ក្រសួងការបរទេសនិងសហប្រតិបត្តិការអន្តរជាតិបានចាត់ទុកការលើកឡើងដោយនាយករដ្ឋមន្ត្រីស្តីទី នៃប្រទេសថៃលោក Phumtham Wechayachai ទាក់ទងនឹងការរៀបចំអនុវត្តវិធានការច្បាប់ចំពោះថ្នាក់ដឹកនាំកម្ពុជាថា ជាការរំលោភលើអធិបតេយ្យភាពនិងបូរណភាពនៃព្រះរាជាណាចក្រកម្ពុជា។
តាមសេចក្ដីថ្លែងការណ៍កាលពីថ្ងៃ០៧ ខែសីហា ឆ្នាំ២០២៥ បានឱ្យដឹងថា ក្រសួងការបរទេសកម្ពុជាបានសម្តែងការព្រួយបារម្ភចំពោះចំណាត់ការផ្លូវច្បាប់របស់ប្រទេសថៃមកលើថ្នាក់ដឹកនាំកម្ពុជា ហើយថា ការធ្វើបែបនេះ មិនត្រឹមតែជាការរំលោភបំពានលើអធិតេយ្យភាពនិងបូរណភាពទឹកដីកម្ពុជាប៉ុណ្ណោះទេ ថែមទាំងធ្វើឱ្យខូចខាតដល់ទំនាក់ទំនងកម្ពុជា-ថៃយ៉ាងធ្ងន់ធ្ងរទៀតផង។
យោងតាមសេចក្ដីថ្លែងការណ៍សរសេរថា “ប្រការនេះបានធ្វើឱ្យប៉ះពាល់យ៉ាងធ្ងន់ធ្ងរដល់កិច្ចខិតខំប្រឹងប្រែងទាំងអស់ដែលបានអនុវត្តកន្លងមក ដើម្បីសម្រេចបាននូវបទឈប់បាញ់ដ៏យូរអង្វែង និងដើម្បីស្តារសន្តិភាពនិងប្រក្រតីភាពរវាងប្រទេសទាំងពីរ”។
ក្រសួងការបរទេស និងសហប្រតិបត្តិការអន្តរជាតិបានបញ្ជាក់នូវការប្ដេជ្ញាចិត្តឥតងៀករេរបស់រាជរដ្ឋាភិបាលកម្ពុជាក្នុងការធ្វើការជាមួយរាជរដ្ឋាភិបាលថៃ ដើម្បីសម្រេចបាននូវសន្តិភាព និងការស្ដារទំនាក់ទំនងឱ្យមានប្រក្រតីភាពឡើងវិញនាពេលខាងមុខនេះ៕
ដោយ ស៊ន សោភា