ្ឌ ដោយបទចោទនេះ ស្ថិតក្នុងចំណោមបទចោទពាក់ព័ន្ធនឹងអំពើ ក្បត់ជាតិ។ លោក ចាន់ ជាតិ អាចប្រឈមមុខជាប់ពន្ធនាគារ លើបទចោទពី អំពើក្បត់ជាតិ ពី ៧ឆ្នាំ ទៅ១៥ឆ្នាំ ប្រសិនបើលោកត្រូវបានផ្តន្តាទោស។
លីកាដូ អះអាងថា ការចាប់ខ្លួនលោក ចាន់ ជាតិ ធ្វើឡើងក្រោយពេលដែលលោកបានទៅ ថតរូប និងវីដេអូ នៅព្រំដែនកម្ពុជា-ថៃ ស្ថិតនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ បច្ចុប្បន្ននេះ លោក ចាន់ ជាតិ ត្រូវបានឃុំខ្លួនបណ្តោះអាសន្ននៅក្នុងពន្ធនាគារខេត្តបន្ទាយមានជ័យ។
លីកាដូ បន្តទៀតថា ចំពោះសកម្មជនគណបក្សប្រឆាំងនៅខេត្តកំពង់ស្ពឺ ចំនួន ពីររូបទៀត គឺលោក វ៉ន ឡាង ជំទប់ទី២ ឃុំត្រពាំងជោរ ស្រុកឱរ៉ាល់ កូតាបក្សភ្លើងទៀន និងលោក ហែម ហឿន សមាជិកក្រុមប្រឹក្សាស្រុកឱរ៉ាល់ កូតាបក្សឆន្ទៈខ្មែរ ក៏ត្រូវបានចាប់ខ្លួនកាលពីថ្ងៃទី៥ ខែកញ្ញា។ អ្នកទាំងពីរ ត្រូវបានសាលាដំបូងរាជធានីភ្នំពេញ ចោទប្រកាន់ពីបទ «ញុះញង់»។
លីកាដូ បន្តអះអាងថា លោក ហែម ហឿន ត្រូវបានចាប់ខ្លួន ក្រោយពីលោកបានផ្តល់ព័ត៌មានពីការចាប់ខ្លួនលោក វ៉ន ឡាង ទៅកាន់ក្រុមការងារគណបក្សឆន្ទៈខ្មែរ។ បច្ចុប្បន្ននេះ អ្នកទាំងពីរត្រូវបានបញ្ជូនទៅឃុំខ្លួនបណ្តោះអាសន្ននៅក្នុងពន្ធនាគារមណ្ឌលអប់រំកែប្រែទី១ (ម១) ក្រោមការចោទប្រកាន់ពីបទ ញុះញង់ ដោយអាចនឹងប្រឈមជាប់ពន្ធនាគារពី ៦ខែ ដល់ ២ឆ្នាំ។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន មានប្រសាសន៍ខ្លីថា ចៅក្រមស៊ើបសួរសម្រេចចោទប្រកាន់សមាជិកក្រុមប្រឹក្សាបក្សប្រឆាំងលោក វ៉ន ឡាង និងលោក ហែម ហឿន ពីបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបង្គាប់ឱ្យឃុំខ្លួនបណ្ដោះអាសន្ននៅពន្ធនាគារ ម១ ប៉ុន្តែលោកបដិសេធក្នុងការផ្ដល់ព័ត៌មានលម្អិត។
លោកបញ្ជាក់ថា៖ «ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។ ត្រូវបានសម្រេចឃុំខ្លួនបណ្ដោះអាសន្ន។ ខ្ញុំសូមបញ្ជាក់ជូនប៉ុណ្ណឹងព្រោះនៅក្នុងដំណាក់ការស៊ើប»។
លោក វ៉ន សុគា អាយុ ២៦ឆ្នាំ ជាកូនប្រុសរបស់លោក វ៉ន ឡាង ជំទប់ទីពីរ នៅឃុំត្រពាំងជោរ ស្រុកឱរ៉ាល់ និយាយថា ឪពុករបស់លោកត្រូវបានអ្នកភូមិប្រទះឃើញអាជ្ញាធរចាប់ខ្លួន អំឡុងពេលជិះម៉ូតូទៅបញ្ចូលអាគុយតាមផ្លូវ។
លោកថា ការចាប់ខ្លួននេះ អាជ្ញាធរមិនបានជូនដំណឹងដល់ក្រុមគ្រួសារនោះទេ ខណៈលោកបានស្វែងរកដំណឹងពីឪពុក តាំងពីអាជ្ញាធរខេត្ត រហូតដល់រាជធានីភ្នំពេញ ទើបបានជួបគ្នា។
លោកបានអះអាងថា លោក វ៉ន ឡាង មិនសូវចេះប្រើប្រាស់បណ្ដាញសង្គមហ្វេសប៊ុកនោះទេ ហើយគាត់ចូលចិត្តមើលតែវីដេអូក្នុងយូធូប (YouTube) ប៉ុណ្ណោះ ខណៈលោកក៏បានស្រាវជ្រាវលើហ្វេសប៊ុករបស់ឪពុកដែរ គឺមិនមានអ្វីខុសប្រក្រតីឡើយ។
លោកនិយាយថា៖ «ខ្ញុំអត់ដឹងថា គេគិតពុកខ្ញុំម៉េច ប៉ុន្តែជាក់ស្ដែងគាត់ជាមនុស្សល្អខ្លាំងសម្រាប់គ្រួសារខ្ញុំ ហើយគាត់អត់ដែលដើរទៅណាបាត់ចឹងទេ។ ខ្ញុំសង្ឃឹមថា តុលាការនឹងជួយដោះស្រាយបញ្ហាដែលគាត់កំពុងមាន ឱ្យគាត់បានត្រលប់មកវិញ»។
អធិការនគរបាលស្រុកឱរ៉ាល់ លោក ប៊ុត ប៊ុនធឿន មានប្រសាសន៍ថា ការចាប់ខ្លួនលោក វ៉ន ឡាង និងលោក ហែម ហឿន គឺអនុវត្តតាមដីការបស់សាលាដំបូងរាជធានីភ្នំពេញប៉ុណ្ណោះ។
គណបក្សភ្លើងទៀន និងគណបក្សឆន្ទៈខ្មែរ នៅថ្ងៃទី០៩ ខែកញ្ញានេះ បានចេញសេចក្ដីថ្លែងការណ៍រួមគ្នាមួយ ដោយអំពាវនាវឱ្យអាជ្ញាធរដោះលែងសកម្មជនរបស់ខ្លួន និងបញ្ឈប់ការធ្វើទុក្ខបុកម្នេញមកលើសកម្មជននយោបាយតាមគ្រប់រូបភាព។
បើតាមសេចក្ដីថ្លែងការណ៍ដដែល កាលពីថ្ងៃទី០៥ ខែកញ្ញា អាជ្ញាធរបានចាប់ខ្លួនជំទប់ទី២ ឃុំត្រពាំងជោ ស្រុកឱរ៉ាល់ កូតាបក្សភ្លើងទៀនលោក វ៉ន ឡាង និងសមាជិកក្រុមប្រឹក្សាស្រុកឱរ៉ាល់ កូតាបក្សឆន្ទៈខ្មែរលោក ហែម ហឿន។
គណបក្សប្រឆាំងទាំងពីរ បានចាត់ទុកការចាប់ខ្លួននេះ គឺជាការគំរាមកំហែងនិងធ្វើទុក្ខបុកម្នេញ ក្នុងគោលបំណងរារាំងការធ្វើសកម្មភាពនយោបាយរបស់សកម្មជនបក្សភ្លើងទៀន និងបក្សឆន្ទៈខ្មែរ។
គណបក្សទាំងពីរ ក៏បានអំពាវនាវឱ្យអាជ្ញាធរដោះលែងសកម្មជនគណបក្សភ្លើងទៀន និងគណបក្សឆន្ទៈខ្មែរទាំងអស់ ដែលត្រូវបានអាជ្ញាធរចាប់ខ្លួន ព្រមទាំងបញ្ឈប់ការធ្វើទុក្ខបុកម្នេញតាមគ្រប់រូបភាពមកលើសកម្មជនគណបក្សភ្លើងទៀន និងគណបក្សឆន្ទៈខ្មែរតទៅទៀត។
អគ្គលេខាធិការបក្សភ្លើងទៀន លោក លី សុធារ៉ាយុទ្ធ មានប្រសាស៍ថា តាមព័ត៌មានពីក្រុមគ្រួសារ សមាជិកបក្សប្រឆាំងទាំងពីរនាក់ ត្រូវបានបញ្ជូនទៅពន្ធនាគារ ម១ កាលពីថ្ងៃទី០៧ ខែកញ្ញា ខណៈពួកគេត្រូវបានចាប់ខ្លួននៅទីតាំងផ្សេងគ្នា ក្នុងស្រុកឱរ៉ាល់។ ចំពោះករណីនេះ លោកបន្ថែមថា គណបក្សនឹងផ្ដល់មេធាវីការពារក្ដី រួមទាំងដាក់លិខិតទៅក្រសួងមហាផ្ទៃ ដើម្បីសុំជួបពិភាក្សា ជុំវិញការធ្វើទុក្ខបុកម្នេញលើសកម្មជនបក្សប្រឆាំងជាបន្តបន្ទាប់។
បើតាម លោក លី សុធារ៉ាយុទ្ធ ក្រៅពីសកម្មជននយោបាយទាំងបីរូបខាងលើ សមត្ថកិច្ចក៏បានចាប់ខ្លួន លោក ទិន ប៊ុនធឿន សកម្មជនបក្សភ្លើងទៀន នៅស្រុកត្រពាំងប្រាសាទ ខេត្តឧត្តរមានជ័យ កាលថ្ងៃទី២៧ ខែកក្កដា ឆ្នាំ២០២៥ ពាក់ព័ន្ធនឹងបទ ក្បត់ជាតិ ដោយចោទថា បានផ្តល់ព័ត៌មានឲ្យទាហានសៀម។
លោកបន្តទៀតថា ក្នុងឆ្នាំ២០២៥នេះ មានសកម្មជនគណបក្សឆន្ទៈខ្មែរ និងគណបក្សភ្លើងទៀនចំនួន១០នាក់ហើយ ត្រូវបានចាប់ខ្លួន។ បើគិតតាំងពីឆ្នាំ២០២២ មកមានសមាជិកជិត៣០នាក់ ត្រូវបានចាប់ខ្លួន ក្នុងនោះមាន១៧នាក់ កំពុងជាប់ឃុំខ្លួនក្នុងពន្ធនាគារ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា ការចាប់សកម្មជនបក្សប្រឆាំងជាបន្តបន្ទាប់កន្លងមកនេះ គឺនាំឱ្យមានការរិះគន់ពីសហគមន៍ជាតិ និងអន្តរជាតិ ចំពោះការរឹតត្បិតលំហសេរីភាពនយោបាយ ការគំរាមកំហែង និងការធ្វើទុក្ខបុកម្និញសកម្មជននយោបាយ។ លោកបន្ថែមថា ក្នុងកាល:ទេស:នេះ អ្នកនយោបាយទាំងអស់ គួរមានសាមគ្គីភាព ឯកភាពជាតិ ការផ្សះផ្សាជាតិ ដោយតម្កល់ឧត្តមប្រយោជន៍ជាតិជាធំ។
មន្រ្តីការពារសិទ្ធិមនុស្សរូបនេះ អះអាងថា អាជ្ញាធរបានរំលោភលើនីតិវិធីច្បាប់ ប្រសិនបើមិនបង្ហាញដីកា ឬប្រាប់មូលហេតុនៃការចាប់ខ្លួនដល់សាម៉ីជន ឬក្រុមគ្រួសារគេឱ្យបានដឹង។
លោកនិយាយថា៖ «តាមក្រមនីតិវិធីព្រហ្មទណ្ឌការចាប់ខ្លួន ទោះបីជាបទល្មើសជាក់ស្តែង ក៏ត្រូវប្រាប់ពីបទល្មើស និងមូលហេតុនៃការចាប់ខ្លួនឱ្យសាម៉ីខ្លួន ឬក្រុមគ្រួសារគេបានដឹង។ ហើយបើបទល្មើសមិនជាក់ស្តែងការចាប់ខ្លួនត្រូវមានដីកាពីតុលាការ និងបង្ហាញដីកា ដោយប្រាប់ពីមូលហេតុ និងការចោទប្រកាន់។ ប្រសិនបើសមត្ថកិច្ចមិនបានអនុវត្ដដូច្នេះទេ គឺរំលោភទៅនីតិវិធីនៃក្រមព្រហ្មទណ្ឌ»៕